Ferizaj

500 hektarë grurë rrezikohen të mos korren për shkak të rrugës së pakalueshme

Published

8 years ago

11 July, 2018

Mbi 500 hektarë grurë rrezikohen të mos korren në fshatin Bibaj të Ferizajt, për shkak se rruga që të çon tek arat ku është i mbjellur gruri është bërë e pakalueshme. Fermerët thonë se e gjithë rruga është mbushur me ujë për shkak të mungesës së kanaleve kulluese.

“Si pasojë e kësaj rruge të dëmtuar kanalet kulluese të arave nuk janë prandaj dhe uji rri në rrugë, kështu që nuk mundemi me hy me bë transportin e grurit, kemi tentu me traktorë por nuk kemi mundur me kalu e le më me mjete më të rënda me rimorkio që duhet me bartë, është shumë vështirë dhe krejt kjo është shkaku i kanaleve të mbyllura të kullimit të arave, ne e kemi bartur vite më parë në drejtim të autostradës, por tash detyrimisht duhet të kalohet këndej”, tha Skënder Ademi.

“Vërtet sivjet është një gjendje shumë e rëndë si në rendiment të grurit që është i ultë, edhe për rrugë që nuk kemi shpresë se mund të hymë në këtë rrugë prej ujit, kemi sasi të mëdha të grunajave, gruri është dobësuar me të madhe, dhëntë Zoti që mos të ketë këto ditë shi se më nuk kemi çka vijmë hiç, përpara ka funksionu kanalizimi për kullimin e arave dhe tash nuk janë pastru dhe janë këto pasoja, jemi kanë në komunë që dy ditë kemi kërku me na pru gurë të mëdhenj, sepse ne duhet të vijmë me makina të rënda kombajna, me kamionë për me bartë grurin e drithin dhe po shihet se nuk kalohet”, tha Shukri Sallahu.

“Kur e kanë shti ujësjellësin e kanë prishë rrugën dhe nuk është shtru me zhavorr, ne nuk jemi duke lyp asfalt, por një rrugë sa për me hy kamioni, e kombajna edhe ne kërkesën të vetme e kemi me na e zgjidhë gjatë këtyre 3-4 ditëve që me hy me korrë, se përndryshe ka me mbet pa u korrë pasi asnjë hektar nuk është korrë këtu, përndryshe nëse nuk korret gjatë këtyre ditëve i gjithë gruri do të dëmtohet”, tha Haki Limani.

Ndërsa, Drejtori i Bujqësisë në Ferizaj Burim Bajrami, tha se e kanë vizituar këtë pjesë dhe se janë duke shikuar mundësitë që të intervenojnë për zgjidhjen e këtij problemi.

“Ne së bashku me Drejtorinë e Shërbimeve Publike kemi dalur në vend të ngjarjes dhe kemi konstatu gjendjen që është, e vërtet që janë të vërshuar nga uji dhe është e pamundur të hyhet me mjete për korrjen e grurit aty, por do të shohim brenda mundësive tona intervenimin në atë pjesë, po ashtu vlen të theksohet se është pasojë e viteve të kaluara kur shumica e bujqve i kanë mbyllur kanalet dhe tani po janë pasojat”, tha Bajrami.

Përveç grurit, në këtë pjesë banorët kanë të mbjella edhe kultura të tjera bujqësore, për të cilat thanë se u janë dëmtuar mjaftë shumë nga mungesa e kanalit të ujërave.

Ferizaj

Arrestohen 5 persona në Ferizaj, të dyshuar për “Vrasje në tentativë”

Published

3 days ago

12 August, 2026

Redaksia

Policia në Ferizaj ka njoftuar se 5 persona janë dërguar në mbajtje kurse një tjetër është dërguar për trajtim në QKUK, si pasojë e pjesëmarrjes në rrahje që ndodhi pas një mosmarrëveshjeje në orët e hershme të së martës.

Sipas policisë, në rrahjen e dhunshme ishin përfshirë pesë meshkuj kosovarë dhe një shtetas i huaj derisa në vendngjarje është sekuestruar një kaçavidë.

Tre nga të dyshuarit kanë pranuar tretman mjekësor në Ferizaj, ndërsa njëri nga ta është dërguar në QKUK për tretman të mëtutjeshëm.

Rasti po hetohet si “Vrasje në tentativë”. Me vendim të prokurorit, pesë të dyshuar janë intervistuar dhe dërguar në mbajtje, ndërsa i dyshuari që gjendet në QKUK nuk është intervistuar për arsye të gjendjes shëndetësore.

Ferizaj

Bëhet i ditur identiteti i viktimave të aksidentit tragjik në Gjermani

Published

1 week ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

1 week ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.