Edhe pse ky tubim publik sipas ligjeve në fuqi është dashur të mbahet para se Kuvendi të marr vendim, në Ferizaj ndodhi e kundërta. Kuvendi i këtushëm fillimisht kishte marrë vendim që lokacioni i ri për varrezat e qytetit të jetë në Fshatin e Vjetër, e sot pas disa javësh i ftoi banorët e kësaj ane për ta shqyrtuar vendimin e njëjtë. Pas fjalës hyrëse që patën kryesuesja e Kuvendit dhe drejtori i Urbanizmit, debati vazhdoi me diskutime të banorëve. Si asnjëherë më parë banorët e Fshatit të Vjetër ishin përgatitur që para pushtetarëve ta arsyetojnë protestën kundër vendosjes së varrezave në fshatin e tyre.
“Sipas rregullave dhe disa normativave qe ne i kemi gjetur në internet është aprovuar një ligj që thotë se caktimi i varrezave të reja për një qytet me numër të madh të banorëve duhet të bëhet në atë mënyrë që duhet të jenë 20 hektarë dhe zgjidhja e problemit të jetë më tepër se 100 vjet. Prandaj ne mendojmë se kjo nuk është zgjidhje sepse ju po i bini varrezat në fshatin tonë ku mbushja e parcelës me varre do të bëhet brenda tri vitesh”, tha Naser Beqiri.
Derisa ky përfaqësues i banorëve numëroj edhe dhjetëra arsye të tjera pse varrezat nuk duhet të jenë në fshatin e tyre, me këtë rast ai përmendi edhe shumë probleme të tjera me të cilat përballen banorët e Fshatit të Vjetër. Madje kritikoi pushtetarët e secilës parti se banorët e kësaj pjese i kanë vizituar veç në prag të zgjedhjeve.
” Edhe pse në të gjitha takimet qe keni qenë asnjëherë nuk keni mbajtur shënime për hallet dhe kërkesat e banorëve, ato nuk u kanë interesuar sepse keni qenë të zënë duke i numëruar banorët se sa vota mund t’i keni “, u shpreh Naser Beqiri
“Ju kisha lut juve pushtetarë mos i merreni vendimet me kaq nguti, sepse ne banorët me kohë jemi ankuar për këtë problem’’, tha njëri nga banorët pjesëmarrës.
Por, pati prej atyre që u treguan edhe më të ashpër.
“Po doni me i sjell varrezat në Fshatin e Vjetër, por një ta keni parasysh ju keni me i varros, unë ka me i zhvarros, këtë gjë dine, ne do t’i japim zor deri në fund”, tha një tjetër banor i këtij fshati.
Derisa banorët të shqetësuar deklaronin se vendimi i Kuvendit është i gabuar, në anën tjetër drejtori i Urbanizmit Lulzim Aliu u dha një shpresë këtyre banorëve. Ai tregoi se ditëve të fundit për varreza të qytetit komuna ka gjetur edhe alternativa të tjera.
“Tash e kemi një situatë te re, ne kemi kërkuar nga Qeveria për të na dhënë prona të AKP-së. Qeveria na ka kthy pozitive këtë kërkesë dhe ne tash si komunë kemi alternativa më shumë për të bërë zgjidhje. Qysh u kam premtuar bashkë kemi marrë secilin vendim, prandaj mendoj se zgjidhja ka me qenë në favor të juajin besoni”, tha Aliu.
Në këtë debat publik, morën pjesë edhe asamblisti nga radhët e PDK-së Gëzim Haxhimusa dhe asamblistja Bahrije Hyseni nga LDK-ja. Me këtë rast Haxhimusa tha se gjatë këtyre ditëve ka mbajtur takime me banorët e Fshatit të Vjetër për të diskutuar se ku mund të gjenden hapësira të tjera për vendosjen e varrezave.
“Këta vetë e kanë ofruar një opsion që bëhet fjalë për një parcelë në anën tjetër të fshatit që është diku rreth 18 hektarë. E kanë një zgjidhje ajo është pronë e AKP-së e tash është në menaxhim të komunës“, tha Haxhimusa.
Megjithatë, debati nuk përfundoi me kaq. Banorët e Fshatit të Vjetër ishin tejet të revoltuar edhe me kryesuesen e Kuvendit Kristina Gashi-Bytyqi.
“Po duhet me të përmend Kristina, më vjen shumë keq unë kam shumë kritika për ju. Nëse asgjë s’kishe mundur të bësh, ke mundur mos me çu gishtin, thjesht ke mundur të abstenosh, të bëje një të drejtë njerëzore se për bashkëfshatarët e tu bëhej fjalë”, tha Xhelal Beqiri.
“Ke mundur me mbrojt kërkesën tonë, ke qenë shtylla e këtij kuvendi të lutem, thjesht ti nuk e ke mbrojt Fshatin e Vjetër sa dush jep deklaratë koti”, tha një tjetër banor.
E këtu, kryesuesja u kundërpërgjigj.
“Po më vjen keq që ty as që po të njoh, përndryshe ju duhet me ditë që unë i mbroj interesat e gjithë banorëve të kësaj komune, prandaj ju kisha lut mos hajdi me bë këtu politikë, sepse e kam vërejtur se që nga fillimi keni ardhur me këtë qëllim. Edhe më së pari unë nuk jam ekzekutiv, a po më kuptoni”, tha Gashi – Bytyqi .
Pas këtij debati, kryesuesja e Kuvendit doli nga tubimi publik pa ndonjë arsyetim, e nuk u kthye me as për ta përmbyllur atë. Kësisoj debati përfundoi me një zotim të drejtorit të Urbanizmit, i cili tha se deri në seancën e radhës ekzekutivi do të gjejë një alternativë më të përshtatshme për varrezat e qytetit. Por, sipas tij, Kuvendi nuk është i obliguar që paraprakisht ta anuloj vendimin që ka marrë rreth vendosjes së varrezave në Fshatin e Vjetër.
Ferizaj4 days ago
Ferizaj4 days ago
Ferizaj12 hours ago
Kosovë1 week ago
Kosovë6 days ago
Kosovë1 week ago
Kosovë6 days ago
Kosovë3 days ago
Kosovë7 days ago
Kosovë3 days ago
Kosovë1 day ago
Kosovë1 day ago
Kosovë1 day ago
Kosovë6 hours ago