Ferizaj

Greva pamundëson shërbimet postare

Published

8 years ago

10 September, 2018

Çdo ditë nga ora 10:00, postieri Imri Frangu nga fshati Sllatinë i Vitisë, nis punën në terren me biçikletën e tij, por ndryshe nga ditët e tjera sot postieri 60 vjeçar nuk doli për t’i shpërndarë dërgesat postare, pasi institucioni ku ai punon ka hyrë në grevë për shkak të vonesës së pagave.

Postieri Frangu thotë se bojkotimi i punës nuk i pëlqen, mirëpo një gjë të tillë është i detyruar ta bëj, për shkak se ka disa muaj që e merr pagën me vonesë.

“Çdo ditë në ora 10:00 dalim në terren, unë e kam terrenin në qytet, e kam prej fabrikës së vajit deri tek qendra e regjistimit dhe pjesën “Vëllezërit Gërvalla” deri tek magjistralja, të jesh postier apo të shpërndash postën për mua është kënaqësi, ndërsa tani vonesa e pagave pak po na e zbeh, shumica e punëtorëve kanë kredi, i kemi afatet e caktuara të kësteve, bankës nuk i intereson a ki pare apo jo, kështu që kjo grevë është pa dashjen tonë, por e kanë pru deri në këtë pikë”, tha Frangu.

Frangu thotë se punën si postier në Postën e Kosovës e ka nisur para 14 viteve, mirëpo deri sivjet paga nuk i është vonuar asnjëherë.

“Me paga nuk kemi pas kurrë problem, ndërsa tani po shihet është edhe publike, megjithëse neve na kritikojnë edhe qytetarët në njëfarë mënyre, por ne jemi në grevë për realizmin e kërkesave tona të cilat janë reale”, tha Frangu.

Ndërsa, kryetari i Sindikatës së Punëtorëve të Postës së Kosovës për rajonin e Ferizajt Sinan Krasniqi, duke numëruar kërkesat që kanë, tha se kërkojnë garanci nga menaxhmenti, bordi dhe Qeveria e Kosovës, që ekzekutimi i pagave në muajt e ardhshëm të bëhet brenda afatit ligjor.

“Ka 4-5 muj që pagat ekzekutohen për punonjësit e Postës me vonesë deri në datat 10-13, kështu që në këtë muaj kemi filluar të mbajmë grevë, tri kërkesat janë së pari pagat të ekzekutohen për të gjithë punonjësit pa bërë dallime, pasi muajt e kalur kanë bërë dallime në punonjës, kërkesa e dytë është që muajt e ardhshëm mos të ketë vonesa në paga dhe kemi kërkuar nga bordi, menaxhmenti dhe Qeveria që raste të tilla mos të ndodhin më. Kërkesa e tretë që është shumë e rëndësishme, kemi kërkuar që të mbulohet shërbimi universal postar për të cilat shërbime i kryen Posta për Qeverinë, shembull Posta e Kosovës i përcjell dërgesat në fshatrat më të thella të Kosovës ku jemi të obliguar nga Qeveria që për këtë të marrim kompensim 0.40 cent përderisa postierët tanë bëjnë shpenzime enorme për këtë dërgesë, tash e katër vite ne e kemi kryer këtë shërbim përderisa nuk kemi marrë asnjë cent nga Qeveria kompensim për këto dërgesa, janë diku 4 milionë e 900 mijë euro të mbledhura të cilat Qeveria ka marrë obligim që t’i kryej, por ende nuk e ka bërë”, tha Sinan Krasniqi.

Sindikata e Postës së Kosovës, paralajmëroi protesta në rrugë nëse kërkesat e tyre nuk realizohen.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

2 hours ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”