Ashtu siç Kosova po fiton në sporte, ashtu do të ndodhë edhe me çështje të mëdha nacionale. Kështu u zotua sot kryetari i Kuvendit të Kosovës Kadri Veseli, gjatë një ceremonie përurimi në fshatin Greme të Ferizajt. Me këtë rast ai ftoi gjithë lidershipin e brendshëm që të jetë unik rreth çështjeve të mëdha politike që aktualisht po zhvillohen në vend.

“Ne mbrëmë kemi fituar sepse ekipi jonë ka qenë bashkë, i koordinuar dhe ka shënuar gola. Kështu duhet të jemi edhe ne politikanët për të ardhmen e shtetit tonë, të jemi bashkë dhe të koordinuar në ballafaqimin me sfidat që janë për Kosovën tonë, pozitë dhe opozitë. Asgjë nuk ka që na ndanë për përcaktimin tonë shtetëror si shtet i pavarur dhe sovran. Kosova është një, ajo është sovrane, Kosovës nuk do të lejojmë që askush t’ia cenoj territorin e vet”, tha Kadri Veseli.

Pas kësaj deklarate, kryetari i Kuvendit Kadri Veseli doli tek ngjarja për të cilën kishte ardhur. Ai bashkë me deputetët e komunës së Ferizajt dhe drejtuesit e pushtetit lokal, përuruan nisjen e punimeve për ndërtimin e sallës sportive në fshatin Greme. Veseli u zotua se Gremja do të jetë model i fshatrave më të urbanizuar dhe investuar në Kosovë.

“Kjo sallë sportive të cilën e meriton Gremja, të njëjtën kohë Gremja meriton edhe më shumë, por kryetari dhe unë e kemi obligim që çdo kërkesë të këtij fshati ta realizojmë që t’i japim shembull gjithë Kosovës se si janë fshatrat e zhvilluara në vet industrializimin tonë”, tha Veseli.

Ndëkaq, kryetari i komunës së Ferizajt Agim Aliu, tha se vëmendja e Qeverisë së Kosovës për të investuar në komunën e Ferizajt do të thotë se tashmë të gjithë e kanë kuptuar që komuna jonë është kryeqendra e zhvillimit ekonomik, ndërsa Gremja është kryevendbanimi i zhvillimit ekonomik. Aliu shtoi se këto katër vitet e qeverisjes së tij do ta transformojnë esencialisht jetën e qytetarit të këtij vendi.

“Ne po dëshirojmë të krijojmë perspektivë këtu në vendin tonë dhe sot ne po krijojmë një mundësi më shumë në Greme i cili fshat është vend dhe sinonim i zhvillimit ekonomik dhe që tregon se dalëngadalë zhvillimin po e bartim nga zonat urbane në ato rurale. Ky projekt i sallës sportive dhe panaireve do të jetë një mundësi më shumë për shkollën “Jeta e Re” në Greme, do të jetë një mundësi për nxënësit, për të rinjtë e të rejat e këtij lokaliteti, do të jetë një mundësi më shumë për komunitetin e bizneseve”, tha Agim Aliu.

Një kohë e gjatë e pjesës së fjalimeve u shpenzua duke u falënderuar ndër vete niveli lokal dhe ai qendror. Ndërsa, banorët e fshatit të gëzuar për këtë investim, patën edhe kërkesën e tyre të kahmotshme. Ata po kërkojnë produktin kryesor për jetë, ujin e pijshëm.

“Mirë shumë që po ndërtohet kjo sallë, por besoni që as gëzimin s’po dina me shpreh se këtu po na mungon uji, ujë të pijshëm nuk kemi, prandaj politikanët e Ferizjat duhet të mendojnë për këtë projekt që ka mbet në gjysmë tash e disa vjet”, tha një banor i fshatit.

“Ah sikur ta kishim edhe ujin gjithçka do të ishte më ndryshe, ju lutem le të na e sjellin ujin që më së shumti kemi nevojë“, tha një tjetër banor.

Projekti për qendrën sportive dhe të panairave në fshatin Greme do të ndërtohet me fonde të Qeverisë së Kosovës, të cilat kapin shumën prej 1 milion e 200 mijë euro. Drejtues të Qeverisë u zotuan se ky investim do të kryhet në vitin 2019 dhe do të jetë projekti më modern që po realizohet në Kosovë. Edhe ky projekt kapital sikurse “Bashkimi i qytetit” do të realizohet nga kompania ferizajase “Bardhi shpk”.