Ferizaj

Eskalon katrahura e ndërtimeve në Ferizaj

Published

8 years ago

03 October, 2018

Këto pamje nuk janë nga Bangladeshi, por janë regjistruar midis qytetit të Ferizajt, përkatësisht në rrugën ”Madeleine Albright”. Ndërtimet që po ndodhin gjithandej qytetit, kanë bërë që në disa raste të shfaqen edhe problemet më jetike për banorët. Habib Hasani nga Ferizaj, i cili prej paslufte e ka ndërtuar këtë ndërtesë për banim familjar, u dashtë që pas gjithë këtyre viteve të kthehet nga Zvicra e ta ruaj pronën e vetë nga ndërtimet tjera përreth që ia kanë zënë dritën në dhomat e gjumit. Ky bashkatdhetarë për këtë problem i ka informuar të gjitha institucionet përkatëse në Ferizaj, por tash e disa muaj organet përgjegjëse as nuk vepruan e as nuk i dhanë përgjigje.

“Kam qenë dy javë ditë në prill të këtij viti, punët ishin duke u kryer në pjesën tjetër, por s’më kanë interesuar sepse nuk kishte të bënte me pengesë tek prona ime, kur erdha sërish në korrik veç e pash që punët kishin nisur edhe ngjitur me objektin tim, e kam lajmëruar inspektoratin me thanë shko në polici, kur shkova në polici ata më thanë që duhet të kem vendim të gjykatës, pastaj mora avokat dhe fillova me procedura, isha në komunë, ngjarjen e dinë 100 për qind, kam biseduar me drejtorin Lulzim Aliu, më ka treguar se dy herë i kanë vendosur shirita asaj ndërtese sepse nuk ka leje, ka kallëzim penal edhe në prokurori. Unë thjesht s’di nga t’ia mbajë, nga të iki prej banesës sime. Katet e para i kanë zënë dritaret, tash punët kanë mbërri deri në katin e katërt ku edhe jemi tani. Nganjëherë punët i ndalë, por ato i vazhdon kryesisht në vikende, pushime, si dhe gjatë fushatës“, tha Hasani.

Hasani thotë se është detyruar të marrë pushim nga puna atje, për të qëndruar këtu vetëm për këtë problem, derisa ankohet se për këtë rast janë të shqetësur e gjithë familja.

“Veç për këtë problem jam ardhë, tash e katër javë jam duke qëndruar këtu për me pa se si po rrjedhin më tutje këto punë. Thjesht ne prej banesës sonë nuk kem ku ikim. Prej paslufte e kemi ndërtuar këtë ndërtesë dhe i posedojmë të gjitha dokumentet që na kanë kërkuar. Besoni që fëmijët janë traumatizuar kur i kanë parë këto ndërtime, ata janë lindur e rritur në Zvicër gjërat i kuptojnë më ndryshe, sepse unë e di mentalitetin tonë, por fëmijët asesi nuk po pajtohen. Besoni ne ishim duke bërë gjumë në këtë dhomë, në dritare kërsitshin gozhdat e çekanët”, tha Hasani.

Gjykata Themelore në Ferizaj me aktvendimin e datës 26 shtator 2018, është shpallur jo kompetente për të vendosur rreth kësaj çështje, duke vlerësuar se kompetentë për të vendosur janë organet administrative, respektivisht Inspektorati Ndërtimor Komunal, kompetencë kjo e cila përcaktohet në dispozitat e nenit 29, 33 dhe dispozitat e tjera të Ligjit për Ndërtim. Përmes një e-maili kryetari i Gjykatës Themelore në Ferizaj Bashkim Hyseni, ka thënë se kryetari i gjykatës në bazë të autorizimeve ligjore, nuk ka juridiksion për të vlerësuar ligjshmërinë dhe rregullsinë e vendimeve gjyqësore të kësaj natyre, por vlerësimi i këtyre komponentëve është komptencë e Gjykatës së Apelit, e cila vepron sipas mjeteve juridike që mund të përdoren nga palët e autorizuara.

Ndërkaq, Televizioni Tema gjatë tërë ditës ka provuar të kontaktojë me drejtorin e Urbanizmit në Ferizaj Lulzim Aliun, por ai as nuk ndodhej në zyrat e komunës, e as nuk u është përgjigjur telefonatave të televizionit.

Ndryshe, bazuar në një shkresë të inspektorit të ndërtimtarisë dërguar palës ankuese më 13 gusht të këtij viti, thuhet se për objektin i cili ndërtohet herë pas herë me pronar Ekrem Tërshana, është lëshuar konkluzë për lejen e ekzekutimit apo rrënimit dhe njëjta është përcjell tek zyrtari komunal për ekzekutime dhe po ashtu është bërë kallëzim penal në Prokurorinë e Ferizajt.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

3 days ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

2 weeks ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”