Ferizaj

Projektin ”Bashkimi i Qytetit”, LDK e konsideron pa bazë ligjore

Published

8 years ago

11 October, 2018

Projekti “Bashkimi i Qytetit”, nga Lidhja Demokratike e Kosovës në Ferizaj konsiderohet investim ilegal. Në një konferencë me gazetarë, i pari i këtij subjekti politik në këtë qytet Muharrem Svarqa, akuzoi pushtetin lokal se këtë projekt e ka nisur pa kurrfarë baze ligjore, si dhe me plotë pakënaqësi të bizneseve dhe qytetarëve të zonës ku do të realizohet ai.

“Ky projekt po niset në kundërshtim me ligjin e buxhetit të Republikës së Kosovës për vitin 2018, sepse nuk figuron as në investimet e Ministrisë së Infrastrukturës, e as në atë të komunës. Nuk gjendet në asnjë kod buxhetor. Ky projekt po ashtu nuk parashihet në Planin Zhvillimor të komunës, që është dokumenti më i rëndësishëm i komunës. Madje, pa pasur studim paraprak të fizibilitetit, studim ky i domosdoshëm ligjor që ndërlidhet me menaxhimin dhe shpërndarjen e parasë publike. Komuna e Ferizajt ka pasur obligim të organizoj debate me biznese pasi që adresat e tyre i ka pasur në zyrën e regjistrimit të bizneseve, por edhe në vet kabinetin e kryetarit. Fakti që ata janë anashkaluar në këtë debat tregon për defaktorizimin e tyre të plotë deri fyerje, në mënyrë që projektet të cilat nuk janë as në kornizën afatmesme buxhetore e as në dokumentin më të rëndësishëm të komunës siç është Plani Zhvillimor Komunal, të zhvillohen punët pa dijen e qytetarëve”, tha Svarqa.

Në anën tjetër, drejtori i Infrastrukturës në Ferizaj Arbër Bytyqi, ka kritikuar LDK-në se po reagon vetëm atëherë kur pushteti po realizon projekte që e ndërrojnë dukjen e këtij qyteti.

“Ndoshta ata ishin mësuar në dërgimin e investimeve në rrugë nëpër Kishnapole dhe nuk ishin mësuar me këtë natyrë të investimeve dhe kjo me të vërtetë është shqetësuese. Janë zhvilluar të gjitha procedurat e prokurimit edhe të tenderimit, ka kod buxhetor, ne jemi bazuar në një kod buxhetor, këtë mund ta shikoni në kodin buxhetor të Republikës së Kosovës, është gjegjësisht me emrin nënkalimi për vetura në komunën e Ferizajt, ai mund të shihet është publik. Po ashtu është edhe në Planin Zhvillimor Komunal, ku zona e qytetit është e paraparë të ketë infrastrukturë nëntokësore dhe pikërisht ky projekt lidhet me këtë”, tha Bytyqi.

Në konferencën e thirrur për media, kryetari i degës së LDK-së Muharrem Svarqa, ka akuzuar pushtetin lokal për kontraktimin e firmës ”Beni Com” në realizimin e punimeve të projektit ”Bashkimi i Qytetit”, firmë kjo së cilës komuna ia ka shkëputur kontratën për neglizhencë të punimeve në sheshin e qytetit.

“Brenda konsorciumit të këtij projekti merr pjesë edhe firma “Beni Com” së cilës kohë më parë i është ndërprerë kontrata për rregullimin e sheshit, në kuadër të cilës është dashur të ndërtohet edhe fontana para komunës, përkundër asaj që brenda kontratës me këtë kompani në asnjë nen të asaj kontrate nuk është paraparë mundësia e shkëputjes së njëanshme, apo shkëputjes me marrëveshje”, tha Svarqa.

“Edhe tek kontrata e re të cilën e ka fituar firma “Beni Com’’ nëse vazhdon me cilësinë e punimeve sikurse që ka qenë te sheshi, edhe tek ajo kontratë do t’i marrim masat e njëjta. Këtu janë dy kontrata të ndryshme, kompania është e njëjtë, por punimet ne do t’i mbikqyrim nga fillimi, kështu që këtu s’ka kurrfarë frike”, tha Arbër Bytyqi.

Dega e LDK-së në Ferizaj, ka vlerësuar se me projektin “Bashkimi i Qytetit” pushteti aktual do t’i shkaktoj dëme të mëdha të ardhmes së Ferizajt, pasi që sipas LDK-së, humbet shansi i integrimit natyror dhe organik të qytetit përmes futjes së hekurudhës nëntokë dhe asfaltimit me katër korsi të rrugës ”Ahmet Kaçiku”.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

3 days ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

2 weeks ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”