Ferizaj

Mungesa e shiut shtynë të mbjellat vjeshtore

Published

8 years ago

09 November, 2018

Koha optimale për të mbjellat vjeshtore ka filluar që në muajin tetor, mirëpo mungesa e reshjeve të shiut, që është e domosdoshme për mbjelljen e kulturave bujqësore, ka bërë që shumica e fermerëve në komunën e Ferizajt mos të fillojnë mbjelljet vjeshtore.

Fermeri Xhevat Uka nga fshati Prelez i Jerlive, i cili planifikon që sivjet të mbjell rreth 300 hektarë me grurë, thotë se ka nisur të punojë në këtë drejtim, mirëpo kushtet jo të favorshme po ia pamundësojnë zhvillimin normal të kësaj veprimtarie.

“Është thatësi mirëpo për shkak të kohës optimale që ka kalur me mbjell grurin kemi filluar që 5-6 ditë, nuk është shumë e kënaqshme, por ne duhet të bëjmë punën tonë me mbjell, mandej varet nga klima, me ra shi rregullohet bëhet më mirë, pasi edhe shumë fermerë nuk kanë filluar ende se është thatësi e madhe, por unë kam fillu jam duke e punuar vetëm me piator sepse me lëvru nuk po bën për shkak se është thatësi e madhe dhe është problem, por pasi merremi me këtë lëmi duhet t’i bëjmë të mbjellat. Unë që sa vite merrem me këtë veprimtari, por sikurse sivjet nuk mbaj mend që ka ndodhë, ka ndryshu klima shumë”, tha Uka.

Përveç brengës së rendimenteve që do t’i ketë sivjet, fermeri nga fshati Prelez i shqetësuar është edhe me koston e lartë që përfshijnë mbjelljet vjeshtore.

“Edhe fara është shtrenjtë edhe plehu, por më së shumti po na kushton nafta pasi për çdo ditë ka ngritje, çmimi i farës nuk ka lëviz shumë, por me naftë nuk jemi aspak të kënaqur me çmimin që është bërë”, tha fermeri Uka.

Ndërsa, agronomi Avdullah Isufi, tha se në një situatë të tillë fermerët duhet ta shtojnë sasinë e farës në mënyrë që rendimentet të jenë të kënaqshme.

“Unë iu preferoj fermerëve që në ato sipërfaqe ku mund të lëvrohet të fillojnë dhe ta mbjellin grurin, sepse shumë më mirë është që fara të hyjë në tokë në mënyrë që kur të kemi lagështi ajo të filloj procesin e mbirjes. Tani pasi që kemi kaluar afatin optimal, preferohet që bujqit ta rrisin sasinë e farës për njësi të sipërfaqes do të thotë për hektarë dhe mundësisht t’i numërojnë ditët, do të thotë prej 1 nëntorit e tutje të shtohet bile nga 1 kilogram më tepër për çdo ditë të vonuar. Nga përvoja mbi 30 vjeçare si agronom, ne grurin e kemi mbjellur edhe natën e Vitit të Ri, por krejt pastaj varet se çfarë klime do të jetë në muajt janar dhe shkurt apo çfarë dimri do të kemi, në ato rrethana kur kemi temperatura të ulëta atëherë bima e grurit rrezikohet nga ngricat pasi nuk është e përgatitur për dimrin, në rastet kur kemi pasur dimër të butë nuk reflektohet shumë, pra e kemi ditur se edhe kur kemi mbjell pas afatit optimal të marrim rendimente shumë të mira kuptohet me një përkujdesje më të mirë gjatë pranverës, me riplehrime, spërkatje dhe operacione të tjera që kryhen në kulturën e grurit”, tha Isufi.

Nga Instituti Hidrometeorologjik i Kosovës, kanë njoftuar se reshje të shiut do të ketë rreth datës 20 nëntor.

Për këtë vit në territorin e Ferizajt, sipas Drejtorisë së Bujqësisë, janë paraparë të mbjellen 3 deri 4 mijë hektarë grurë.

Ferizaj

Gjatë qershorit në Ferizaj janë konfiskuar 74 motoçikleta

Published

3 days ago

02 July, 2026

Redaksia

Policia Rajonale e Ferizajt ka bërë të ditur se gjatë muajit qershor ka intensifikuar kontrollet në trafik ndaj drejtuesve të motoçikletave dhe skuterëve.

Si rezultat i këtyre kontrolleve, gjatë kësaj periudhe janë konfiskuar 74 motoçikleta, kryesisht për mungesë të dokumentacionit të rregullt derisa janë shqiptuar edhe 106 gjoba ndaj drejtuesve të motoçikletave, të cilët janë kapur duke qarkulluar në kundërshtim me rregullat dhe ligjet e komunikacionit rrugor.

Numri më i madh i gjobave janë shqiptuar për drejtim të motoçikletës pa patentë shofer, gjithsej 52 gjoba, 46 gjoba për drejtim të motoçikletës pa regjistrim dhe 8 gjoba për kundërvajtje të tjera.

Ferizaj

Prokuroria kërkon paraburgim ndaj të dyshuarës për vrasjen në Ferizaj

Published

5 days ago

29 June, 2026

Redaksia

Prokuroria Themelore në Ferizaj ka kërkuar nga Gjykata Themelore në Ferizaj, caktimin e masës së paraburgimit ndaj të pandehurës A.R., për shkak të dyshimit të veprës penale “Vrasja” sipas Kodit Penal të Republikës së Kosovës.

Sipas kërkesës së Prokurorisë, ekziston dyshimi i bazuar se me datë 28 Qershor 2026, rreth orës 22:40 në Ferizaj, rruga, “Sejdi Sejdiu”, e pandehura ka privuar nga jeta tani të ndjerin F.H., pas një mosmarrëveshje dhe përleshje fizike në mes tyre, me të cilën ka kryer veprën penale “Vrasja”, nga neni 172 të KPRK-së.

Ndërkaq, i dyshuari me iniciale M.B., që ishte ndaluar deri në sqarimin e plotë të rrethanave dhe përfshirjes së tij në rast, me aktvendim të Prokurorit të Shtetit është liruar.

Po ashtu, në këtë rast, lëndime trupore ka pësuar edhe e dyshuara A.R., të cilat dyshohet se i janë shkaktuar nga viktima- tani i ndjeri (F.H.,) për të cilat ka marr trajtim mjekësor në Qendrën Klinike Universitare të Kosovës (QKUK).

Ferizaj

Ndalohen dy persona për vrasjen e 32 vjeçarit në Ferizaj

Published

6 days ago

29 June, 2026

Redaksia

Policia e Kosovës ka dhënë detaje lidhur me vrasjen që ka ndodhur mbrëmë rreth orës 22:50, në një banesë në rrugën “Sejdi Sejdiu”në Ferizaj, ku një person ka humbur jetën dhe dy të tjerë janë ndaluar për 48 orë.

Viktima është identifikuar me inicialet F.H., 32 vjeç, ndërsa vdekja e tij është konstatuar në vendin e ngjarjes nga ekipi mjekësor.

“Gjatë ekzaminimit të vendit të ngjarjes është konstatuar një plagë që dyshohet se është shkaktuar nga arma e zjarrit. Në vendngjarje janë gjetur dhe sekuestruar një pistoletë dhe një gëzhojë.

Nga hetimet fillestare rezulton se ngjarja ka ndodhur në banesën e M.B. (48 vjeç), ku në momentin e incidentit ndodheshin aty bashkëshortja, si dhe vajza e tij A.R. (24 vjeçe). Kjo e fundit ka pësuar lëndime trupore dhe është dërguar për trajtim mjekësor në Qendrën Klinike Universitare të Kosovës (QKUK).

Pas ekzaminimit të vendit të ngjarjes, ekziston dyshimi i bazuar se rasti ndërlidhet me veprën penale “Vrasje e rëndë”.

Me vendim të prokurorit të rastit, i dyshuari M.B. është ndaluar për 48 orë. Po ashtu, edhe ndaj A.R. është lëshuar vendim për ndalim prej 48 orësh, mirëpo ajo vazhdon të mbetet nën trajtim mjekësor në QKUK.

Trupi i pajetë i viktimës është dërguar në Institutin e Mjekësisë Ligjore në Prishtinë për obduksion.

Sektori i Hetimeve Rajonale, në koordinim dhe autorizim të prokurorit të shtetit, është duke ndërmarrë veprime intensive hetimore për zbardhjen e plotë të rrethanave të këtij rasti”, thuhet mes tjerash në njoftimin e Policisë.