Ferizaj

Mosardhja në seancë kursim i parave, thotë PDK

Published

8 years ago

13 November, 2018

Seanca e jashtëzakonshme e Kuvendit Komunal të Ferizajt e thirrur nga opozita për të diskutuar për projektin “Bashkimi i Qytetit”, nuk zgjati as 3 minuta. Menjëherë pas numërimit të anëtarëve që në sallë ishin vetëm 19, kryesuesja e Kuvendit Kristina Gashi-Bytyqi, e mbylli seancën në mungesë kuorumi.

Kjo ngjalli pakënaqësi tek opozita, e cila e konsideroi këtë mosllogaridhënie të pushtetit për projekte me rëndësi për qytetarët.

“Është një fitore e opozitës pasi mungesa e kuorumit tregon për mungesën e pozitës për të qenë transparent dhe llogaridhënës. Absolut nuk kemi pasur qëllim që t’i bëjmë dikujt kritika të pa vend, por argumentimin e projektit që mendojmë se i tejkalon caqet dhe interesat e kësaj gjenerate, por pa marrë parasysh opozita nuk mjafton që ta krijoj kuorumin, ju e dini që ka edhe sjellje brenda pozitës që sillen herë si pozitë herë si opozitë, ata kanë konfirmuar se do të jenë të pranishëm në seancë, por pushteti i ka instrumentet e veta që mund t’i josh apo edhe t’i pengoj që të marrin pjesë në seancë”, tha Muharrem Svarqa nga LDK.

“Gjatë gjithë kohës kemi thënë se ky projekt është përcjell me mungesë të transparencës dhe llogaridhënies dhe dështimi i kësaj seance të sotme të thirrur nga ana e opozitës dhe të një kandidati të pavarur veç sa e konfirmon edhe një herë se pozita nuk është e gatshme të përballet me asamblistët dhe qytetarët që të jep informata rreth këtij projekti që është fontan për ne asamblistët që jemi të zgjedhurit e popullit, por gjithsesi edhe për qytetarët e Ferizajt. Mungesa e gatishmërisë që të jenë në seancë kryetari i komunës dhe ekzekutivi që të bëjë shpalosjen e këtij projekti tregon më së miri se është një projekt para dështimit dhe nuk e kanë gatishmërinë që të përballen me opozitën”, tha Enver Haliti nga LVV.

Kurse, shefi i grupit të asamblistëve të PDK-së Arian Imeri, mospjesëmarrjen në seancë e arsyetoi me kursim të buxhetit të komunës.

“Ironike fakti që ne me organizu një seancë të jashtëzakonshme e cila ka me u kushtu tatimpaguesve 10 mijë euro sa kushton pak a shumë një seancë me meditje, transmetime live që shkon, prandaj nuk shoh ndonjë arsyetim pse me u bë tërë ato shpenzime për një projekt që ka qenë transparent dhe një projekt që është duke ndodhur në qendër të qytetit dhe gjithë asamblistët që kalojnë aty pari e shohin këtë projekt, qëllimi nuk është aty, mendoj se qëllimi që e kanë thirrë seancën se fundja janë të njëjtit që kanë qenë edhe kundër projektit të spitalit e varrezave, pra tendenca është që me i zbeh projektet që po ndodhin gjatë këtij ekzekutivi, prandaj ne normal që nuk kemi marrë pjesë”, tha Arian Imeri nga PDK.

Ndërsa, drejtori i Urbanizmit Lulzim Aliu, theksoi se punët që po i kryen qeveria lokale po i pengojnë opozitës, e cila, sipas tij, në çdarëdo mënyre po mundohet t’i ndërprej ato.

“Kjo gjendje e opozitës mund të përmbledhet me një fjalë, frikë e panikë dhe kjo është panikë nga suksesi ynë, nga suksesi i kësaj qeverisje lokale të prirë nga kryetari Aliu, mund të jetë edhe e kuptueshme kjo sepse suksesi ynë mund të shuaj shpresat e tyre për t’u kthyer një ditë këtu me besimin e qytetarëve ferizajas, projekti ”Bashkimi i Qytetit” do t’i jap imazh të ri qytetit dhe kjo mund të jetë e tmerrshme për ta, ne kemi qenë të përgatitur për seancë, por nuk është çështje e ekzekutivit për me u marrë me numrat në mbledhjen e Kuvendit, por vet fakti që një çështje kaq e thjeshtë mu bë temë e jashtëzakonshme me një senacë të jashtëzakonshme është bërë e qartë se kjo seancë ka qenë politike”, tha Aliu.

Duke iu përgjigjur akuzave të opozitës për jo transparencë, drejtori Aliu tha se transparenca nuk mund të vlerësohet vetëm përmes një seance të jashtëzakonshme.

“Transparenca jonë është e përditshme, por kur transparenca kërkohet me seancë të jashtëzakonshme nuk është transparencë por detyrim dhe ne po u themi se asnjë nga ata deputetët që kanë nënshkru me thirrë seancë të jashtëzakonshme asnjëri nga ta nuk është interesu për këtë projekt, asnjëherë në drejtorinë time nuk kanë kërku qasje me pa se si ka me u realizu ky projekt”, tha Aliu.

Lidhja Demokratike e Kosovës dhe Lëvizja Vetëvendosje në Ferizaj, paralajmëruan thirrjen edhe të një seance tjetër për projektin ”Bashkimi i Qytetit”.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

2 days ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

2 weeks ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”