Ferizaj

Personat me nevoja të veçanta ankohen për moszbatim të ligjit për punësim

Published

8 years ago

03 December, 2018

Ditën e personave me aftësi të kufizuara, shoqata ”Handikos” në Ferizaj e shënoi me një tryezë në të cilën u diskutua draft strategjia komunale për këtë kategori shoqërore dhe plani i veprimit. Në këtë tryezë, përveç personave me aftësi të kufizuara, morën pjesë edhe asamblistë lokal, përfaqësues të ekzekutivit, si dhe organizata të ndryshme joqeveritare. Menaxherja e shoqatës ”Handikos” në Ferizaj, Xhemile Murseli, tha se pavarësisht shumë proceseve që janë kryer në favor të kësaj kategorie, personat me nevoja të veçanta kanë ende të drejta që nuk i gëzojnë, jo vetëm në Ferizaj, por në mbarë vendin.

“Vendi ynë ka shënuar në disa fusha, por ende duhet të punohet për të thënë se po arrihen të plotësohen të drejtat e personave me aftësi të kufizuara. Ligjet ekzistuese kanë hasur në moszbatueshmëri të plotë, disa prej tyre vlerësohen mos të jenë adekuate, nuk ka harmonizim të ligjeve e disa të tjera nuk gjejnë zbatim për shkak të mungesës së akteve nënligjore, si për shembull është ligji i punësimit, i cili s’ka gjetur fare zbatim”, tha Murseli.

Për ta krijuar një databazë për numrin dhe gjendjen e personave me aftësi të kufizuara në komunën e Ferizajt, shoqata ”Handikos” po ndihmohet financiarisht nga USAID-i, ku këtë projekt do ta zbatoj organizata ATRC.

“Në kuadër të shumë përparimeve që janë shënuar, megjithatë kemi shumë e shumë kërkesa që duhet të adresohen. Në nivel të Kosovës mungon një bazë e të dhënave e saktë se sa është numri i personave me aftësi të kufizuara, kush është kategorizimi i tyre dhe në bazë të këtij kategorizimi të bëhet edhe mbështetja financiare e ofruar nga institucionet komunale“, tha përfaqësuesi i ATRC.

E, derisa kryetari i komunës së Ferizajt nuk mori pjesë në këtë tryezë pavarësisht ftesës që kishte, zotimet dhe angazhimet e nivelit lokal për këtë kategori të shoqërisë i prezentoi kryesuesja e Kuvendit Kristina Gashi-Bytyqi. Ajo tha se që nga ardhja në pushtet kjo qeveri është angazhuar në maksimum për këtë kategori.

“Ne e kemi marrë këtë përgjegjësi dhe tash këtë draft strategji jemi duke e kthyer në dokument zyrtar i cili do të shërbej në cilësinë e jetës dhe krijimin e një shoqërie gjithpërfshirëse. Kjo strategji do të jetë e rëndësishme për komunën e Ferizajt dhe më vjen mirë që do të jemi si model për komunat e tjera të rajonit për të siguruar që të gjitha parimet e Konventës së Kombeve të Bashkuara për të drejtat e personave me aftësi të kufizuara, si dhe ligjet dhe politikat e Republikës së Kosovës janë të inkorporuara në aktivitete dhe veprime përmes të cilave do të respektohen të drejtat e kësaj kategorie”, tha Gashi-Bytyqi.

Sipas të dhënave që posedon shoqata “Handikos” aktualisht në komunën e Ferizajt janë mbi 900 persona me aftësi të kufizuara, ku këtu sipas kësaj shoqate, hyjnë personat me aftësi të kufizuara fizike e intelektuale, me probleme në të dëgjuar dhe të parë, por edhe të kombinuara.

Ferizaj

Gjatë qershorit në Ferizaj janë konfiskuar 74 motoçikleta

Published

5 days ago

02 July, 2026

Redaksia

Policia Rajonale e Ferizajt ka bërë të ditur se gjatë muajit qershor ka intensifikuar kontrollet në trafik ndaj drejtuesve të motoçikletave dhe skuterëve.

Si rezultat i këtyre kontrolleve, gjatë kësaj periudhe janë konfiskuar 74 motoçikleta, kryesisht për mungesë të dokumentacionit të rregullt derisa janë shqiptuar edhe 106 gjoba ndaj drejtuesve të motoçikletave, të cilët janë kapur duke qarkulluar në kundërshtim me rregullat dhe ligjet e komunikacionit rrugor.

Numri më i madh i gjobave janë shqiptuar për drejtim të motoçikletës pa patentë shofer, gjithsej 52 gjoba, 46 gjoba për drejtim të motoçikletës pa regjistrim dhe 8 gjoba për kundërvajtje të tjera.

Ferizaj

Prokuroria kërkon paraburgim ndaj të dyshuarës për vrasjen në Ferizaj

Published

1 week ago

29 June, 2026

Redaksia

Prokuroria Themelore në Ferizaj ka kërkuar nga Gjykata Themelore në Ferizaj, caktimin e masës së paraburgimit ndaj të pandehurës A.R., për shkak të dyshimit të veprës penale “Vrasja” sipas Kodit Penal të Republikës së Kosovës.

Sipas kërkesës së Prokurorisë, ekziston dyshimi i bazuar se me datë 28 Qershor 2026, rreth orës 22:40 në Ferizaj, rruga, “Sejdi Sejdiu”, e pandehura ka privuar nga jeta tani të ndjerin F.H., pas një mosmarrëveshje dhe përleshje fizike në mes tyre, me të cilën ka kryer veprën penale “Vrasja”, nga neni 172 të KPRK-së.

Ndërkaq, i dyshuari me iniciale M.B., që ishte ndaluar deri në sqarimin e plotë të rrethanave dhe përfshirjes së tij në rast, me aktvendim të Prokurorit të Shtetit është liruar.

Po ashtu, në këtë rast, lëndime trupore ka pësuar edhe e dyshuara A.R., të cilat dyshohet se i janë shkaktuar nga viktima- tani i ndjeri (F.H.,) për të cilat ka marr trajtim mjekësor në Qendrën Klinike Universitare të Kosovës (QKUK).

Ferizaj

Ndalohen dy persona për vrasjen e 32 vjeçarit në Ferizaj

Published

1 week ago

29 June, 2026

Redaksia

Policia e Kosovës ka dhënë detaje lidhur me vrasjen që ka ndodhur mbrëmë rreth orës 22:50, në një banesë në rrugën “Sejdi Sejdiu”në Ferizaj, ku një person ka humbur jetën dhe dy të tjerë janë ndaluar për 48 orë.

Viktima është identifikuar me inicialet F.H., 32 vjeç, ndërsa vdekja e tij është konstatuar në vendin e ngjarjes nga ekipi mjekësor.

“Gjatë ekzaminimit të vendit të ngjarjes është konstatuar një plagë që dyshohet se është shkaktuar nga arma e zjarrit. Në vendngjarje janë gjetur dhe sekuestruar një pistoletë dhe një gëzhojë.

Nga hetimet fillestare rezulton se ngjarja ka ndodhur në banesën e M.B. (48 vjeç), ku në momentin e incidentit ndodheshin aty bashkëshortja, si dhe vajza e tij A.R. (24 vjeçe). Kjo e fundit ka pësuar lëndime trupore dhe është dërguar për trajtim mjekësor në Qendrën Klinike Universitare të Kosovës (QKUK).

Pas ekzaminimit të vendit të ngjarjes, ekziston dyshimi i bazuar se rasti ndërlidhet me veprën penale “Vrasje e rëndë”.

Me vendim të prokurorit të rastit, i dyshuari M.B. është ndaluar për 48 orë. Po ashtu, edhe ndaj A.R. është lëshuar vendim për ndalim prej 48 orësh, mirëpo ajo vazhdon të mbetet nën trajtim mjekësor në QKUK.

Trupi i pajetë i viktimës është dërguar në Institutin e Mjekësisë Ligjore në Prishtinë për obduksion.

Sektori i Hetimeve Rajonale, në koordinim dhe autorizim të prokurorit të shtetit, është duke ndërmarrë veprime intensive hetimore për zbardhjen e plotë të rrethanave të këtij rasti”, thuhet mes tjerash në njoftimin e Policisë.