Ferizaj

Avokati i Popullit: Komuna shkel ligjin për qasje në dokumente publike

Published

7 years ago

06 December, 2018

Avokati i Popullit ka konstatuar se komuna e Ferizajt ka shkelur Kushtetutën dhe Ligjin për Qasje në Dokumente Publike, me rastin e një kërkese që organizata INPO e kishte bërë qysh në qershor të këtij viti për qasje në dokumente zyrtare, ndërkaq komuna asnjëherë nuk i kishte kthyer përgjigje. Në një raport me rekomandime, Avokati i Popullit i rekomandon komunës së Ferizajt ta shqyrtojë kërkesën e organizatës INPO të datës 4 qershor 2018 për qasje në dokumente publike dhe të përgjigjet në përputhje me ligjin, si dhe të ndërmarrëë hapa për ngritjen e kapaciteteve të zyrtarëve publik lidhur me zbatimin e Ligjit për Qasje në Dokumente Publike. Para gjashtë mujave, INPO kishte bërë kërkesë për lejet e ndërtimit për periudhën 12 mujore të vitit 2017, si dhe për lejet e lëshuara për periudhën janar-korrik 2018.

“Rrjedhimisht ne asnjëherë s’kemi marrë përgjigje nga komuna lidhur me kërkesën tonë dhe ligji e parasheh që heshtja ndaj kërkesës për qasje në dokumente publike nga institucioni publik do të thotë refuzim i kërkesës. Në këtë drejtim INPO ka bërë kërkesë për t’i ndihmuar edhe Avokati i Popullit dhe kësisoj avokati i ka kthyer përgjigje edhe komunës edhe neve si palë. Komuna i është përgjigjur avokatit se informacionet dhe lejet që i ka kërkuar organizata INPO janë të qasshme dhe të publikuara në faqën e komunës, por ne si INPO kemi hedhur poshtë pretendimet e komunës së Ferizajt gjithmonë duke u bazuar në fakte dhe argumente, ku kemi argumentuar se komuna në muajin gusht e pati publikuar një listë të lejeve të ndërtimit, por ajo ka qenë e mangët dhe nuk i ka i përmbajtur të gjitha informacionet”, u shpreh Albulena Nrecaj nga INPO.

Në anën tjetër, zyrtarë ligjor të komunës së Ferizajt konsiderojnë se me moskthimin e përgjigjes për kërkesën që kishte bërë INPO për qasje në dokumente zyrtare, qeveria lokale nuk ka shkelur ligje. Ndërkaq për vonesën e përgjigjes prej gjashtë muajsh, zyrtarët komunal arsyetohen se pushteti lokal nuk ka resurse njerëzore për t’i kthyer përgjigjet kaq shpejt.

“Sa i përket rekomandimit të Avokatit të Popullit ne e kemi marrë dhe e kemi shqyrtuar dhe nuk thotë se ka shkelje të ligjeve dhe Kushtetutës veçse na paralajmëron se ne duhet t’i kthejmë përgjigje për dokumente zyrtare çdoherë qyetarëve dhe OJQ-ve. Por, duhet të kihet parasysh po ashtu se edhe tek OJQ-të edhe tek kushdo që kërkon qasje në dokumente publike, komuna nuk mundet shpeshherë me iu përshtat agjendave të tyre, pasi që komuna ka angazhime të shumta dhe në afatet ligjore ligji parasheh edhe përjashtime”, tha Liridon Jetishi.

Drejtues të organizatës INPO, kanë vlerësuar se pushteti i Ferizajt me pompozitet është shprehur që qeverisja Aliu ka prioritet transparencën, por sipas tyre, pikërisht ky pushtet gjatë këtij viti qeverisës për qasje në dokumente zyrtare ka miratuar edhe një taksë e cila qytetarëve iu kushton 5 euro.

“Tentimi apo iniciativa për të vendosur taksë për kërkesa në qasje për dokumente publike e tregon një lloj mosgatishmërie të institucionit për me ofru qasje në dokumente publike. Në anën tjetër në shumë shtete evropiane janë anuluar këto tarifa për shkak që është konsideruar se letra, ngjyra apo gjithë ato materiale të tjera me të cilat funksionon administrata komunale blihen përmes taksave të qytetarëve“, tha Nrecaj.

Ndryshe, përveç kërkesës për lejet ndërtimore, INPO gjatë këtij viti ka bërë edhe kërkesa të tjera për qasje në dokumente publike, për të cilat afatet kohore të përcaktuara me ligj tashmë kanë kaluar, por pushteti nuk ka kthyer përgjigje akoma.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

2 days ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”