Ferizaj

”Pjetër Bogdani”, shkolla që po aftëson nxënësit për tregun e punës

Published

7 years ago

14 December, 2018

Operator i makinave me dirigjim kompjuterik, automekanik, instalues elektrik, instalues i ngrohjes dhe i ujit, janë vetëm disa nga profilet në të cilat po aftësohen nxënësit e shkollës së mesme teknike “Pjetër Bogdani” në Ferizaj.

Drejtori i kësaj shkolle profesionale Isuf Çalaj, tha se kjo shkollë është pasuruar edhe më shumë me pajisje mekatronike të cilat i kanë përfituar nga projekti ALLEG, i financuar nga Komisioni Evropian dhe i bashkëfinancuar dhe implementuar nga Bashkëpunimi Austriak për Zhvillim, nga të cilat pajisje nxënësit pas përfundimit të shkollës së mesme janë të gatshëm për tregun e punës.

“Këto pajisje që i kemi marrë donacion, është një linjë teknologjike e cila bënë transferin e produktit nga një vend në tjetrin, po ashtu bëjnë klasifikimin në bazë të ngjyrës e sasisë, mësimdhënësit kanë ndjekur trajnimet dhe janë të kyçur mjaftë mirë, këtu përfitohet shumë pavarësisht se janë makina gjysmë shkollore dhe gjysmë industriale, mirëpo programi është i njëjtë, nxënësit të cilët dëshirojnë të marrin dije mjafton ta mësojnë programin dhe ata do të jenë të mirëpritur kudo qoftë”, tha Çalaj.

Megjithatë, shqetësim për këtë shkollë vazhdon të mbetet interesimi i ulët i nxënësve për të qenë pjesë e saj.

“E keqja tek ne është se profilet që i kemi hapur tani na duhet një elitë e nxënësve që na vijnë me një përgatitje nga shkolla fillore, kurse e keqja është se kemi nxënës jo të përgatitur siç duhet, ka makina që janë të ndjeshme dhe mund të dalin nga programi, por për momentin mësimdhënësit po janë shumë të kujdesshëm. Kisha apeluar që të vetëdijësohemi të gjithë si prindërit fëmijët, institucionet, pasi me të vërtetë janë profile që i duhen Kosovës, janë profile direkte që kyçen në prodhim”, tha Çalaj.

Basri Kamberi, profesor në shkollën teknike të Ferizajt, tha se nxënësit të cilët vijojnë mësimet në këto profile, e kanë të sigurtë punësimin.

“Këto janë makina me dirigjim kompjuterik apo CNC, janë makina që punojnë në mënyrë automatike në bazë të programit që përgatitet paraprakisht, kjo makinë shërben për përpunimin e metalit, këto makina përdoren në shtetet evropiane dhe janë makina që përdoren nëpër fabrika me kapacitete të mëdha, pas tri viteve nëse nxënësit dojnë me mësu munden me qenë të gatshëm për tregun e punës dhe me punu me makina të këtyre llojeve në fabrika të ndryshme, kryesisht në industritë metalike, në industritë e përpunimit të drurit, e të tjera”, tha Kamberi.

Kurse, nxënësit thanë se shpresojnë që pas përfundimit të shkollës të arrijnë të punësohen.

“Ne me këto makina po krijojmë shumë gjëra, lënda është e mirë, shpresoj që në të ardhmen të punësohemi në fabrika”, tha Bleron Ademi.

“Në fillim na është dukur shumë program i rëndë, por tani e kemi përvetësuar mjaftë shumë”, tha një tjetër nxënës.

“Jam në drejtimin e instalimit të ngrohjes dhe klimatizimit, këtu bëjmë montimin e pompave, kemi bërë edhe ngrohjen me nxemje qëndrore këtu në punëtori, e kemi bërë bashkë me profesorin, është drejtim shumë i mirë”, tha Freskim Lohaj.

Në shkollën teknike “Pjetër Bogdani”, ekzistojnë katër drejtime: makineri, elektroteknikë, komunikacion dhe ndërtimtari.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

2 days ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”