Ferizaj

Më 21 dhjetor ndahet çmimi ”Sportisti i Vitit”

Published

7 years ago

18 December, 2018

Datën 21 dhjetor Drejtoria e Kulturës, e Rinisë dhe e Sportit në Ferizaj, e ka përzgjedhur si datën kur do të shpallet ”Sportisti i Vitit” në këtë komunë. Drejtoresha e kësaj drejtorie Xhemile Murati-Shabani, shqetësuese e konsideroi mungesën e një rregulloreje të veçantë e cila do të përcaktonte kriteret për përzgjedhjen e sportistit të vitit.

“Te sportisti i vitit janë kritere të caktuara nga këshilli profesional, nuk kemi rregullore të posaçme, është i caktuar çmimi në rregulloren për dhënien e dekoratave, mirëpo nuk janë në mënyrë të mirëfilltë të caktuara kriteret se si duhet të bëhet zgjedhja e sportistit të vitit në mënyrë që mos t’u mbetemi borxh klubeve sportive dhe sportistëve në Ferizaj, është dashur që bashkërisht me këshillin t’i japim propzimet e tyre dhe të caktohen kriteret duke u bazuar në rregulloret e ndryshme të Komitetit Olimpik dhe rregulloret e tjera të sportit dhe të caktohen kriteret të cilat do të japin një vlerësim më të drejtë”, tha Murati-Shabani.

Pas përzgjedhjes së ”Sportistit të Vitit”, më 28 dhjetor do të ndahet çmimi “Finesa”. Për të gjithë artistët e interesuar, afati për aplikim do të jetë i hapur deri më 21 dhjetor.

“Sa i përket dhënies së çmimit “Finesa”, Drejtoria e Kulturës ka dalë me një konkurs për aplikim për artistët rezident dhe jo rezident të Ferizajt por që veprimtarinë e tyre e kryejnë këtu, kjo nënkupton që të gjithë mund të aplikojnë deri më datën 21 dhjetor kur është data e fundit që artistët mund t’i sjellin aplikmet e tyre. Rregullorja për dhënien e dekoratave konkretisht tek çmimi “Finesa” e jep një shumë të caktuar deri në vlerën 3 mijë euro, ndërsa me vendimin e kryetarit do ta përcaktojmë shumën për këtë çmim”, tha ajo.

Murati-Shabani, tha se tashmë kanë përzgjdhur edhe komsionin i cili do të bëj vlerësimin e artistëve, duke theksuar se janë përpjekur që ai të jetë gjithpërfshirës.

“Ne jemi munduar që të jenë njerëz të cilët kanë ndikim drejtpërdrejtë në kulturën e Ferizajt dhe që do të japin një vlerësim të drejtë, ne e kemi përzgjedhur një komision që mendojmë se është mjaftë i qëlluar, ky komision është i përbërë nga Sabri Pajaziti nga Drejtoria e Kulturës, mandej nga Ansambli i Këngëve dhe i Valleve “Kastriotët” është Astrit Mustafa, pastaj është Lindita Isufi nga Orkestra e Qytetit, Albulena Nrecaj nga shoqëria civile, Shqipe Ademi nga klubi i gazetarëve “Haki Braha”, Pranvera Sylejmani nga Shoqata e Artistëve Figurativ “Zef Kolombi” dhe Bardhyl Abazi përfaqësues i shkollës së Arteve “Çesk Zadeja”, unë po konsideroj që ky komision do të jetë shumë i përgjegjshëm, po ashtu kemi artistë të mjaftueshëm që këtë vit kanë treguar mjaftë rezultate”,tha Murati-Shabani.

Vitin e kaluar sportisti më i mirë për vitin 2017 në Ferizaj ishte zgjedhur volejbollisti Edmond Drenogllava i skuadrës “Luboteni”, ndërsa çmimi “Finesa” i ishte ndarë aktorit Shpëtim Selmani.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

2 days ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”