Ferizaj

Kërkohet respektim i të drejtave të punëtorëve të ”Viva Fresh Store”

Published

7 years ago

19 December, 2018

“8 orë punë”, Respekt për punëtorët”, janë komentet e shumta të cilat kanë vërshuar faqen zyrtare të ”Viva Fresh Store”, në postimet e ofertave që ky rrjet i marketeve i ka bërë në llogarinë e tij në facebook. Përmes fushatës e cila pason atë që iu bë përfaqësueses së lartë të Bashkimit Evropian Federica Mogherini, pas deklaratës së saj kundër taksës që Kosova ia ka vënë Serbisë, kërkohet respektimi i të drejtave të punëtorëve që janë të punësuar në ”Viva Fresh Store”. Drejtori i marketingut në “Viva Fresh Store” Erton Bega, thotë se kjo fushatë është inicuar nga një portal, të cilin, sipas tij, ky rrjet i marketeve ka refuzuar ta financoj.

“Është një kampanjë e inicuar nga një portal i cili në mungesë të qëllimeve financiare ka filluar të inskenoj situata kinse në kompaninë tonë nuk respektohen të drejtat e punëtorëve, unë mund të deklaroj se të gjithë punëtorët që ne i kemi janë me kontrata pune sipas ligjit në fuqi dhe për të gjitha angazhimet që marrin qoftë në kuadër të rregullt, qoftë nga orari shtesë ata paguhen ose iu kompensohen me ditë të lira, kështu që deri tani ne nuk kemi asnjë kontest ligjor ku ne kemi bërë ndonjë shkelje apo nuk i kemi respektuar të drejtat që i garanton ligji i punës, por nisma të tilla ndaj korporatave në Kosovë ka shumë nga portalet që janë bërë shumë dhe e kemi të pamundur që t’i mbulojmë të gjitha mediat që ekzistojnë në Kosovë, prandaj janë këto probleme, por ne jemi adaptuar dhe nuk është se i kushtojmë rëndësi shumë”, tha Bega.

Bega këmbëngul se të drejtat e punëtorëve në ”Viva Fresh Store” respektohen ashtu siç parashihet me Ligjin e Punës.

“Vazhdimisht të gjitha politikat tona të cilat lidhen me punësimin dhe rekrutimin dhe mbajtjen e punëtorëve bëhen sipas ligjit në fuqi dhe akteve nënligjore dhe nuk kemi asnjë rast që është kontestuar apo është dokumentuar ndonjë shkelje nga institucionet relevante. Para festave rritet puna dhe ka dy zgjidhje që mbulohen nevojat e shtuara të kompanisë para festave, është përmes shtimit të punëtorëve jo të rregullt që angazhohen në ditë ose rritjes së orarit të punës që kompensohet përmes pagesës ose përmes kompensimit me ditë të lira, sigurisht që para festës orari punës do të zgjatet, por do të bëhet kompensimi siç e parasheh ligji i punës, është çudi të mendohet se një kompani e madhe me kaq shumë dyqane dhe punëtorë mund ta shkel ligjin në këtë formë siç pretendohet nëpër portale të caktuara, por ne nuk kemi çka bëjmë, ndihemi të shantazhuar, nuk funksionon rendi dhe ligji dhe këtu është problem që kushdo mund të shkruaj çka të dojë, por në fund janë konsumatorët ata që vlerësojnë, janë punëtorët dhe familjet e atyre punëtorëve që e dinë se punëtorët paguhen dhe çdo veprim që ne ndërmarrim në raport me punëtorët është i bazuar në ligj”, tha Bega.

Sipas drejtorit të marketingut Erton Bega, në rrjetin e marketeve të ”Viva Fresh Store” në të gjithë Kosovën, janë të punësuar rreth 2 mijë e 500 punëtorë.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

2 days ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”