Ferizaj

Grainca pjesë e grupit të organizuar kriminal, deklaron dëshmitari Haliti

Published

7 years ago

21 December, 2018

Seanca gjyqësore ndaj ish-drejtorit të Urbanizmit Faik Grainca, e nisur muaj më parë, i cili akuzohet për kepërdorim të detyrës zyrtare dhe falsfikim në rastin e rrugës “Astrit Bytyqi”, ka vazhduar edhe sot në Gjykatën Themelore të Ferizajt.

Dëshminë e tij në cilësinë e të dëmtuarit e ka vazhduar Bekim Haliti, banor i rrugës “Astrit Bytyqi”, i cili deklaroi se i bashkëngjitet ndjekjes penale derisa Grainca të jep përgjegjësi për veprat që ka kryer dhe të tregojë se si është arritur të krijohet një peticion me 160 nënshkrime. Ai në gjykatë deklaroi se me Graincën bashkëkryes të veprës penale janë edhe njerëz të cilët kanë ndikim në nivelin qëndror.

“Deklaroj se i akuzuari Faik Grainca për përfitime personale ka kryer kepërdorim të detyrës zyrtare, mashtrim dhe falsifikim të dokumentit që nga fillimi i mandatit të tij si drejtor në komunën e Ferizajt, ka bërë propozime të vendimeve në Kuvend Komunal në kundërshtim me legjislacionin në fuqi, në bashkëkryerje ka bërë falsifikim të dokumenteve të komunës së Ferizajt, ka nxjerr vendime për leje ndërtimore në mënyrë te kundërligjshme dhe në kundërshtim me planet rregulluese ku më vonë disa i ka anuluar, ndërsa disa të tjera asnjëherë. Ka bërë aprovim të peticionit të falsifikuar edhe pse disa herë ka qenë i njoftuar, ndërsa ka refuzuar peticionin legjitim të banorëve, ka cenuar të drejtën pronësore të pronës së paluajtshme të qytetarëve, ka bërë nxitje, ka krijuar situata konflikti mes banorëve dhe krejt në fund i akuzuari nuk i ka kryer vet këto, por ka ekzistuar një rrjet kriminal në fushën e ndërtimit ku kanë qenë të involvuar edhe njerëz me ndikim dhe njerëz në qeverinë qëndrore apo në minisitritë e caktuara deri në kryeministri”, tha Haliti.

Kurse, për dy të akuzuarit e tjerë, Haliti tha se Izer Ramadani, sipas tij, nuk ka ndonjë faj, kurse për Arben Kurteshin tha se ka përgjegjësi penale.

“Kundër të akuzuarit nuk i bashkëngjitem ndjekjes penale, sepse mendoj se ai ka dorëzuar një kërkesë legjitime, mirëpo atë kërkesë ia ka shndërruar në peticion Faik Grainca, kurse sa i përket të akuzuarit Arben Kurteshi mendoj se ka përgjegjësi penale dhe duhet ta sqaroj se kush e ka nxitur apo e ka detyruar që t’i bëj ato veprime, sepse Arben Kurteshi ka dorëzuar peticionin në emër të banorëve të rrugës “Astrit Bytyqi”, kurse në deklaratën e tij thotë se unë kam mbledhur nënshkrime në rrugën “7 shtatori”, mirëpo ai e ka titulluar dhe e ka dorëzuar si peticion të rrugës “Astrit Bytyqi, i cili është marrë për bazë”, tha Haliti.

Pas Halitit, në pyetje është marrë edhe Orhan Ibrahimi, banor i rrugës “Astrit Bytyqi”, i cili tha se ai që në fillim ka qenë kundër ndryshimit të destinimit nga ndërtimi i ulët në atë të lartë dhe vazhdon ta kundërshtojë një gjë të tillë, derisa theksoi se në peticionin e kundërt ka vërtetur persona të nënshkruar të cilët nuk janë pronarë të shtëpive në rrugën “Astrit Bytyqi”.

Seanca e sotme ishte e pesta me radhë në gjykimin ndaj ish-drejtorit të Urbanizmit të Ferizajt Faik Grainca, për të vazhduar më 10 janar të vitit 2019, ku do të dëgjohen dëshmitarët e Prokurorisë.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

2 days ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”