Ferizaj
Ela me mantel të bardhë
Po ngjitet shkallëve të ordinancës, për të ardhur në vizitë të rregullt tek stomatologu. Por, 18 vjeçaren Eloida Alija nga Ferizaj, e cila është e prekur me sindromën down, aty po e pret një befasi.
Në ordinancën “Briliant Dent”, Eloidën e befasuan familjarët dhe miqtë e saj, të cilët ishin mbledhur aty, porse akoma nuk dihej arsyeja. Befasia më e madhe për Elën ndodhi kur pronari i ordinancës, stomatologu Burim Buzhala, i solli asaj një mantel të bardhë së bashku me një letër. Kjo letër me siguri se kësaj zonjushe do t’ia ndryshojë jetën përgjithmonë.
Ishte kjo kontrata e punës për Eloidën, e cila tashmë nuk po mund të përmbahej nga gëzimi. Pasi nënshkroi dokumentin juridik të punësimit, Ela mantel- bardhë, i përshkruan ndjenjat me rastin e punësimit të saj të papritur:
“Kam emocione, nuk e kam ditur për këtë befasi, jamë shumë e lumtur, gjithmonë kam pas dëshirë të jem mjeke” – thotë 18 vjeçarja nga Ferizaj.
Sot ishte një ditë gëzimi edhe për Indirën, nënën e Eloidës, e cila plot me emocione e përshkruan këtë iniciativë të stomatologut Buzhala, duke treguar se këtë befasi e kishte mbajtur në fshehtësi, dhe se Ela nuk e ka ditur se sot do të ishte dita e parë e punësimit të saj si infermiere:
“Hera e parë erdhëm për një kontroll dhe doktori filloi ta pëlqej Eloidën, dhe një ditë më thirri në telefon dhe më tha që po dua ta punësoj Eloidën. Ai moment ka qenë gëzim i veçantë për familjen tonë. Është moment që nuk e kemi përjetuar asnjëherë. Ajo është shumë e lumtur nuk e ka ditur deri sot, ka shumë emocione por po shihet se ia ka dalë” – tha Indira Alija, nëna e Eloidës.
Alija, shprehet me kritikë ndaj institucioneve, pasiqë sipas saj, kjo kategori ka mbetur e papërfaqësuar në sistemin publik të punësimit, mirëpo shpresë e madhe për ta mbeten personat e guximshëm dhe njerëzit e mirë sikurse doktor Buzhala:
“Jeta është shumë sfiduese për personat me nevoja të vecanta, por më e keqja është se nuk kemi asnjë përkrahje nga shteti, jeta është shumë sfiduese, por ne po mundohemi me i tejkalu të gjitha, përderisa ka persona të mirë si doktor Burimi. Ky le të jetë një mesazh për të tjerët, që kështu veprohet me personat me nevoja të veçanta, që duhet t’i ndihmojnë, e jo ti injorojnë. Kjo është ndjenja më e mirë, as që e kam menduar se Ela do të punësohet, por ja që nga një njeri i mirë mu ofrua kjo mundësi” shtoi e ëma e Elës.
Nëna e vajzës me sindromën Down, thotë se personat e kësaj kategorie janë të aftë për punë dhe se ata mund t’ia dalin në jetë:
“Nuk është turp të keshë në familje një person me nevoja të veçanta, është tmerr nga shteti që nuk na përkrahin asnjëherë, pse jo me qenë kjo kategori edhe në poste publike sepse dijnë si t’ia dalin dhe munden, por ndoshta në ditët në vijim do të reflektojnë. Kjo ngjarje sot është një mesazh i mirë për të gjithë, dhe ky mesazh le të mirret nga doktor Burimi i cili nuk e ka bërë për emër por me zemër” tha Alija.
Pronari i ordinancës “Briliant Dent”, Burim Buzhala, me pak fjalë u shpreh se është privilegj që do të ketë Eloidën në staf:
‘ Ndjehemi shumë të privilegjuar që e kemi Elën pjesë të stafit tonë, kjo është një punëtore shumë e zellshme dhe me buzëqeshjen e saj vetëm dashuri do t’u sjellë pacientëve, kështu që do ta kemi nderin ta kemi asistente” – u deklarua stomatologu zemërgjerë Burim Buzhala.
Eloida do të punojë çdo ditë nga dy orë në ditë, kurse kontrata e punës të cilën ajo e nënshkroi me ordinancën “Briliant Dent” është e përhershme dhe në pajtim me Ligjin e Punës në fuqi.
-
Ferizaj6 days agoPolicia në Ferizaj ka arrestuar një person për posedim të narkotikëve
-
Ferizaj3 days agoHumb jetën një punëtor në një objekt në ndërtim në Ferizaj
-
Kosovë1 week agoJustina Shiroka Pula inaugurohet si presidente e shtatë e Kosovës
-
Kosovë2 days agoProkuroria interviston Gani Gecin dhe Lirim Mehmetajn
-
Kosovë3 days agoAktakuzë për krime lufte në Zveçan, i dyshuari akuzohet për vrasje civilësh
-
Ferizaj2 days agoNdalohet për 48 orë një person për rastin e vdekjes të punëtorit në Ferizaj
-
Ferizaj6 days agoSiguria juaj fillon me zgjedhjen e duhur të sigurimit
-
Arbëri43 mins agoShqipëria në kaos – Protestuesit kërkojnë dorëheqjen e Ramës