Ferizaj

Ferizaj shënon 30 vjetorin e protestës së grave nga Balaj

Published

7 years ago

23 March, 2019

Sot janë bërë 30 vite që kur gratë dhe vajzat e fshatit Balaj bënë historinë, duke nisur protestat kundër suprimimit të kushtetutës dhe heqjes së autonomisë për popullin e Kosovës. Ato në mënyrë masive kishin organizuar demonstratat kundër ndryshimeve të dhunshme kushtetuese. Institucionet vendore të Ferizajt , janë përkujdesur që inciativa e tyre të shënohet në pllakë të bronztë.
Kështu sot u zbuluan dy pllaka përkujtimore të motivuara nga kjo ngjarje, njëra në fshatin Balaj e tjetra në sheshin “Adem Jashari” të Ferizajt.
Me këtë rast, në teatrin e qytetit u organizua edhe një akademi përkujtomore. Protagonistet e kësaj ngjarjeje, ndanë me të pranishmit rrëfimet e marsit të vitit 1989, ku u tha se gratë dhe vajzat shqiptare përmes atyre protestave e treguan fortësinë e identitetit të tyre shqiptar.

“Paralajmërimi i ndryshimeve kushtetuese për zhbërjen e auonomisë së Kosovës në fakt nënkuptonte zhbërjen e Kosovës dhe shkrirjen e saj mbrenda Republikës së Serbisë, prandaj dhe duhej të ndërmirrej diçka që të dërgohej mesazh i qartë se shqiptarët nuk do të pranojnë një gjë të tillë. Këto mendime më silleshin në kokën time. Duke qenë 20 vjeçare, këto mendime më shtynë që të marr diçka konkrete, dhe ashtu ndodhi. Pengesat e vendosura nga policia jo vetëm që nuk arritën t’i ndalin gratë dhe vajzat në realzimin e qëllimit të tyre, por përkundrazi na bënë më të forta dhe më të bashkuara, edhe pse e dinim se do të pasojnë hetimet dhe burgosjet, por ne ishim të gatshme të paguanim këtë çmim për kauzën tonë” tha Sanie Aliu, njëra nga nismëtaret e kësaj proteste.

“Kishte unitet që secili e kishte brenda vetes, guximi nuk ishte individual por ishte ruajtur n gjenet e gjithësecilit. U arrestuan shumë gra e vajza të fshatit, mua dhe Sanijen na bënë akuzë në bashkëveprim, hetimet i kaluam në burgun e Mitorvicës, ku dhuna fzike në trupin tonë provohej si mos më keq, mua më dënuan me 2 vite e gjysmë, ndërsa Sanijen me 2 vite. Por ne krenohemi me ju të dashura gra që na besuat dhe kundërshtuam agresorin, krenohem që përballuam tortura por nuk u luhatëm në qëndrimet tona” tha Hatmane Sallauka.

Në shënim të këtij përvjetori, pos institucioneve lokale, mori pjesë edhe kryetari i kuvendit të Kosovës, Kadri Veseli, i cili tha se këto demonstrata ishin shkëndijat e para të një zgjimi masiv kombëtar në Kosovë, kundër ndryshimeve të dhunshme kushtetuese.

“Derisa aspirata jonë kombëtare ishte avancimi i statusit politik të Kosovës, Serbia kërkonte të na hiqte edhe atë autonomi që kishim fituar në vitin 1974, pas 30 vjet shtypjeje e diskriminimi nën Jugosllavinë titiste. Po fillonte përballja e madhe me Serbinë. E gjithë Kosova ishte gati të ngrihej. Dhe të parat u ngritën nënat kosovare. U ngritët ju, me guxim e ndjenjë sakrifice për t’i thënë jo agresionit serb mbi Kosovën“, tha kryeparlamentari Veseli.

Ndërsa nënkryetari i komunës Naim Ferati, u shpreh se heroizmi i këtyre vajzave dhe grave, do të jetë i ekspozuar në zemër të qytetit.

“Tash e tutje Ferizaj do të ketë në zemrën e tij edhe pllakën përkujtimore të skalitur me shkronja të arta heroizmin e grave të Balajve dhe të Ferizajt. S’ka si mos të ndihesh mirë që në sheshin e qytetit tonë që mban emrin e komandantit legjendar dhe pranë shtatores së heroit Rexhep Bislimi, tani kemi vendosur edhe pllakën përkujtimore e cila shënon demonstratat e marsit, që njihen si demonstratat e grave të Balajve’ – tha Ferati.

Në kuadër të akademisë përkujtimore për demonstratat e grave nga Balaj, u shfaq edhe një program i shkurtë artistik me artistë nga skena shqiptare.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

3 days ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

4 days ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”

Ferizaj

Sekuestrohet një revole me municion dhe shurdhues në Ferizaj

Published

1 week ago

04 May, 2026

Redaksia

Një person është shoqëruar në stacionin policor në Ferizaj pas një kontrolli në shtëpinë e tij, ku janë gjetur dhe sekuestruar një pistoletë me gaz, pesë fishekë dhe një shurdhues i armës së zjarrit.

Në raportin 24 orësh të policisë bëhet e ditur se rasti ka ndodhur mëngjesin e së dielës, më 3 maj 2026, rreth orës 8:30 në rrugën “Gucia” në Ferizaj .

Me vendim të prokurorit pas intervistimit, rasti vazhdon të hetohet në procedurë të rregullt.