Ferizaj

Për 3 muaj 100 persona marrin këshilla në qendrën ”Këshillimi”

Published

7 years ago

28 October, 2019

Personat e varur nga droga tashmë kanë një qendër këshilluese në Ferizaj. Arjeta Musliu, e cila me profesion është psikologe, ka disa muaj që ka hapur një qendër këshilluese falas për këta persona, e që interesimi, sipas saj, fatkeqësisht po del të jetë shumë i lartë.

“Numri ka kalur shifrën 100 për 3 muaj, është numër i madh, nuk është për me u krenu. Kemi moshë 13 vjeçare që ka filluar disa muaj me përdor, është marihuana, pastaj lajmi më i dhimbshëm është se para 2 jave në qendër kam pas të moshës 10 vjeçare është i komunës së Ferizajt dhe kjo është pa koment“, tha Musliu.

Musliu, thotë se po arrijnë rezultate të mira në vetëdijësimin e personave të varur nga droga.

“Kemi 4 persona që kanë abstenuar të përdorin substancat, jemi në kontakt, vazhdojnë terapitë, u është kthyer buzëqeshja, u është kthyer realiteti dhe kjo na gëzon që suksesi po ndodhë dhe na jep forcë me vazhdu tutje“, tha Musliu.

Megjithatë, shqetësim për të është mosprezena e prindërve nëpër seanca.

“Në qendrën tonë zhvillojmë psikoterapinë grupore me përdorues dhe me prindër, është për t’u diskutuar si temë që prezenca e baballarëve thuajse nuk është prezente aspak, mbi 100 raste që i kemi pasur deri tani kemi takuar vetëm 4 baballarë dhe kjo është shqetësuese”, tha Musliu.

Për të pasur edhe më shumë sukses në ndalimin e kësaj dukurie, Musliu thotë se muajin nëntor do ta shpallin muaj të sensibilizimit kundër kësaj dukurie tejet negative.

“Jemi mobilizuar në këtë pjesë, do të fillojmë më 1 nëntor do të mbajmë një konferencë me të gjithë akterët për të shpalosur këtë temë që është alarmante dhe për të arritur edhe rekomandime që të dalim nga kjo gjendje, më pas më 4 nëntor do të organizojmë një marsh dhe nga marshi të nesërmen do të fillojmë me ligjërata nëpër shkolla dhe nuk do të jenë vetëm shkollat e qytetit, por edhe të fshatrave dhe me këtë ta bëjmë informimin e duhur tek rinia që është e pa prekur“, tha Musliu.

Drejtoresha e kësaj qendre tha se aty ndihmë kanë kërkuar jo vetëm qytetarë të Kosovës, por edhe të Shqipërisë dhe Maqedonisë, mirëpo përkrahja e kësaj qendre nga institucionet lë shumë për të dëshiruar edhe pse ishte premtuar një gjë e tillë.

Përndryshe, në Kosovë llogariten 35 mijë përdorues të substancave narkotike, prej tyre 5 mijë janë aktiv.

Ferizaj

Bëhet i ditur identiteti i viktimave të aksidentit tragjik në Gjermani

Published

1 day ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

2 days ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

4 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.