Ferizaj

Qendra ”The Village” kundërshton që e diela të jetë ditë pushimi

Published

7 years ago

20 February, 2020

Derisa në seancën e ardhshme të Kuvendit Komunal të Ferizajt pritet të dalë për miratim rregullorja për caktimin e orarit të punës së veprimtarive afariste dhe veprimtarive të tjera në territorin e Ferizajt, qendra tregtare “The Village”, në të cilën operojnë dhjetëra biznese të ndryshme, këtë rregullore e konsideron tejet të dëmshme.

Mauro Abruzzes, menaxher i kësaj qendre, thotë se kjo rregullore do t’ua pamundësoj atyre të jenë konkurrent me qendrat e qyteteve të tjera, por edhe do të ndikoj në uljen e numërit të punëtorëve.

“Kjo iniciativë fatkeqësisht është një iniciativë që do ta dëmtoj kompleksin “The Village”, që është më i madhi dhe më i rëndësishmi në Ferizaj, ku në të janë të punësuar mbi 800 persona. Në industrinë e qendrave tregtare nuk mund të lejohet që e diela të jetë mbyllur, pasi qendrat tregtare janë target i familjeve dhe të gjithë e dimë se familjet shfrytëzojnë kohën së bashku në ditë vikendi në këtë qendër tregtare, të premtën, të shtunën dhe të dielave, pasi që gjatë javës të gjithë punojnë, kurse në vikend janë më të lirë. Kjo iniciativë mund të na krijojë probleme neve si “The Village” pasi që nuk mund të jemi konkurrent me qendrat tjera tregtare të cilat janë në qytete të tjera duke filluar nga Prishtina dhe kjo mund të vë në krizë repartin blerës në “The Village” pasi që do të shkaktonte edhe reduktim apo largim të fuqisë punëtore”, tha Abruzzes.

Abruzzes, thotë se për të kundërshtuar këtë propozim kanë organizuar edhe një peticion të cilin e kanë dorëzuar gjatë ditës së djeshme në komunë.

“Mund t’iu them si drejtor gjeneral i qendrës që së bashku me pronarët e qendrës kemi shikuar mundësinë se si të kundërshtojmë këtë iniciativë të komunës që do të na dëmtonte shumë neve si direkt ashtu edhe indirekt. Ne në mënyrë civile jemi duke u munduar që ta përmbysim këtë iniciativë të komunës dhe për këtë kemi organizuar një peticion me të gjithë banorët e Ferizajt dhe familjet që direkt dhe indirekt e shfrytëzojnë qendrën tregtare “The Village”, tha ai.

Komuna e Ferizajt edhe në prill të vitit 2019 kishte tentuar që ta miratoj këtë rregullore për caktimin e orarit të punës së veprimtarive afariste dhe veprimtarive të tjera që operojnë në Ferizaj, por e kishte tërhequr me arsyetimin se duhet një përgatitje më e thellë, për ta rikhyer përsëri tek gati pas një viti.

Ndryshe, një rregullore të tillë e ka miratuar edhe komuna e Vushtrrisë. Këtë formë të ndërhyrjes në ekonominë e lirë të tregut e kanë kundërshtuar edhe Autoriteti Kosovar i Konkurrencës, Oda Ekonomike e Kosovës dhe Oda Ekonomike Amerikane në Kosovë. Në një prononcim për gazetën ”Expresss” ata janë shprehur se këto rregullore janë në kundërshtim me nenin 10 dhe nenin 119 të Kushtetutës së Kosovës si dhe në kundërshtim me dispozitat e ligjit të punës neni 30 dhe 31.

Ferizaj

Ndahet nga jeta veterani i UÇK-së, Avdi H. Ahmeti

Published

2 days ago

03 November, 2026

Redaksia

Është ndarë nga jeta Veterani i Ushtrisë Çlirimtare të Kosovës, Avdi H. Ahmeti nga Ferizaj.

Njoftimi mortor u bë i ditur nga Organizata e Veteranëve të Luftës së UÇK-së, dega në Ferizaj.

Sipas njoftimit, varrimi i të ndjerit do të bëhet të mërkurën, më 04.11.2026 ora 14:15 në varrezat e lagjes Karametaj, të fshatit Greme të Ferizajt.

Ferizaj

Ndalohet për 48 orë një person për rastin e vdekjes të punëtorit në Ferizaj

Published

3 weeks ago

13 October, 2026

Redaksia

Prokuroria Themelore në Ferizaj, ka njoftuar për ndalimin e një personi me inicialet B.T. lidhur me rastin që ka ndodhur dje rreth orës 15:50, në rrugën ”Cen Dugolli” në Ferizaj, ku humbi jetën një punëtor derisa po punonte në një objekt ndërtimi. Viktima dyshohet se ka rënë nga lartësia dhe ka pësuar lëndime të rënda, si pasojë e të cilave ka ndërruar jetë në vendin e ngjarjes.

Sipas prokurorisë, i arrestuari B.T. është ndaluar nën dyshimin për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.

Njoftimi i Prokurorisë:

Ndalohet një person për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”

Ferizaj, 13 Tetor 2026– Prokuroria Themelore në Ferizaj, njofton opinionin publik se me vendim të Prokurorit të Shtetit, ka ndaluar një (1) person të dyshuar me iniciale B.T., në kohëzgjatje prej 48-orësh, për shkak të dyshimit të veprës penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”nga neni 358 sipas Kodit Penal të Republikës së Kosovës.

Rasti në fjalë ka ndodhur në rrugën ”Cen Dugolli” në Ferizaj, rreth orës 15:50:, ku, një person, i cili po kryente punime në një objekt ndërtimi, dyshohet se ka rënë nga lartësia dhe ka pësuar lëndime të rënda, si pasojë e të cilave ka ndërruar jetë në vendin e ngjarjes.

Vdekjen e viktimës e ka konstatuar mjeku kujdestar i Qendrës Emergjente në Ferizaj, kurse, me urdhëresë të prokurorit të shtetit, trupi i pajetë i vitkimës është dërguar për obduksion në Institutin e Mjekësisë Ligjore në Prishtinë.

Prokurori i shtetit, pas daljes në vendin e ngjarjes, ka udhëzuar Policinë dhe Inspektoratin e Punës, për ndërmarrjen e veprimeve të nevojshme hetimore, me qëllim të zbardhjes së rrethaneve të këtij rasti.

Prokuroria Themelore në Ferizaj, ndaj të dyshuarit të lartëpërmendur, brenda afatit ligjor do të vazhdoj me procedurat e mëtejme ligjore.

Ferizaj

Humb jetën një punëtor në një objekt në ndërtim në Ferizaj

Published

3 weeks ago

12 October, 2026

Redaksia

Një punëtor 54 vjeç ka humbur jetën pasi dyshohet se gjatë punës të jetë rrëzuar në një objekt në ndërtim në Ferizaj.

Rasti është raportuar të ketë ndodhur pasditen e sotme rreth orës 15:40, në rrugën “Cen Dugolli”.

Në vendin e ngjarjes kanë dalë policia dhe ekipet e Emergjencës, të cilat kanë konstatuar vdekjen e tij. Sipas policisë dyshohet se gjatë punimeve ndërtimore viktima është rrëzuar nga kati përdhes në bodrum.

Në vendngjarje kanë dalë edhe hetimet rajonale dhe inspektorët e punës derisa për të gjitha veprimet policore është njoftuar prokurori i shtetit.