Ferizaj

‘’Lëvizja Fol’’ diskuton për Ligjin për Mbrojtjen e Sinjalizuesve

Published

6 years ago

25 February, 2020

Organizata joqeveritare “Lëvizja Fol” ka mbajtur debat me anëtarë të Kuvendit Komunal të Ferizajt dhe zyrtarë të kësaj komune, ku temë diskutimi ishte ligji për mbrojtjen e sinjalizuesve.

Yllka Buzhala, hulumtuese në këtë organizatë, tha se ky ligj ka një rëndësi të veçantë prandaj duhet të gjejë zbatim, pasi sinjalizuesit ndihmojnë në uljen e keqpërdorimeve në institucione, integritetin financiar dhe sundimin e ligjit.

“Përfitues gjeneral janë publiku i gjerë, ne jemi taksapagues të këtij vendi dhe me taksat e qytetarëve bëhen investimet e ndryshme dhe e kemi obligim ne si shoqëri civile dhe publiku i gjerë me i monitoru investimet publike që bëhen në Kosovë. Ligji është mjaft i ri, më herët ka qenë ligji për informatorë, ne kemi lobuar shumë që të amandamentohen nene të caktuara të atij ligji dhe jemi shumë të kënaqur që është bërë ligji i ri për mbrojtjen e sinjalizuesve dhe ne jemi duke monitoruar zbatimin e këtj ligji i cili është duke u zbatuar në masa të caktuara sa i përket emërimit të zyrtarëve përgjegjës nëpër institucionet e Kosovës, por ka ngecur miratimi i një rregulloreje e cila cakton punën e zyrtarëve përgjegjës se si duhet trajtuar rastet e sinjalizimit në vendet ku ata punojnë prej kolegëve apo personave të tjerë”, tha Buzhala.

Buzhala, tha se komuna e Ferizajt ka emëruar zyrtarin përgjegjës i cili hulumton dhe trajton rastet e sinjalizimit, por mos hartimi i akteve nënligjore ka bërë që puna e tij të mbetet në gjysmë.

“Komuna e Ferizajt e ka emëruar zyrtarin përgjegjës që ka qenë obligative, që do t’i trajtoj dhe hulumtoj rastet e sinjalizimit, por deri këtu ka mbetur në përgjithësi, pasi ende nuk është bërë drafti final i rregullores dhe nuk është miratuar kjo rregullore për shkaqe të ndryshme si rrëzimi i qeverisë, por po shpresojmë që tani kanë me fillu punën grupet e Ministrisë së Drejtësisë në mënyrë që me miratu sa më shpejtë rregulloren për zyrtarët përgjegjës se si me i trajtu rastet e sinjalizimit”, tha Buzhala.

Ky projekt është i financuar nga granti i Fondacionit të Kosovës për Shoqëri të Hapur.

Ferizaj

Bëhet i ditur identiteti i viktimave të aksidentit tragjik në Gjermani

Published

2 days ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

2 days ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

4 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.