Ferizaj

Spitali i Ferizajt moblizohet kundër koronavirusit

Published

6 years ago

25 February, 2020

Spitali Rajonal i Ferizajt ka ndërmarrë të gjitha masat për mbrojtje nga koronavirusi, edhe pse në këtë spital deri tani nuk është identifikuar asnjë rast i dyshimtë me këtë virus.

Drejtori i këtij spitali Jeton Zeqiri, tha se nuk ka hapësirë për panik nga virusi korona, por sidoqoftë theksoi se kanë ndërmarrë masat e nevojshme kundër tij. Zeqiri tha se një ndër masat që kanë ndërmarrë është edhe sigurimi i një karantine.

“Edhe ne si spital rajonal jemi mobilizuar, i kemi përfillur të gjitha rekomandimet e OBSH-së, por edhe të Institutit Kombëtar të Shëndetësisë që jemi të gatshëm të dërgojmë raporte ditore për raste që janë të dyshura. Jemi përgatitur me të gjitha materialet nëse vie një rast, kemi identifikuar një dhomë karantinë nëse paraqitet një rast për të bërë izolimin e atij rasti, kemi bërë dezinfektimin e spitalit, kemi siguruar dezinfektues, jemi duke mbajtur ligjërata me mjekë për procedurat që duhet të ndërmerren në menaxhimin e përhapjes së këtij virusi, por edhe në bashkëpunim me studentë janë organizuar disa informime nëpër çerdhe dhe në shkollat tona për ngritjen e nivelit të higjienës si masë parandaluese prej infektimit të këtij virusi”, tha Zeqiri.

Zeiqri, tha se në rast se edhe në Kosovë shfaqet ky virus, i cili me shpejtësi të madhe ka nisur të përhapet në disa prej shteteve më të mëdha në botë, kanë kapacitete të mjaftueshme për menaxhimin e tij.

“Kjo është një gjendje gripoze, nuk duhet të shqetësohemi në masë të madhe, është një virus i zakonshëm si virueset e tjera, por mënyra e përhapjes është më e shpejtë se virueset e tjera, ne për momentin si Kosovë nuk jemi të rrezikuar për arsye të frekuentimit të vogël të shteteve endemike. Si institucion jemi të përgatitur, kemi kapacitet të mirë, kështu që shpresoj dhe besoj që koronavirusi nuk do të atakoj drejtpërdrejt me banorët e Kosovës, por në qoftë se shfaqet një gjendje e tillë ne jemi të përgatitur, të informuar dhe të trajtuar nga Instituti i Shëndetit Publik”, tha Zeqiri.

Ministria e Shëndetësisë bën të ditur se koronavirusi i ri është një virus i rrugëve të frymëmarrjes që përhapet kryesisht përmes kontaktit të ngushtë me një person të sëmurë. Mënyrat kryesore të përhapjes nga personi i infektuar janë nëpërmjet pështymës, kollitjes dhe teshtitjes, kontakteve personale të drejtpërdrejta, duarve, për shembull duke prekur me duart e ndotura gojën, hundën apo sytë.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

3 days ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

4 days ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

1 week ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim