Ferizaj

Mielli, produkti më i shitur këto ditë

Published

6 years ago

17 March, 2020

Edhe në qytetin e Ferizajt frika nga koronavirusi ka shtyrë qytetarët që të sigurojnë rezerva të produkteve ushqimore. Një gjë të tillë e konfirmojnë në qendrën tregtare ”ETC” dhe “Emona”. Përfaqësues të këtyre dy bizneseve që operojnë në Ferizaj thonë se mielli, si artikull elementar për jetë, ka qenë produkti më i shitur këto ditë.

“Sa i përket artikujve të tjerë esencial siç është qumështi, vaji, sheqeri jemi të përgatitur, jemi të mobilizuar dhe jemi në shërbim të qytetarëve, ndërsa sa i përket miellit ende nuk kemi informacione se kur do të ketë furnizim, por në momentin që do të ketë furnizim do t’i njoftojmë edhe qytetarët se ka arritur mielli dhe i shërbejmë. Jemi të furnizuar me të gjitha masat mbrojtëse siç janë maskat, dorëzat për të gjithë punëtorët dhe orari është duke vazhduar normalisht siç ka qenë edhe më herët vetëm që është zvogëluar orari i punës, tani është nga ora 08:00 deri në ora 20:00”, tha Argjend Berisha, menaxher i ”ETC”-së.

“Po, kryesisht është i furnizuar mirë marketi me produkte të gjitha, përveç miellit që ka mungesë në pëgjithësi në Kosovë, presim që në ditët në vazhdim të furnizohemi edhe me miell, përndryshe nuk ka vend për panik diçka, furnizim ka të mjaftueshëm, gjërat ushqimore janë të gjitha, me vaj, me të gjitha. Orari i punës është deri në orën 8 në mbrëmje sot, nga sot ka hyrë në fuqi dhe po respektohet mirë, besoj që respektohet edhe nga ana e konsumatorëve, nuk do të kemi ndonjë telashe. Para dy netëve e kemi dezinfektuar nga një kompani e komunës, gjithçka është në rregull, edhe nga ana e restorantit edhe pse nuk punon e kemi dezinfektuar, edhe marketin gjithashtu”, tha Besnik Salihu, menaxher i ”Emona”.

Ndërkaq, Qerim Bega nga ndërrmarrja tregtare “Belushi” në Ferizaj, e konsideron shqetësuese mungesën e miellit.

“Po, realisht ka probleme në treg, çalon furnizimi. Ne kemi qenë të furnizuar relativisht mirë, por për shkak të kësaj fushate, të kësaj historie që është krijuar, na janë paraqitur probleme, të gjitha rezervat që i kemi pasur në stok janë shpenzuar. Kemi pasur furnizime kohë pas kohe, mirëpo realisht për shkak të rrethanave të krijuara ato as përafërsisht nuk i kanë mbuluar as kërkesat elementare sepse ndoshta nevojat i kanë plotësuar, por kërkesat me të cilat ne jemi ballafaquar në treg. Ka njerëz që janë dy, tre anëtarë në familje, kanë ardhë i kanë marrë kah 500, 600, 700 kilogramë, pra ata kanë bërë rezerva për një periudhë afërsisht një vjeçare, mirëpo ka edhe familje që ankohen sepse kërkojnë vetëm një thes t’ua siguroj, por paraqiten momente kur nuk mundem t’ua siguroj për shkak se ne kemi pasur furnizime, por në momentin kur ka ardhur kamioni për më pak se dy orë tërë sasia që ka qenë e vendosur është shpenzuar”, tha Qerim Bega.

Ministrja e Ekonomisë, Tregtisë dhe Industrisë, Rozeta Hajdari, ditën e djeshme në një konferencë për media, ka thënë se ka rezerva të mjaftueshme ushqimore.

“Dua t’iu konfirmoj qytetarëve se rezervat shtetërore të mallrave janë të ruajtura në depot tona, të cilat janë të kompletuara nga aspekti sasior dhe cilësor. Kryesisht rezerva për mallrat si gruri, mallrat agro ushqimore, nafta dhe barnat”, tha ajo.

Aty u tha se do të vazhdoj kontakti i afërt me furnizuesit e rezervave shtetërore dhe se situata është nën kontroll për shërbim sa më të mirë të qytetarëve.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

6 days ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

7 days ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”

Ferizaj

Sekuestrohet një revole me municion dhe shurdhues në Ferizaj

Published

1 week ago

04 May, 2026

Redaksia

Një person është shoqëruar në stacionin policor në Ferizaj pas një kontrolli në shtëpinë e tij, ku janë gjetur dhe sekuestruar një pistoletë me gaz, pesë fishekë dhe një shurdhues i armës së zjarrit.

Në raportin 24 orësh të policisë bëhet e ditur se rasti ka ndodhur mëngjesin e së dielës, më 3 maj 2026, rreth orës 8:30 në rrugën “Gucia” në Ferizaj .

Me vendim të prokurorit pas intervistimit, rasti vazhdon të hetohet në procedurë të rregullt.