Ferizaj

Shën Gjergji, festa që po zbehet nga viti në vit

Published

6 years ago

06 May, 2020

Sot festohet Dita e Shën Gjergjit ku përmes riteve të ndryshme shënohet përfundimi i stinës së dimrit dhe ardhja e stinës së verës. Ndër vite kjo festë e cila konsiderohet që nuk i përket asnjë etniciteti apo religjioni, ka shkuar duke u zbehur.

Mehmet Jashari nga komuniteti rom në Ferizaj, thotë se vite më parë kjo ditë është shënuar me shumë aktivitete dhe se mezi e pritnin këtë festë, mirëpo tani numri i familjeve që e shënojnë atë është shumë i vogël.

“Më herët është festuar shumë, kanë dalë njerëzit me datën 5 kanë ble qingja dhe i kanë therrur, por tani ka ndyshuar, shumica e njerëzve nuk e festojnë dhe kanë mbetur shumë pak që e festojnë, janë vetëm thuajse 5 familje që e festojnë. Shën Gjergji është sikurse dita e pranverës, këtë simbolizon”,tha Jashari.

Këtë vit mosfestimi i kësaj dite ndodhë edhe për shkak të pandemisë Covid-19.

“Nuk e festojnë shumë, e bëjnë një drekë ose një darkë dhe nuk bëjnë aktivitete. Me rëndësi që në komunitetin tonë nuk ka të prekur, të gjithë u janë përmbajtur rregullave, u janë përmbajtur masave dhe gjithçka është në rregull”,tha Jashari.

Shën Gjergji është festë me shume rite por karakterizohet me gjelbërim, ndezje të zjarreve, rituale në vende publike, mbledhje lulesh e thurrje kurorash nga fëmijët, lagia e njerëzve të shtëpisë me ujë, e rite të tjera.

Ferizaj

Ferizaj: Konfiskohen rreth 780 gram drogë dhe arrestohen dy të dyshuar për manipulim të provave

Published

2 days ago

24 April, 2026

Redaksia

Policia në Ferizaj ka arrestuar dy persona të dyshuar për veprën penale “Manipulim i provave” që ka të bëjë me rastin e një dite më parë (22.04.2026), kur ishte arrestuar një i dyshuar, pasi në veturën e tij u gjetën tri qese me narkotikë të llojit marihuanë me peshë rreth 15.57 gram.

Në raportin shtesë të policisë bëhet e ditur se lidhur me rastin paraprak “njësitet policore gjatë kontrollit si prova materiale kanë gjetur dhe konfiskuar 778.3 gramë substancë e dyshuar narkotike të llojit marihuanë dhe një peshore digjitale. “

Rasti raportohet të ketë ndodhur të mërkurën mbrëma, rreth orës 21:00, në rrugën “Rifat Berisha” në Ferizaj.

Me vendim të prokurorit, dy të dyshuarit pas intervistimit janë dërguar në mbajtje.

Ferizaj

Ferizaj kualifikohet në finale të Kupës së Kosovës në futboll

Published

4 days ago

22 April, 2026

Redaksia

Futbollistët e Ferizajt u kualifikuan për në finalen e Kupës së Kosovës në futboll, pasi në gjysmëfinale eliminuan ekipin e Llapit me rezultat të përgjithshëm 2:1.

Ndeshja e kthimit, e zhvilluar sot në stadiumin e qytetit të Ferizajt, përfundoi pa gola 0-0, por falë fitores prej 2-1 si mysafir në ndeshjen e parë, ferizajasit siguruan vendin në finalen e madhe ku do të përballen me Dukagjinin, i cili në gjysmëfinalen tjetër, eliminoi Ballkanin me rezultat të përgjithshëm 6:2.

Takimi i sotëm në Ferizaj u ndërpre për disa minuta pas hedhjes të gjësendeve në fushë nga shikuesit, për të vazhduar vetëm pas largimit të tërësishëm të shikuesve nga tribunat.

Kjo do të jetë finalja e tretë për ferizajasit, pas asaj të edicionit 2011/2012 kur humbi nga Trepça ’89 dhe finales së edicionit 2012/2013 të cilën e humbi nga Prishtina.

Ferizaj

Humb jetën nxënësi 15 vjeçar në ambientet gjimnazit në Ferizaj

Published

1 week ago

17 April, 2026

Redaksia

Një nxënës ka humbur jetën në ambientet shkollore të gjimnazit “Kuvendi i Arbërit” në Ferizaj.

Sipas policisë, viktima është rrëzuar pa ndjenja në sallën e edukatës fizike dhe me urgjencë është dërguar në Qendrën Emergjente në Ferizaj, ku pavarësisht trajtimit mjekësor, ka ndërruar jetë.

“Me datë 17.04.2026, rreth orës 15:15, është pranuar një informatë se në shkollën e mesme “Kuvendi i Arbërit”, në rrugën “Brahim Ademi” në Ferizaj, një nxënës mashkull (15 vjeç), në rrethana ende të panjohura, është rrëzuar pa ndjenja në sallën e edukatës fizike”, njoftoi zëdhënësi i Policisë për rajonin e Ferizajt, Kanun Veseli.

Në vendngjarje, rastin janë duke e trajtuar hetuesit e stacionit, ata rajonalë dhe krimteknikët ndërsa me urdhër të prokurorit të shtetit, trupi i pajetë është dërguar në Institutin e Mjekësisë Ligjore për obduksion.