Ferizaj

Shënohet Dita e Dëshmorëve të Ferizajt

Published

6 years ago

28 September, 2020

Dita e Dëshmorëve të Ferizajt, e cila lidhet me betejën më të lavdishme të Ushtrisë Çlirimtare të Kosovës të kësaj ane, e njohur si “Epopeja e Jezercit”, tuboi sot në orët e paraditës mijëra qytetarë në Varrezat e Dëshmorëve të kësaj komune për të bërë homazhe në shenjë nderimi për ata që dhanë më të shtrenjtën për çlirimin e vendit.

Mes dhembjes e krenarisë, familjarët e dëshmorëve u shprehën krenarë për të bijtë e tyre që dhanë jetën për liri.

“Për ne kjo ditë është e dhembjes dhe e krenarisë, kjo është dita më e rëndësishme në Ferizaj. Në këtë ditë bien 9 dëshmorë të UÇK-së të cilët bien në luftë për komb e atdhe. Sot ata dëshmorë prehen këtu të qetë për ne, prandaj kërkesa e jonë e vetme është mos të ketë përçarje mes vete pasi përçarja është mike e Serbisë”, tha Gafurr Bytyqi, kryetar i Shoqatës së Familjeve të Dëshmorëve në Ferizaj.

Veteranët e UÇK-së kërkojnë që kjo pjesë e historisë së popullit tonë të shkruhet sa më parë në librat shkollor.

“Kjo datë do të kujtohet gjithmonë si një datë e cila ndryshoi historinë, prandaj është kërkesë imediate që këto data të rëndësishme të përfshihen në analet historike, pasi që dita ditës po harrohen këto data, prandaj urgjentisht duhet të trajtohen këto tema dhe të vendosen në pjesën e historisë pasi janë data tejet të rëndësishme”, tha Nexhat Shahini, veteran i UÇK-së.

Pas homazheve në Kompleksin e Varrezave të Dëshmorëve, përfaqësues të institucioneve të Ferizajt, deputetë të Kuvendit të Kosovës, veteranë të UÇK-së dhe qytetarë të shumtë, u nisën drejt fshatit Jezerc për të bërë inagurimin e Pikës 6 të UÇK-së e që është në kuadër të Parkut Memorial të UÇK-së.

Nga këtu, kryetari i Ferizajt Agim Aliu tha se janë munduar që të realizojnë një projekt përmes së cilit gjeneratat e reja do të njoftohen se si është fituar liria e Kosovës.

”Kjo që po e bëjmë ne sot me inagurimin e pikës 6 flet më së miri për përkushtimin e komunës që krahas përjetësisë dhe lavdisë së dëshmorëve ne kemi bërë një projekt që është unik në Republikën e Kosovës, që është një trashëgimi për gjeneratat që vinë, sepse sigurisht vitet ikin dhe mund të harrohet, por kjo që ne po bëjmë sot është përjetësisht ajo që do ta përkujtojnë gjithë të rinjtë e lindur pas vitit 1998 dhe ata që do të lindin, se këtu ka pasur trima dhe trimëresha dalzotës për lirinë dhe pavarësinë e Kosovës”, tha Aliu.

Këtë projekt e mirëpritën përfaqësues të Organizatës së Veteranëve të Luftës së UÇK-së në Ferizaj.

“Pas 22 viteve po shenjëzojmë një vend që është pjesë e Parkut Memorial të UÇK-së në Ferizaj, falënderojmë institucionet për angazhimin që kanë bërë që ky projekt të realizohet, ne jemi krenarë që po respektohen meritat që i kemi”, tha Luan Jahiri, nënkryetar i Organizatës së Veteranëve të Luftës së UÇK-së në Ferizaj.

Në 22 vjetorin e ”Epopesë së Jezercit” u organizua edhe një maratonë, ku pjesëmarrës ishin veteranët e luftës së UÇK-së dhe ushtarët e FSK-së.

“Ka qenë një maratonë me plot krenari, plot vullnet pasi kjo ditë është shumë e madhe për ne, me një fjalë ne jemi munduar që përmes motos, “Kujtojmë dhe Nderojmë”, t’i kujtojmë dhe nderojmë dëshmorët dhe ushtarët tanë duke vrapuar në mënyrë që ta kujtojmë kohën e tyre kur kanë vrapuar në një kohë të vështrirë, kështu ne jemi munduar që të bëjmë krenarë vetvetën, pastaj dëshmorët, familjarët e tyre, luftëtarët dhe të gjithë ata që kanë kontribuar për këtë liri që ne e gëzojmë sot“, tha Dardan Ibrahimi, pjesëtar i FSK-së.

Komuna e Ferizajt ka 62 dëshmorë.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

4 mins ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

7 days ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”