Diasporë

Gazetari Rexhep Rifati nderohet me “Diellin Dardan” për Vepër Jetësore

Published

3 years ago

07 December, 2020

(ALBINFO.CH) Nga: Shqipe Bytyçi

Lidhja e Krijuesve Shqiptarë në Mërgatë, për nder të festës së 28 NËNTORIT ka ndarë mirënjohje për zhanre të ndryshme arti në mërgatë. Tetë krijues marrin çmime dhe mirënjohje të ndryshme, ndër ta për veprimtari jetësore, gazetari Rexhep Rifati merr çmimin „Dielli Dardan“.

Musa Jupolli, kryetar i LKSHM me këtë rast shkruan: „Për Vepër Jetësore „Dielli Dardan“ çmohet kontributi i Rexhep Rifatit n’udhëtimet e tij të palodhshme, ku gjejmë shpirtin e krijuesit, gazetarit e fotografit me përshkrime dhe filozofi të pasur, me fotografi kujtimi që do të ruhen brez pas brezi, me theks, udhëtimet e Z. Rifatit në venbanimet e arbëreshëve janë pasuri që i kalojnë të gjitha çmimet!“

Të paktë janë ata që nuk e njohin gazetarin e palodhur Rexhep Rifati. Librat e botuar janë vlera që i përcillen dhe i lihen historisë. Ato lindin si kërkesa shpirtërore nga krijues, poetë e shkrimtarë, lindin në kohëra të ndryshme, në kushte të ndryshme dhe mbajnë në vete porosinë që u përcillet dhe u dhurohet gjeneratave të ardhshme. Rexhep Rifati i dhuroi dhe vazhdon t`i dhurojë shumë kulturës shqiptare, ai vazhdon të japë pa kërkuar asgjë në kthim dhe pikërisht këtu qëndron vlera e shtuar e të urtit Rexhep Rifati.

Rexhep Rifati, një figurë e dashur dhe e respektuar jo vetëm në diasporë por gjithandej trojeve shqiptare u lind në vitin 1942 në Komogllavë të Ferizajt, ku edhe kreu shkollimin e ulët dhe ate të mesëm, ndërsa në vitin 1973 diplomoi në Fakultetin Filozofik në Prishtinë, Dega Gjuhë dhe Letërsi Shqipe. Ai punoj afro tri dekada si gazetar i të përditshmes Rilindja, njëkohësisht ofroi kontributin e tij të vlefshëm në organizimin e jetës kulturore në Ferizaj.

Në vitin 1995 për shkak të presionit dhe dhunes serbe, ai migroi në Zvicër ku vazhdoi të merret me shkrime si gazetar dhe redaktor në gazeta dhe portale të ndryshme, për tu kthyer në një fytyrë emblatike të diasporës. Baci Rexhë, ashtu siç me shumë respekt dhe dashuri e thërrasin të rinj dhe të moshuar, ishte me kamerën dhe penën e tij kudo dhe kurdo, çdoherë në përcjelljen dhe promovimin e vlerave shqiptare në secilin cep të Zvicrës, në Itali te arbëreshët, në Europë dhe në të gjitha trojet shqiptare. Ai ishte aty ku diplomohej studenti shqiptar, ku promovohej arti, ku mësohej gjuha shqipe, ku bizneset frymonin shqip, ku prekeshin arritjet kolektive ose personale të bashkëkombëseve të tij dhe Baci Rexhë ju gëzohej sukseseve të tyre, shkruante për ta, motivonte gjenerata të tëra për suksese të reja. Nga këto rrugëtime të gjata dhe të pandalura ai në vitin 2013 nxori edhe librin e tij të parë “Shqiptarët në Zvicër- 1001 pamje“ ku shpalosi një tablo të bukur të shqiptarëve të Zvicrës dhe sukseseve të tyre. Në vitin 2018 botoi librin „Shtegtimet e një gazetari“ ku me fotografi që flasin sa njëmijë fjalë por edhe me shkrime, dëfton rrugëtimin e tij nëpër vise shqiptare, dëfton për monumente kulture, rite dhe artefakte, shoqata shqiptare, personalitete të njohura të diasporës.

Çmimi „Dielli Dardan“, nga Lidhja e Krijuesve Shqiptarë në Mërgatë, këtë vit ndahet për herë të parë dhe i jepet pikërisht gazetarit të palodhur Rexhep Rifati, të cilit poeti Mentor Thaqi në një poezi i drejtohet me vargjet: “Ec djalosh, ec/shkrepe e ndrite me penë/Rininë mbaje, se të mbanë/ Shtatëdhjetë vjet në vrapim/ Pesëdhjetë vjet në veprim…

Diasporë

Berisha: Votimi i sotëm antikushtetues dhe kundërligjor

Published

4 months ago

21 December, 2023

Redaksia

Në reagimin e tij pas votimit në Kuvend, Ish-kryeministri i Shqipërisë, Sali Berisha, tha se me këtë vendim ku 75 deputetët socialistë i hoqën imunitetin njëkohësisht, siç u shpreh, i dhanë edhe fund këtij parlamenti jodemokratik.

Votimin në Kuvend me të cilin i hapet rruga për arrestimit të tij nga Prokuroria e Posaçme, Berisha e cilësoi si antikushtetues dhe premtoi një qëndresë historike përballë atij që ai e konsideron një plan të shumicës së majtë për të shuar Partinë Demokratike dhe opozitën në vend.

“Kuvendi antidemokratik votoi në kundërshtim me çdo procedurë kushtetuese dhe ligjore për heqjen e imunitetit dhe arrestimin tim. Ky vendim jo që nuk do ta shkatërrojë opozitën, por do ta mobilizojë atë në shkallën më të lartë dhe me moton: ‘o sot o kurrë’, do t’i japë përgjigjen më të merituar këtij regjimi”, tha Berisha.

Diasporë

Kuvendi i Shqipërisë hap rrugën për arrestimin e ish-kryeministrit Berisha

Published

4 months ago

21 December, 2023

Redaksia

Kuvendi i Shqipërisë votoi të enjten në favor të kërkesës së Prokurorisë së Posaçme të Shqipërisë (SPAK) për t’ia hequr imunitetin e deputetit ish-kryeministrit Sali Berisha, duke i hapur rrugën arrestimit të tij nën dyshimin për korrupsion.

Prokurorët u kërkuan ligjvënësve javën e kaluar t’ia heqin Berishës imunitetin parlamentar, sepse ai nuk i ishte përmbajtur urdhrit për të raportuar në SPAK çdo dy javë dhe për të mos u larguar nga vendi, derisa po hetohej nën dyshimet për korrupsion.

Me 75 vota në favor, Kuvendi e miratoi kërkesën për t’ia hequr Berishës imunitetin parlamentar të enjten.

Në tetor, SPAK-u njoftoi se Berisha akuzohet për korrupsion në një rast bashkë me dhëndrin e vet, Jamarbër Malltezi, për privatizimin e paligjshëm të kompleksit sportiv Partizani.

Opozita u përpoq ta pengojë votimin duke hedhur flakadanë në seancën foltorja e të cilës u sigurua nga një numër i madh i rojeve të sigurisë, ndërkohë që pranë ndërtesës së Kuvendit protestuesit e kundërshtuan vendimin.

Të hënën, Këshilli i Mandateve i Kuvendit të Shqipërisë e çoi në votim heqjen e imunitetit për Berishën me kërkesë të prokurorëve.

/REL/

Diasporë

Prokuroria kërkon arrest shtëpiak për Sali Berishën

Published

4 months ago

12 December, 2023

Redaksia

Prokuroria e Posaçme e Shqipërisë (SPAK) i ka kërkuar të martën Kuvendit të Shqipërisë t’ia heqë imunitetin e deputetit ish-kryeministrit Sali Berisha, pasi ai e kishte shpërfillur vendimin e saj paraprak për t’u paraqitur në prokurori gjatë hetimit ndaj tij.

SPAK-u kërkon që Berishës t’i zëvendësohet masa e deritanishme për “detyrim paraqitje” me masën e arrestit shtëpiak.

Prokuroria ia ndaloi ish-liderit shqiptar edhe largimin nga shteti, pasi është duke u hetuar nën dyshimet për “korrupsion pasiv” në rastin e privatizimit të ish-kompleksit sportiv “Partizani”.

Berisha ka thënë se do ta nderojë çfarëdo vendimi që merr Kuvendi për kërkesën e prokurorëve.

“Çfarëdo vendimi pas autorizimit të Kuvendit do ta respektoj pa asnjë diskutim. Qëndrimi im i përsëritur ka të bëjë me kushtetutshmërinë e vendit”, tha Berisha.

Pritet që kryetarja e Kuvendit të njoftojë anëtarët e Këshillit të Mandateve dhe të thërrasë mbledhjen e këtij Këshilli për ta shqyrtuar kërkesën e prokurorëve.

Sipas procedurës parlamentare, edhe vetë Berisha thirret të jetë pjesë e mbledhjes për të raportuar mbi rastin. Pas shqyrtimit të kërkesës, Këshilli ka dy javë kohë për ta hartuar raportin të cilin pastaj ia dërgon Kuvendit për ta votuar.

Më 22 tetor, SPAK-u deklaroi se Berisha dyshohet për “korrupsion pasiv”.

Berisha i ka mohuar akuzat.

Në të njëjtën ditë u arrestua dhëndri i tij, Jamarbër Malltezi, por më pas masa e sigurisë ndaj tij u zbut në arrest shtëpiak.

Hetimet nga SPAK-u nisën pas një kallëzimi të dorëzuar në vitin 2020 nga Taulant Balla, tani ministër i Brendshëm. Në kallëzim theksohej se “Jamarbër Malltezi privatizoi kompleksin Partizani në mënyrë të paligjshme me një shumë rreth 100 mijë euro, ndërsa në këtë zonë tashmë janë ngritur disa pallate për banim. Kjo u arrit përmes vendimeve favorizuese të Qeverisë së drejtuar nga Sali Berisha”.

Kompleksi sportiv “Partizani”, me një sipërfaqe prej 26 mijë metrash katrorë, u privatizua në vitin 2008 dhe deri në atë kohë ishte pronë e Ministrisë së Mbrojtjes.

Rreth 22 mijë metra katrorë i përkisnin 64 trashëgimtarëve të pesë familjeve të ish-pronarëve, mes tyre edhe Jamarbër Malltezi, ndërsa 4 mijë metra katrorë të tjerë ishin pronë shtetërore. Në fund të procesit të kthimit të kësaj prone, Jamarbër Malltezi arriti të marrë 35 për qind të të gjithë pronës, duke përfshirë këtu edhe pjesën që ishte tokë shtetërore.

Sipas padisë së dorëzuar në SPAK, kjo është bërë përmes vendimeve të dyshimta të Qeverisë së Sali Berishës. Në atë sipërfaqe të përfituar, Jamarbër Malltezi së bashku me ortakun e tij Fatmir Bektashi, kanë ndërtuar disa kulla.

/REL/