Ferizaj

Kërkohet ndihmë financiare për të riun Fitim Mehmeti

Published

6 years ago

08 February, 2021

administrator

Fitim Mehmeti, pjesëtar i Brigadës së Zjarrfikësve në Ferizaj, është diagnostikuar me leukemi akute.

Në pamundësi të mbulimit të shpenzimeve të mëdha për shërim jashtë vendit, po kërkohet ndihmë financiare nga qytetarët.

Për shërimin e 25 vjeçarit nevojiten 130 mijë euro, kosto kjo e papërballueshme për familjen e tij, prandaj paraditën e sotme Agon Zhinipotoku ka marrë iniciativë që përmes vullnetit të qytetarëve ferizajas ta ndihmoj familjen Mehmeti për ta siguruar shumën e nevojshme për Fitimin.

“Pas kërkesave të shumta kemi vendosur me marrë përsipër edhe rastin e Fitimit ku shuma që i duhet është 130 mijë euro, familja ka siguruar tashmë 30 mijë, po ashtu në llogarinë e babit të tij sapo na lajmëruan se kanë arritur edhe 20 mijë euro, ndërsa tani ne synojmë që përmes organizimeve të ndryshme që do të bëjmë të arrijmë edhe 80 mijë euro dhe këtë shumë synojmë ta arrijmë deri të premten”, tha Zhinipotoku.

Derisa u bëjnë thirrje qytetarëve për ndihmë, familjarë të Fitimit tregojnë se nuk mund të humbasin shumë kohë, pasi gjendja e tij sa vie e rëndohet.

“Fitimi është diagnostikuar që dy javë me leukemi akute, ai tashmë ka filluar me kimioterapi në Maqedoni, shëndeti i tij është shumë i rënduar, kemi humbur pak kohë pasi është mjekuar për tjetër gjë. U bëjmë thirrje qytetarëve që ta ndihmojnë Fitimin, edhe pse e dimë se janë ldodhur nga këto raste, por ne nuk kemi rrugë tjetër çfarë të bëjmë. Fitimi nga nëntori është me shqetësime, është mjekuar një herë për COVID-19, por tani veçse është i diagnostikuar”, tha Jetmir Ilazi, familjar.

30 % të shumës totale familjarët thanë se janë duke u munduar që ta sigurojnë edhe nga Ministria e Shëndetësisë, por që gjastat janë të pakta meqë Fitimi nuk ka kryer terapi mjekësore në Kosovë.

Ferizaj

Bëhet i ditur identiteti i viktimave të aksidentit tragjik në Gjermani

Published

4 days ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

4 days ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

6 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.