Ferizaj

Pakënaqësi për ankesat e parashtruara në PZAP

Published

5 years ago

09 March, 2021

Lulzim Abazi i cili në zgjedhjet e 14 shkurtit garoi për deputet në Kuvendin e Kosovës nga radhët e PDK-së, por që nuk arriti të siguroj vota të mjaftueshme për të qenë pjesë e Parlamentit, po akuzon Panelin Zgjedhor për Ankesa dhe Parashtresa që nuk i ka marrë parasysh ankesat e tij për vjedhje të votave.

“Fakt më i mirë se që ka ndodhë me rinumërimin që ka bërë vet KQZ-ja në disa vendvotime një prej tyre që ka qenë në Komogllavë klasa e katërt, në atë klasë janë 6 vota që janë zbuluar që më janë marrë mua dhe kanë shkuar për kandidatin tjetër, prandaj nuk e di se cili është fakti më i madh që ata vet e kanë konstatu që ka pas keqpërdorime kur është bërë numërimi i votave, prandaj fakti që aq shpejtë jemi thirr për me i tërheq vendimet mua më duket që fare nuk është marrë parasysh ankesa ime, madje kur është tërheq vendimi aty kanë thënë se nëse i pranojmë të gjitha ankesat atëherë nuk do të mund t’i certifikojmë zgjedhjet as për 6 muaj”, tha Abazi.

Ngjashëm shprehet edhe kandidati për deputet nga Lidhja Demokratike e Kosovës në Ferizaj, Fadil Halili. Edhe Halili thotë se ka dorëzuar fakte që dëshmojnë se ka pasur manipulim me vota, por që PZAP-i i ka kthyer përgjigje negative.

“Unë i kam bërë tri ankesa në PZAP, por fatkeqësisht dje më janë përgjigjur negativisht duke thënë se nuk kam bazë, ndërsa bazë kanë qenë vet votuesit që i kam familjarë dhe e kam sigurinë e plotë se ata kanë votuar aty. Po ashtu kam informacione edhe për dy vendvotime që është bërë shkelje shumë e rëndë. Në shkollën “Ahmet Hoxha” një kandidate Bulza Kuqi e Suharekës ka marrë 75 vota, ndërsa LDK-ja aty i ka pas 27 vota dhe kjo tregon se ka pasur shkelje të rënda, po ashtu në Prizren në bazë të informatave që kam marrë, aty i kam pasur 91 vota, ndërsa çuditërisht në rezultatin përfundimtar del që unë në Prizren i kam 18 vota dhe kjo dëshmon se është vjedhje e hapur e votës”, tha Halili.

Abazi e Halili thonë se janë të zhgënjyer nga vendimi i këtij institucioni, për të cilin kërkojnë të bëhet hetim i veçantë.

“Qëllimi i këtyre ankesave ka qenë që të kërkojmë që drejtësia të shkoj në vend, qëllimi jonë është të mësohemi që t’iu besojmë institucioneve siç është KQZ-ja dhe PZAP-ja dhe gjithë atyre që janë të thirrur me çu drejtësinë në vend “, tha Halili.

“Është zhgënjim me të vërtet dhe derisa ne mos ta ndryshojmë mënyrën e numërimit të votave gjithmonë do të shkoj kështu dhe unë mendoj që është një gjë që duhet në të ardhmen të rishikohet se çfarë po ndodhë në KQZ, sepse atje nuk është duke funksionuar diçka“, tha Abazi.

Ankesë në PZAP ka bërë edhe kandidatja Saranda Musliu nga LDK-ja, të cilës i është kthyer ankesa e pabazuar.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

25 mins ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

7 days ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”