Ferizaj

“Urime!” për të katërtën herë

Published

5 years ago

09 June, 2021

Sot u përurua rruga që lidhë fshatrat Bablak dhe Tërrn me fshatin Luboc, jo për të parën, as për të dytën, e as për të tretën, por për të katërtën herë.

Kjo rrugë së pari u përurua më 3 maj të vitit 2019 kur edhe kishte filluar asfaltimi i saj.

Përurimi i kësaj rruge madje vazhdoi edhe në dhjetor të vitit 2020, ku u përurua përsëri.

Ndërsa vetëm sot, rruga që po asfaltohet nga fshati Bablak u përurua dy herë, një herë në ora 11:00 nga Komuna e Ferizajt, e pas faljes së drekës, në ora 13:00 u përurua edhe nga Ministria e Infrastrukturës, si bartëse e këtij projekti.

Drejtori i Infrastrukturës në Ferizaj, Arbër Bytyqi gjatë përurimit të paradrekës, tha se me këtë rrugë vuajtjeve të banorëve të këtyre tri fshatrave po u vie fundi.

“Problemet që kanë qenë sa i përket ridizajnimit të projektit, Ministria e Infrastrukturës vetëm se i ka përfunduar dhe po besoj që është projekt i mirëpritur për banorët e këtyre fshatrave dhe është bërë zgjidhja e duhur për këtë pjesë… Sa i përket insvestimit dihet që ky projekt ka qenë pjesë e Ministrisë”, thotë Bytyqi.

E kryetari i fshatit Tërrn tregoi se për asfaltimin e kësaj rruge ky fshat kishte pritur me dekada.

“Kena hjek shumë me këtë rrugë, që 30 vjet kemi qenë fshat i lënë anash sikur mos me jetu në Kosovë. Jemi marrë me rrugën. Me falenderu ministrinë që më në fund që bëri zgjidhje, aneks kontratën që për 1 vit e gjysmë nuk ka mujt me përfundu, tash e ka përfundu dhe kanë fillu punimet”, deklaroi Musliu.

Zëvendësministri i Infrastrukturës, Hysen Durmishi gjatë përurimit të pasdrekës dha arsyet e tij pse u vonuan aq shumë punimet në këtë rrugë.

“Kjo është kontratë e mëhershme. Për më shumë se një vit e gjysmë nuk kanë vazhduar punimet për shkak të një aneks kontrate. I kemi gjetur 20 projekte të bllokuara për shkaqe procedurale me krejt dokumentacionin e përfunduar dhe nuk e kanë procedu… Kemi fillu t’i zhbllokojmë një nga një të gjitha këto projekte të cilat kanë qenë pa arsye të bllokuara, një nga to edhe kjo rrugë në fshatin Tërrn”, thotë Durmishi për Tv Tema.

Me gjithë këto përurime, sot u shtrua vetëm një kilometër asfalt përgjatë kësaj rruge, ndërsa i tërë projekti pritet që të përmbyllet gjatë vitit të ardhshëm.

Ferizaj

Humb jetën nxënësi 15 vjeçar në ambientet gjimnazit në Ferizaj

Published

1 hour ago

17 April, 2026

Redaksia

Një nxënës ka humbur jetën në ambientet shkollore të gjimnazit “Kuvendi i Arbërit” në Ferizaj.

Sipas policisë, viktima është rrëzuar pa ndjenja në sallën e edukatës fizike dhe me urgjencë është dërguar në Qendrën Emergjente në Ferizaj, ku pavarësisht trajtimit mjekësor, ka ndërruar jetë.

“Me datë 17.04.2026, rreth orës 15:15, është pranuar një informatë se në shkollën e mesme “Kuvendi i Arbërit”, në rrugën “Brahim Ademi” në Ferizaj, një nxënës mashkull (15 vjeç), në rrethana ende të panjohura, është rrëzuar pa ndjenja në sallën e edukatës fizike”, njoftoi zëdhënësi i Policisë për rajonin e Ferizajt, Kanun Veseli.

Në vendngjarje, rastin janë duke e trajtuar hetuesit e stacionit, ata rajonalë dhe krimteknikët ndërsa me urdhër të prokurorit të shtetit, trupi i pajetë është dërguar në Institutin e Mjekësisë Ligjore për obduksion.

Ferizaj

Lëndohet një punëtor pasi bie nga një ndërtesë në Ferizaj

Published

2 hours ago

17 April, 2026

Redaksia

Një punëtor 46-vjeçar ka pësuar lëndime të rënda pasi ka rënë nga kati i dytë i një objekti, në rrugën “Uran Tinova” në Ferizaj.

Për shkak të lëndimeve të pësuara, punëtori fillimisht është dërguar për ndihmë mjekësore në Qendrën Emergjente në Ferizaj, e më pas në Qendrën Klinike Universitare të Kosovës (QKUK).

“Ju njoftojmë se sot, rreth orës 12:40, kemi pranuar një informatë se në rrugën “Uran Tinova” në Ferizaj , në një objekt në ndërtim, një punëtor është rrëzuar, dyshohet nga kati i dytë në vendin e punës. Sipas informatave të para nga vendi i ngjarjes, bëhet fjalë për punëtorin, 46 vjeç.

Për shkak të lëndimeve të pësuara, fillimisht është dërguar për ndihmë mjekësore në Qendrën Emergjente në Ferizaj, e më pas në QKUK në Prishtinë. Patrullat policore dhe njësitet e hetimeve kanë dalë në vendin e ngjarjes”, ka bërë të ditur zëdhënësi i Policisë për rajonin e Ferizajt, Kanun Veseli.

Ndryshe, brenda dy javëve të fundit ky është rasti i tretë i aksidenteve në punë për shkak të rënies nga lartësia në objekte ndërtimi në Ferizaj.

Ferizaj

Nisin hetimet për vdekjen e 48-vjeçarit në Shtime

Published

1 day ago

16 April, 2026

Redaksia

Policia e Kosovës ka njoftuar se ka nisur hetimet për vdekjen e një personi në vendin e punës në Shtime.

Rasti që ndodhi pasditen e djeshme në zonën industriale të Shtimes, po hetohet si shkelje e sigurisë në punë.

Viktima, Isuf Bislimi, ishte dërguar menjëherë në Emergjencën e Ferizajt, ku nga ekipi mjekësor ishte konstatuar vdekja e tij.

Siç bëhet e ditur në raportin 24 orësh “viktima mashkull kosovar, ishte dërguar në emergjencën e Ferizajt për trajtim mjekësor pasi që dyshohet se derisa ka qenë duke punuar, kishte pësuar lëndime të rënda trupore dhe nga mjeku është konstatuar vdekja e tij.”

Lidhur me këtë rast, i cili është duke u hetuar në dyshimin për “Asgjësim, dëmtim ose heqja e pajisjeve mbrojtëse dhe rrezikim i sigurisë në vendin e punës” një person është arrestuar dhe dërguar në mbajtje për 48 orë, thuhet mes tjerash në njoftimin e Policisë.