Në seancën e sotme të Kuvendit Komunal të Ferizajt kërkesa e MAPL-së, drejtuar komunës së Ferizajt për anulimin e vendimit të saj  Nr.35 të datës 25.03.2021, për dhënien në shfrytëzim të pronës së Komunës për shoqatën Hendifer, ngalli shumë reagime në mesin e kuvendarëve si të opozitës ashtu edhe të pozitës. MAPL-ja kërkesën e vet për anulim e kishte mbështet mbi arsyetimin se prona nuk është publikuar në listën e pronave komunale për dhënie në shfrytëzim.

Kuvendarja e Aleancës për Ardhmërinë e Kosovës, Hatixhe Bungu-Qerimi tregoi se Komuna e Ferizajt nuk po ia paguan qiranë kësaj shoqate.

“Shoqatat për personat me aftësi ndryshe janë pa objekt, duke u endur poshtë e lartë si qiragjinjë. Siç thotë edhe qiramarrësi që Komuna e cila është zotuar me pagu qiranë, nuk e bënë një gjë të tillë. Objekti i tyre është rrënuar që t’i lirohet hapësira “Bashkimit të Qytetit”, gjithashtu iu mor parcela afër Cosmos që të bëhet vendi për pensionerët. Gjatë vitit 2020, ekspertët kanë punuar për projektin e shoqatës Hendifer pasi që kanë takuar një donator për ndërtimin e ndërtesës së parë për personat me aftësi ndryshe. Parcela e dhënë me datë 25.03.2021 po del të jetë e kundërligjshme sepse u procedua në Kuvend pa u përfillë rregullat dhe ligjet në fuqi. Këtë e keni bërë nga mos dija apo ka qenë e qëllimshme? Javën e kaluar, donatori është konsultuar me anëtarë të shoqatës për arritjen e një memorandumi bashkëpunimi për zgjidhjen e problemit, donatori erdhi e qëndroi një javë por takimi nuk u realizua, donacioni u humb, puna shkoi huq, a duhet ditur përgjegjësi?”.

Hatixhe Bungu-Qerimi – Kuvendare e AAK-së

Përgjigje për pyetjet e saj, Bungu nuk mundi të marrë nga drejtori i drejtorisë së Pronës, Sabri Murseli sepse ai mungoi në seancë, megjithatë një përgjigje e mori nga kryesuesja, Kristina Gashi-Bytyçi.

“Komuna është e obliguar të bëjë zgjidhje, është prioritet, nëse jo tani pas kthimit të vendimit nga Ministria, mandatin tjetër do t’u bëhet zgjidhje”.

Kristina Gashi-Bytyçi – Kryesuese e Kuvendit

Zgjidhje rreth kësaj çështje ofruan kuvendari Amir Rexhepi dhe ai i PDK-së Arian Imeri.

“Unë propozoj që ngastra kadastrale 507-1, me sipërfaqe 471 metra katror dhe 569-1 me sipërfaqe 729 metra katrorë, të përfshihen tek pronat për dhënie në shfrytëzim që t’i jepet OJQ-ve për personat me aftësi të kufizuara”.

Arian Imeri – Kuvendar i PDK-së

“Është dashur që pasi që po anulohet ky vendim të keni një vend tjetër që t’i jepet kësaj kategorie, në mënyrë që të mos e gënjejmë këtë kategori”.

Amir Rexhepi – Kuvendar i AKR-së

E frustruar rreth kësaj teme u shfaq edhe kuvendarja e LDK-së, Bahrije Hyseni e cila pati akuza drejt ekzekutivit lokal.

“Tash do ta shfrytëzoni, ju partitë që ishit në pushtet, për fushatë se njerëzve me aftësi të kufizuara do ua bëni një objekt. Mos luani me njerëz të këtij qyteti që janë me aftësi të kufizuara”.

Bahrije Hyseni – Kuvendare e LDK-së

Në fund, me 27 vota për dhe një votë kundër u miratua propozimi për anulimin e këtij vendimi.