Ferizaj

Projekti i Lepencit i siguron Ferizajt ujë 24 orë

Published

4 years ago

24 June, 2022

Vera e vitit 2021 për qytetin e Ferizajt ishte shumë e vështirë sepse gjatë gjithë kësaj stine, ferizajasit u përballën me mungesë të ujit.

Kryeshefi i Kompanisë Regjionale të Ujit dhe Kanalizimit “Bifurkacioni”, Jeton Shabani thotë se edhe kjo verë, Ferizajn e gjenë me telashe rreth furnizimit me ujë.

Mirëpo ai kërkon mirëkuptim nga qytetarët dhe ndihmë nga ta që të lajmërojnë keqpërdorimet e ujit.

Vox1: Jeton Shabani, Kryeshef i KRU Bifurkacioni

“Ne e kemi kapacitetin për zonën urbane dhe pesë fshatra, afërsisht 200 litra në sekondë. Nënkuptohet që këto kapacitete nuk janë të mjaftueshme. Me këto humbje që i kemi, kyçjet ilegale dhe keqpërdorimet e mëdha të ujit na afektojnë që në sezonin e verës të ketë reduktime të ujit. Reduktime të cilat fillojnë në orën 23:30 deri në orën 5 të mëngjesit. Por kjo është e pamjaftueshme sepse sezoni i verës në pikun më të nxehtë, shfrytëzimi i ujit dhe keqpërdorimet po janë më të mëdha. Kapacitetet nuk po mundemi me i rritë prandaj edhe në këtë sezon do të ketë mungesa të ujit derisa të bëhet një zgjidhje afatgjatë. Pritet që shtypja e ujit në rubinetet e qytetarëve të mos jetë me 2.5 ose 3 bar po të jetë më e ulët. Kjo për shkak se duhet të furnizohen të gjithë qytetarët dhe zonat ku janë nivelet më të larta munden me pasë mungesë më të madhe të ujit” thotë Jeton Shabani – Kryeshef i KRU Bifurkacioni.

Megjithatë një zgjidhje e këtij problemi duket në horizont.

Shabani thotë se po punohet që Ferizaj të lidhet me Projektin e Lepencit në mënyrë që të shtohen kapacitetet e ujit.

Vox2: Jeton Shabani, Kryeshef i KRU Bifurkacioni

“Në kuadër të departamentit të shitjes janë organizu katër ekipe që dalin në teren vetëm që të ndalin kyçjet ilegale. Brenda një muaj e gjysmë janë gjetur mbi 250 kyçje ilegale, të cilat ne i kemi ndërpre, kemi bërë padi dhe kemi shpërnda gjoba. Si projekt afatgjatë, në kuadër të qeverisë është formu një grup punues që deri në fund të shtatorit të gjendet një zgjidhje afatgjate për furnizim me ujë në Ferizaj dhe zgjidhja e vetme është projekti i Lepencit i cili neve na e garanton furnizimin 24 orë me ujë të pijshëm. E është duke u bërë edhe një studim fizibiliteti edhe për pjesën e kryerjes së atij projekti, kështu që unë besoj që brenda 3 vite e gjysmë, katër mund të realizohet edhe si projekt i ndërtuar” u deklarua Jeton Shabani – Kryeshef i KRU Bifurkacioni.

Pas katër viteve besohet se qytetit tonë do i shtohen kapacitetet për 270 litra në sekondë të përpunimit të ujit.

Ferizaj

Ngritët aktakuza e parë për zgjedhjet e 28 dhjetorit

Published

5 days ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

7 days ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

2 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.