Rastet e reja me virusin Covid-19 në Kosovë gjatë javës së fundit kanë shënuar rritje.

Vetëm të hënën e 27 qershorit u regjistruan 35 raste të reja dhe nga Instituti Kombëtar i Shëndetësisë Publike informohemi se janë 270 raste aktive.

E për shkak të rritjes së numrit të rasteve, ditë më parë u paralajmëruan edhe masa të reja shtrënguese.

Koordinatori për Ferizaj i Aleancës Kosovare të Bizneseve, Nexhat Hasani thotë se të gjitha masat e ndërmarra deri më tash kanë ndikuar tejet negativisht në ekonominë e brishtë të Kosovës.

“Evropa sa i përket Covidit është stabilizu, edhe masat janë hekë. Gjatë pushimeve thuajse në asnjë vend evropian nuk ka masa strikt. Nëse ne vendosim masa sidomos tash që e presim diasporë, kur ekonomia jonë ka nevojë për remitenca, nuk e shoh të arsyeshme masat e çfarëdo niveli. Ekonomia ka nevojë për liberalizim dhe para të gatshme dhe ardhja e diasporës na nxjerrë prej kësaj krize, prej kësaj situate. Ne kemi nevojë për ndërhyrje në ekonomi, në derivate të naftës e energji, ndërsa sa i përket pandemisë masat e reja do ishin katastrofale për vendin tonë” deklaroi Nexhat Hasani – Koordinator i AKB-së.

Edhe ekonomisti Hysni Elezi konsideron se ekonomia kosovare ka nevojë për ndihmë sepse përveç pandemisë u dëmtua shumë nga inflacioni që erdhi si pasojë e luftës në Ukrainë, teksa masat e reja do e vështirësonin ekonominë e sidomos sektorin e gastronomisë.

“Tek gastronomia ka struktura dhe nivele të llojllojshme të gastronomisë. Ka gastronomi që menaxhohet nga biznese me zhvillim jashtëzakonisht të madh ekonomik, e bizneset e vogla e të mesme që nuk kanë fuqi financiare nuk ka mundësi. Biznesi që ka zhvillim dhe ka të krijuar një profit që e ka kriju me vite të tëra, ai është në gjendje që me kapitalin e fituar më herët t’i mbulojë mangësitë. Po çfarë t’i bëhet biznesit të vogël dhe të mesëm? Kjo tash, në mënyrë indirekte, por që tek ne është trend, vetëm e shton numrin e të rinjve dhe të rejave që asgjë tjetër  mos të shohin si rrugë dalje dhe sytë nga perëndimi. Këto masa veç çka do e shtrëngojnë dhe vështirësojnë jetën e qytetarëve dhe ekonominë tonë në përgjithësi.” thotë Hysni Elezi – Ekonomist

Zgjidhja e vetme për t’iu ikur masave të reja dhe për tu ulur rastet me Covid-19 është vaksinimi i qytetarëve me vaksinën anti-Covid.

Me gjithë këtë, drejtoresha e Qendrës Kryesore të Mjekësisë Familjare në Ferizaj, Nadire Ymeri tregon se interesimi i qytetarëve për vaksinim ka rënë tej mase, teksa sugjeron larjen më të shpeshtë të duarve, mbajtjen e distancës dhe mos grumbullimin.

“Aktualisht, interesimi i qytetarëve për vaksinën anti-Covid ka rënë dukshëm, duke marrë parasysh muajt paraprak, ka rënie e nuk ka të interesuar. Numri i të interesuarve është gjashtë deri në shtatë veta brenda ditës. Duke marrë parasysh rritjen e numrit të rasteve me Covid, rruga më e mirë e mbrojtjes kundër virusit korona është vaksinimi” deklaroi Nadire Ymeri – Drejtoreshë e QKMF Ferizaj

Masat e reja anti-Covid janë paralajmëruar ditë më parë nga Ministri i Shëndetësisë Rifat Latifi.

“Komiteti për masat do të takohet shumë shpejtë, ne jemi tu mendu me i marrë masat e duhuna konform me kontinentin e Evropës” deklaroi Rifat Latifi – Ministër i Shëndetësisë

Deri tani në Kosovë janë administruar mbi 1 milion e 800 mijë doza të vaksinës anti-Covid.