Kryeministri në detyrë, Albin Kurti, ka thënë se nuk ka as arsye ligjore e as morale që ish-udhëheqësit e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi e Rexhep Selimi të mbahen në paraburgim nga Gjykata Speciale në Hagë.

Në pesë vjetorin e arrestimit të tyre, Kurti ka thënë se qeveria e tij, që nga fillimi, ka punuar në heshtje për lirimin e tyre nga paraburgimi. Ai me këtë rast ka publikuar edhe letrën e tij të vitit 2022, dërguar kryetares së Dhomave të Specializuara, Ekaterina Trendafilova, përmes së cilës i kishte ofruar  “garanci shtetërore për lirimin nga paraburgimi të të gjithë të akuzuarve.”

Ai tha se në përgjigjen e Tranafillovës pas dy javësh kërkesat e paraqitura nuk morën zgjidhje.

Kurti ka thënë se letrën po e bënë publike sot “për një arsye të vetme: sepse besoj se është e drejtë që ata të kthehen në shtëpitë e tyre, të jenë pranë familjeve të tyre, dhe ta mbrojnë në liri luftën e drejtë çlirimtare të Kosovës”, duke shtuar se “kërkesat tona qëndrojnë akoma, e në Kosovë ekzistojnë të gjitha garancitë për përgjigje pozitive ndaj tyre”.

Kosova e ka ndaluar përkohësisht importin e shpezëve të gjalla dhe produkteve të tyre nga Hungaria dhe Italia, për shkak të pranisë së gripit të shpezëve në këto dy vende të Bashkimit Evropian, njoftoi të mërkurën autoriteti për ushqim dhe veterinari.

Agjencia e Ushqimit dhe Veterinarisë e Kosovës (AUVK) tha në një njoftim për media se këtë vendim e mori duke u bazuar në raportet e fundit nga Organizata Botërore për Shëndetin e Kafshëve, si dhe Komisioni Evropian.

Raportet e tyre kanë gjetur se në shtetin e Hungarisë është i pranishëm gripi i shpezëve, serotip me patogjenitet të lartë HPAI–H5N1, në fermat komerciale dhe në shpezët e egra në njësitë administrative Jasz, Nagykun dhe Szolnok.

Ndërsa, në Itali, ky grip është i pranishëm në rajonet Emilia-Romagna dhe Lombardia, sipas AUVK-ut.

AVUK tha se nga e mërkura ndalohet importi i shpezëve të gjalla dhe i produkteve të tyre që kanë origjinën nga zonat e infektuara të Hungarisë dhe Italisë, përveç nëse ato kanë origjinën nga ferma të paprekura nga sëmundja, të cilat gjenden në një rreze prej 50 kilometrave larg zonave të prekura.

“Kjo ndalesë hyn në fuqi menjëherë dhe do të mbetet në zbatim deri në vlerësimin e mëtejshëm të situatës nga autoritetet përkatëse ndërkombëtare dhe nga AUV”, thuhet në njoftim.

Ky njoftim vjen pasi Kosova ndaloi importin e shpezëve dhe produkteve të tyre nga Gjermania javën e kaluar.

| Radio Evropa e Lirë

Vendimi i sotëm i Këshillit të Përgjithshëm të Lëvizjes Vetëvendosje për të propozuar Glauk Konjufcën për mandatar të Qeverisë ka nxitur reagimin e disa partive parlamentare.

Kështu, Partia Demokratike e Kosovës  e cilësoi propozimin e Konjufcës si “humbje kohe” dhe “zvarritje të panevojshme”, pasi sipas PDK-së, as ky propozim për mandatar nuk e ka shumicën shqiptare në Kuvend.

“Aktualisht, zgjidhja e vetme e drejtë dhe demokratike janë zgjedhjet e reja të parakohshme, që do t’i kthejnë sovranit, qytetarit të Republikës së Kosovës, të drejtën për të vendosur drejtimin e ardhshëm të vendit dhe për t’i dhënë legjitimitet institucioneve të reja”,tha PDK-ja përmes një kumtese për media.

Kryetari i Lidhjes Demokratike të Kosovës, Lumir Abdixhiku, propozimin e cilësoi si “shfaqje teatrale”  e cila është në kundërshtim me vullnetin e partive shqiptare.

“Dua të besoj se presidentja e Republikës, do të respektojë vullnetin e shumicës shqiptare, para mbledhjeve propaganduese të partive me mandatarë plot por pa shumicë parlamentare. Ky vullnet i është deponuar Presidentes javën që shkoj, haptazi dhe qartë”, shkroi Abdixhiku në Facebook.

Kurse, kryetari i i Aleancës për Ardhmërinë e Kosovës, Ramush Haradinaj, tha se presidentja nuk ka mandat që ta mandatojë askënd për formimin e qeverisë pa dëshminë se kandidati i nominuar e ka shumicën e nevojshme.

“Shumica e nevojshme dëshmohet vetëm me nënshkrime të deponuara të deputetëve. Në çdo situatë tjetër presidentja bën shkelje të rëndë kushtetuese. Kandidatura e dytë nga VV për qeveri është veç përpjekje për të vazhduar kapjen e institucioneve të shtetit, në kundërshtim me krejt normat kushtetuese e politike. Kjo farsë duhet të marrë fund menjëherë dhe vendi të shkojë në zgjedhje të jashtëzakonshme”, shkroi Haradinaj në Facebook.

Tani, mbetet të shihet nëse presidentja Vjosa Osmani do ta mandatojë Konjufcën për krijimin e Qeverisë apo do t’i shpallë zgjedhjet e reja parlamentare.