Dy të rinj, shtetas të Kosovës, kanë humbur jetën te Rana e Hedhun në Shëngjin, pasi u morën nga dallgët e forta dhe rrymat detare.

Në njoftimin zyrtar, policia e Lezhës shkruan se ngjarja e rëndë ndodhi kur pesë të rinj nga Kosova u futën për t’u larë në det, por u morën nga dallgët e krijuara nga erërat e forta.

Pas reagimit të menjëhershëm të disa qytetarëve me Jet Ski në koordinim me policinë, ata u nxorën nga deti dhe u transportuan për ndihmë mjekësore në spitalin e Lezhës.

Si pasojë, dy prej tyre kanë humbur jetën, ndërsa tre të tjerët ndodhen në gjendje të rëndë shëndetësore.

Njoftimi i policisë:

Shëngjin, Lezhë/Informacion paraprak

“Rreth orës 16:30, shërbimet e Policisë kanë marrë njoftim se në zonën e Ranës së Hedhun, në Shëngjin, disa shtetas që ishin futur në det për t’u larë, si pasojë e dallgëve të shkaktuara nga era e fortë, ndodheshin në vështirësi dhe rrezikonin të mbyteshin.

Menjëherë pas marrjes së njoftimit, në adresën e dhënë kanë shkuar shërbimet e Policisë Kufitare, shërbimet e Drejtorisë Vendore të Policisë Lezhë, si dhe ato të emergjencës.

Falë reagimit të menjëhershëm të qytetarëve me Jet Ski, në bashkëpunim me shërbimet e Policisë, u bë e mundur nxjerrja nga deti e 5 shtetasve nga Kosova, të cilët u transportuan me urgjencë në Spitalin Rajonal Lezhë për marrjen e ndihmës mjekësore.

Sipas informacionit paraprak nga Urgjenca e Spitalit Rajonal Lezhë, 2 prej shtetasve kanë humbur jetën, ndërsa 3 shtetasit e tjerë po marrin ndihmë mjekësore.

Grupi hetimor, nën drejtimin e Prokurorisë, vijon veprimet për zbardhjen e plotë të rrethanave të ngjarjes”, ka njoftuar policia e Shqipërisë.  

Policia e Kosovës ka njoftuar se ka arrestuar një person të dyshuar si zjarrvënës pasi një shtëpi është përfshirë nga zjarri në Ferizaj.

Sipas raportit 24 orësh të policisë rasti ka ndodhur të martën, në ora 12:00.

Ferizaj / 02.06.2026 – 12:00

” Ankuesi mashkull kosovar ka njoftuar se shtëpia e tij është përfshirë nga zjarri. Sipas dëshmitarëve dyshohet se një person i dyshuar mashkull kosovar e ka shkaktuar zjarrin, i cili është arrestuar dhe me vendim të prokurorit është dërguar në mbajtje.”

Ministria e Industrisë, Ndërmarrësisë, Tregtisë dhe Inovacionit ( MINTI) ka gjobitur edhe me 110 mijë euro KEDS-in, pasi bazuar në ankesat e qytetarëve dhe pas verifikimeve të kryera në terren, është gjetur se 18 njehsorë elektrikë kanë qenë me afat të skaduar të vlefshmërisë, dy janë tërhequr, ndërkaq 30 njehsorë kishin pasaktësi në datë dhe orë.

“Bazuar në gjetjet e evidentuara dhe në përputhje me Ligjin për Metrologjinë, Inspektorati Qendror i Tregut ka shqiptuar ndaj KEDS-it gjoba në vlerë prej 110,000 euro. Ndërkohë, raportet zyrtare të verifikimit janë dorëzuar edhe te KESCO, me qëllim të kompensimit të konsumatorëve të dëmtuar” thuhet në njoftim.

Sipas njoftimit, procesi i verifikimit të njehsorëve do të vazhdojë edhe në periudhën e ardhshme, deri në trajtimin dhe shqyrtimin e plotë të të gjitha ankesave të paraqitura në Departamentin për Mbrojtjen e Konsumatorit.

Ndërkohë, Zyra e Rregullatorit për Energji (ZRrE) kishte njoftuar se të gjithë konsumatorët që vërtetohet se janë dëmtuar do të kompensohen plotësisht.

Në fillim të muajit prill të këtij viti, Prokuroria Themelore në Prishtinë e autorizoi Policinë të kryente hetime lidhur me parregullsitë e njehsorëve të rrymës.