Kosovë

Aktakuzë ndaj 7 personave – në mesin e tyre edhe një polic

Published

2 years ago

04 March, 2024

Prokuroria Themelore në Prishtinë ka ngritur aktakuzë ndaj shtatë personave, për veprat penale keqpërdorim i detyrës zyrtare, organizim të skemave piramidale dhe bixhozit të paligjshëm dhe mbajtje në pronësi, kontroll ose posedim të paautorizuar të armëve.

Njëri nga të akuzuarit është zyrtar policor, i cili dyshohet se ishte i caktuar për trajtimin e rasteve të dhunës në familje dhe sipas komunikatës për media, ai me dashje e ka keqpërdorur detyrën e tij zyrtare, duke i krijuar favore personit tjetër.

“Sipas aktakuzës, i pandehuri S.N., në cilësinë e personit zyrtar, i caktuar për trajtimin e rasteve të dhunës në familje, me dashje dhe dijeni e ka keqpërdorur detyrën e tij zyrtare, duke i krijuar favore personit tjetër në atë mënyrë që gjatë zbatimit të masave të veçanta hetimore, i pandehuri në kundërshtim me detyrat e tija zyrtare, kishte komunikuar përmes telefonit dhe pa autorizim, me avokatin e të dyshuarit-tani i ndjerë, i cili ka qenë i dyshuar për veprën penale të dhunës në familje, me qëllim të mundësimit të lirimit të tij fillimisht nga masa e ndalimit”.

“Më pas duke i mundësuar të takohej dhe të ketë kontakte me familjarët e tij e me persona të tjerë, si dhe duke kërkuar edhe nga zyrtarët e tjerë policorë që ishin në zbatim të vendimit të prokurorit të shtetit mbi ndalimin e të dyshuarit-tani i ndjeri, që t’ia mundësonin kontaktet me familjarët dhe personat e tjerë, kështu duke vazhduar edhe me pengimin e zbatimit të masës së paraburgimit”, thuhet në komunikatë.

Ndërkaq, të dyshuarit tjerë në vende të ndryshme të Prishtinës bëhet e ditur se kanë organizuar, ndihmuar dhe marrë pjesë në lojëra të fatit, përmes një faqes së internetit dhe përdorimit të telefonave.

“Të pandehurve Rr.K. dhe G.H., pas zbatimit të urdhëresës së lëshuar nga gjykata për kontroll u janë gjetur në posedim armë pa autorizim nga organi kompetent. Prokurori i Shtetit me rastin e ngritjes së aktakuzës i ka propozuar gjykatës që të pandehurit të shpallen fajtor dhe të dënohen sipas ligjit për veprat penale të cilat iu vihen në barrë, si dhe për të pandehurin S.N., ka propozuar që t’i ndalohet ushtrimi i funksionit në administratë publike apo funksioneve në shërbime publike”, ka njoftuar prokuroria.

Related Topics:Aktakuzë Armë Arrest bixhoz Kosove Policia

Up Next

Arrestohet në flagrancë për grabitje në një barnatore në Prishtinë

Don't Miss

Një 70 vjeçar u gjet i vdekur në Sllovi të Lipjanit

Click to comment

Kosovë

Arrestohet i dyshuari për vrasjen e dy vëllezërve në Golluboc të Malishevës

Published

2 days ago

07 November, 2025

Redaksia

Policia e Kosovës ka arrestuar të dyshuarin për vrasjen e dy vëllezërve që ndodhi të enjten në fshatin Golluboc të Malishevës.

I dyshuari Astrit Isufi është arrestuar mëngjesin e sotëm rreth orës 06:25, në fshatin Pllaqicë dhe në koordinim me Prokurorin e Shtetit, janë ndërmarrë të gjitha veprimet e nevojshme hetimore për ndriçimin e plotë të rastit..

“Sot, më datë 07.11.2025, rreth orës 06:25, në fshatin Pllaqicë, është arritur të arrestohet personi i dyshuar A. I. (1983), mashkull kosovar. Pas arrestimit, të dyshuarit i është ofruar trajtim mjekësor, pasi i njëjti ka pasur plagë që dyshohet të jetë shkaktuar nga arma e zjarrit. Ai është dërguar për trajtim të vazhduar mjekësor”, thuhet në njoftimin e policisë.

I arrestuari Isufi që dyshohet se vrau dy vëllezërit, njëri 32 e tjetri 45 vjeç, është dhëndri i tyre.

Ndërkaq, sipas Prokurorisë Themelore në Prishtinë, i dyshuari ka aktakuzë për “dhunë në familje” dhe “kanosje”, për të cilën ishte dërguar në paraburgim në prill të këtij viti.

Kosovë

Vriten dy vëllezër në Malishevë, dorasi i dyshuar në arrati

Published

3 days ago

06 November, 2025

Redaksia

Dy vellezër të moshës madhore janë vrarë me armë zjarri të enjten në një fshat të Malishevës, konfirmoi për Radion Evropa e Lirë një zëdhënës i Policisë së Kosovës.

Sheremet Elezi, zëdhënës i policisë për rajonin e Gjakovës, tha për REL-in se autoritetet janë në kërkim të të dyshuarit.

I dyshuari i kishte qëlluar ata me armë zjarri të enjten pak para mesditës në fshatin Golluboc të Malishevës, në pjesën qendrore të Kosovës, tha Elezi.

Ata janë dërguar më pas në Qendrën e Mjekësisë Familjare në fshatin e afërt, Kijevë, ku mjekët konstatuan vdekjen e tyre.

“Personeli mjekësor në QMF ka konstatuar vdekjen e viktimave. Njësitë e nevojshme policore i janë përgjigjur menjëherë rastit dhe kanë dalë në vendin e ngjarjes”, tha Elezi.

Ndërkohë, drejtori i policisë për rajonin e Gjakovës, Lumni Graishta, tha për mediat lokale se dorasi i dyshuar është dhëndri i viktimave.

Ai shtoi se motivet e vrasjes së dyfishtë besohet se kanë të bëjnë me “një fjalosje mes tyre”.

Vrasja e tyre vjen pak muaj pasi në pjesë të ndryshme të vendit ndodhën pesë vrasje vetëm në muajin gusht.

Njohësit e çështjeve të sigurisë kanë bërë thirrje disa herë që shteti të bëjë më shumë për konfiskimit të armëve të jashtëligjshme, pasi argumentojnë se ato mund të gjenden lehtë në tregun e zi.

Ata, po ashtu, kërkojnë rritjen e operacioneve policore, për të ulur numrin e incidenteve të armatosura.

| Radio Evropa e Lirë

Kosovë

Kosova heton tentim-vrasjen e një zyrtari të BE-së

Published

4 days ago

05 November, 2025

Redaksia

Prokuroria Speciale e Kosovës tha se po heton rastin e therjes me mjete të mprehta të një zyrtari të Zyrës së Bashkimit Evropian, teksa nga kjo zyrë e bllokut evropian u shprehën “të tronditur” për rastin që ndodhi në Gjakovë më 4 nëntor.

“Në koordinim me njësitë relevante të Policisë së Kosovës, Prokuroria Speciale është duke ndërmarrë të gjitha masat e nevojshme hetimore me qëllim të zbardhjes së plotë të gjendjes faktike”, tha për Radion Evropa e Lirë, Arbnora Luta, zyrtare e lartë për komunikim me publikun në Prokurorinë Speciale.

Nga Prokuroria Speciale thanë se rasti është në fazën fillestare të hetimeve dhe me qëllim të ruajtjes së integritetit të procesit hetimor, “në këtë fazë nuk mund të ndajmë më shumë informacione”.

Zëdhënësi i zyrës së BE-së në Kosovë, Nikola Gaon, tha për Radion Evropa e Lirë se janë “të tronditur nga lajmi dhe i urojmë pjesëtarit të stafit shërim të shpejtë”.

“Është duke u zhvilluar një hetim nga autoritetet për të zbardhur faktet. Prandaj, për shkak se hetimi po vazhdon, aktualisht nuk jemi në gjendje të ofrojmë detaje të tjera për këtë rast”, tha Gaon.

Detaje të hollësishme për rastin, që është klasifikuar si “vrasje në tentativë”, nuk është dhënë as nga Policia e Kosovës.

Në raportin 24-orësh të saj thuhet se ky shtetas i huaj në orët e mbrëmjes së 4 nëntorit ka kërkuar ndihmë mjekësore në Qendrën e Mjekësisë Familjare në Gjakovë. Ai, sipas Policisë ka pësuar dy plagë dhe me udhëzim të mjekut kujdestar është dërguar për trajtim në Qendrën Klinike Universitare të Kosovës.

Ndërkaq, media lokale Sinjali, duke u thirrur në burime, ka raportuar gjatë ditës se zyrtari i BE-së është therur në gjoks dhe qafë. Kjo media e ka identifikuar atë si Stefan Ilianov Sheynov, rreth 49 vjeç.

| Radio Evropa e Lirë