Gjykata Supreme e Kosovës i ka shfuqizuar dy nene të udhëzuesit për liberalizimin e tregut të energjisë, duke thënë se ato kanë krijuar pasiguri juridike dhe ekonomike për konsumatorët e energjisë elektrike në vend.

Në një njoftim për media, gjykata njoftoi se e pranoi padinë e Odës Ekonomike të Kosovës kundër Zyrës së Rregullatorit për Energji (ZRRE), e cila në qershor urdhëroi bizneset e mëdha të dalin në treg të lirë të energjisë.

Gjykata i shpalli të paligjshme dhe i shfuqizoi nenin 8 të udhëzuesit për liberalizimin e tregut të energjisë elektrike nga janar 2017, dhe nenin 2 të udhëzuesit për ndryshimin dhe plotësimin e këtij udhëzuesi.

Ajo tha se gjeti se “mospërputhjet ndërmjet dispozitave ligjore dhe dispozitave të akteve nënligjore normative kanë ndikuar në krijimin e një situate të pasigurisë juridike dhe ekonomike për konsumatorët e energjisë elektrike, duke e bërë të domosdoshme ndërhyrjen e gjykatës”.

Supremja erdhi në përfundim se kufiri ndërmjet konsumatorëve që gëzojnë të drejtën e furnizimit universal dhe atyre që janë të detyruar të kalojnë në tregun e lirë, nuk është përcaktuar në mënyrë të qartë dhe të parashikueshme.

Ajo gjeti gjithashtu se disa dispozita të udhëzuesve të ZRRE-së nuk përputheshin me ligjin për energjinë elektrike në Kosovë, dhe direktivat e Bashkimit Evropian për energjinë.

Vendimi i qershorit i rregullatorit të energjisë i detyroi të gjitha bizneset e mëdha në vend – me mbi 50 punëtorë dhe qarkullim vjetor mbi 10 milionë euro – të dalin në treg të lirë të energjisë.

Kjo do të thotë se këto biznese nuk furnizohen më me tarifa të rregulluara pra në tregun universal, por blejnë energjinë sipas ofertave të kompanive private, të licencuara për tregtim.

Sipas ZRRE-së, në këtë proces janë të përfshira rreth 1.300 biznese, që konsumojnë rreth 37% të energjisë së përgjithshme.

Komuniteti i biznesit e ka kundërshtuar vendimin, përfshirë përmes protestave, duke e vlerësuar të dëmshëm për shkak të çmimeve të larta që po ofrojnë furnizuesit e licencuar.

Në total 27 kompani janë të licencuara për tregtim me energji elektrike – dhe tri të tjera në proces licencimi.

Procesi i liberalizimit të tregut të energjisë i ka goditur rëndë bizneset prodhuese, duke rritur ndjeshëm kostot dhe duke kufizuar mundësitë e tyre për zgjerim dhe punësim.

Kompania “Pestova” në Vushtrri – e cila merret me përpunimin dhe prodhimin e patates dhe numëron 260 punëtorë të rregullt – i tha Radios Evropa e Lirë se e ka ndaluar një linjë të re prodhimi dhe e ka pezulluar punësimin e 20 punëtorëve të rinj, për shkak të rritjes së çmimeve të energjisë.

Edhe pse ka shpenzuar 4% më pak rrymë në shtator të këtij viti, fatura e saj është rritur nga 10.962 euro në 25.535 euro – një rritje mbi 100% krahasuar me vitin e kaluar.

| Radio Evropa e Lirë

Në Qendrën e Numërimit dhe Rezultateve ka përfunduar numërimi i votave nga diaspora për balotazhin e zgjedhjeve lokale. Numërimi i votave me kusht dhe atyre me nevoja të veçanta kishte përfunduar të premten.

Edhe pas numërimit të të gjitha këtyre votave, nuk kanë ndryshuar rezultatet sa i përket fituesve të garave për kryetar në 18 komunat ku u zhvillua balotazhi.

Kështu, në Viti, ku rezultati ishte i ngushtë, fitues doli kandidati i LDK-së, njëkohësisht kryetari aktual i kësaj komune, Sokol Haliti.  Ai fitoi garën ndaj Arsim Ademit nga LVV-ja me një diferencë prej vetëm 136 votave.

Edhe në Junik, pas numërimit të mbi 900 votave nga diaspora dhe 71 votave të personave me nevoja të veçanta, fitoi kandidati i LDK-së, Ruzhdi Shehu me 57.35% derisa kundër kandidati i tij, Agron Kuçi nga AAK-ja, mori 42.65% të votave të junikasve.

Komisioni Qendror i Zgjedhjeve (KQZ) ka njoftuar se në Qendrën e Numërimit dhe Rezultateve (QNR)  ka filluar numërimi i fletëvotimeve të votimit me postë për raundin e dytë të zgjedhjeve për Kryetarë të 18 komunave.

Nga procesi i vlerësimit të 12,018 pakove të ardhura me postë, deri tani janë aprovuar 8932 pako derisa janë refuzuar 3086 sosh.

Sipas KQZ-së, arsyeja kryesore e refuzimit është mungesa e dëftesës së regjistrimit , e cila është evidentuar në 3,009 raste.

Për shkak të distancës, pritet të arrijnë 519 pako nga ShBA, Kanadaja dhe Australia, të cilat pas mbërritjes do të vlerësohen dhe numërohen.

Në zgjedhjet e fundit lokale numri i qytetarëve të regjistruar për votim me postë për këto 18 komuna ishte 29,752 votues.

Të premten janë numëruar rreth 750 fletëvotime nga votimi me kusht i mundësuar në vnevotime të veçanta dhe 1,441 fletëvotime nga votimi i personave me nevoja të veçanta, i mundësuar jashtë vendvotimeve përmes ekipeve mobile.

Rezultatet nga numërimi i fletëvotimeve me kusht dhe nga votimi i personave me nevoja të veçanta janë publikuar në platformën e rezultateve: https://resultslocal2025r2.kqz-ks.org/ në hapësirën e veçantë Rezultatet QNR.

Në të njëjtën platformë do të publikohen dhe rezultatet pas numërimit të fletëvotimeve nga votimi jashtë Kosovës.