Gjykata Supreme e Kosovës ka hedhur poshtë një ankesë të parashtruar nga dy anëtarë të Lëvizjes Vetëvendosje (LVV) kundër një vendimi të Panelit Zgjedhor për Ankesa dhe Parashtresa (PZAP) për ta urdhëruar Komisionin Qendror të Zgjedhjeve (KQZ) që ta certifikojë Listën Serbe për pjesëmarrje në zgjedhjet lokale.

“Hedhet poshtë si e palejuar ankesa e parashtruar nga Sami Kurteshi dhe Alban Krasniqi”, thuhet në aktvendimin e 28 gushtit të Supremes.

Gjykata ka thënë se “duke u nisur nga fakti se ankesa ndaj vendimit të PZAP-it në Gjykatën Supreme është parashtruar nga Sami Kurteshi dhe Alban Krasniqi në cilësinë e anëtarit individual të KQZ-së, të njëjtit nuk kanë të drejtë, përkatësisht nuk kanë legjitimitet që të parashtrojnë ankesë në emër të tyre personalisht, pasi që nuk janë palë të drejtpërdrejta sipas vendimit të PZAP-së”.

“Kjo për faktin se sipas vlerësimit të kolegjit të kësaj gjykate të drejtë për të paraqitur ankesë në Gjykatën Supreme ndaj vendimit të PZAP-it, përveç personave që kanë interes ligjor (të përcaktuar me paragrafin 1 të nenit 119), ka vetëm KQZ-ja, përkatësisht zyra e saj, ashtu siç është e përcaktuar me Ligjin për Zgjedhjet e Përgjithshme, përkatësisht nenin 119 paragrafi 2, e jo anëtarët individual të saj. Për më tepër, këta të fundit e shprehin mendimin e tyre gjatë procesit të vendimarrjes brenda KQZ-së, por nuk legjitimohen që të veprojnë si palë individuale në procedurë gjyqësore, siç është edhe rasti konkret”, thuhet në aktvendim.

Supremja ka thënë se kolegji i saj nuk është lëshuar në shqyrtimin meritor të çështjes së ngritur me ankesë nga ankuesit.

PZAP-ja e urdhëroi javën e kaluar komisionin zgjedhor ta certifikojë partinë më të madhe të serbëve në Kosovë – e cila gëzon mbështetjen e Beogradit zyrtar – pak ditë pasi asaj iu mohua regjistrimi për pjesëmarrje në zgjedhjet e 12 tetorit.

Dy anëtarët e LVV-së në KQZ, Kurteshi dhe Krasniqi, ishin të vetmit që votuan kundër certifikimit të kësaj partie.

Ky rast ishte pothuajse një përsëritje e rastit të zgjedhjeve të përgjithshme të shkurtit, kur LVV e kishte kundërshtuar deri në Supreme pjesëmarrjen e Listës Serbe në zgjedhje, por pa sukses.

Vendimi për moscertifikimin e Listës Serbe është kritikuar nga vendet e QUINT-it dhe nga Bashkimi Evropian, të cilat i bënë thirrje Qeverisë në detyrë dhe partive politike të mos ndërmarrin ndonjë hap tjetër për ta penguar regjistrimin e Listës Serbe për zgjedhjet e tetorit.

Lista Serbe vendosi të garojë në zgjedhjet e sivjetshme lokale, pasi kishte bojkotuar zgjedhjet e kaluara lokale, duke bërë që kryetarët shqiptarë ta merrnin dhe mbanin pushtetin në katër komunat me shumicë serbe në veri të vendit nga maji i vitit 2023.

Nëse certifikohet, Lista Serbe pritet t’i rimarrë të gjitha katër komunat veriore: Mitrovicë e Veriut, Leposaviq, Zveçan dhe Zubin Potok.

| Radio Evropa e Lirë

Presidentja e Kosovës, Vjosa Osmani, ka bërë thirrje për konstituim sa më të shpejtë të Kuvendit dhe formim të qeverisë së re.

Osmani vlerëson se formimi i institucioneve të reja është urgjencë shtetërore.

“Që Kuvendi të konstituohet urgjentisht, që qeveria të zgjidhet po ashtu urgjentisht, çdo ditë e humbur është ditë e humbur për Kosovën, për popullin e saj, për perspektivën tonë euroatlantike, kështu që shpresoj që të gjendet një zgjidhje në përputhje me Kushtetutën”, tha presidentja Osmani pas homazheve te Monumenti i Personave të Zhdukur.

Pas zgjedhjes së kryetarit dhe 4 nënkryetarëve të kuvendit konstituimi ngeci te votimi i kandidatit për nënkryetar nga pakica serbe. Pasi deri tani asnjë kandidat i propozuar nga Lista Serbe nuk i fitoi votat e mjaftueshme, në vazhdimin e nesërm të seancës, deputetët  mund të votojnë vetëm njërin nga tre deputetët të cilët kanë të drejtë të  propozohen nga pakica serbe.  

Deputeti nga pakica serbe, Nenad Rashiq, ka dështuar, për herë të dytë, të zgjidhet nënkryetar i Kuvendit të Kosovës.

Në votimin e sotëm Rashiq i mori 56 vota për, 1 kundër dhe 20 abstenime.

Pasi kryetari i Kuvendit të Kosovës, Dimal Basha, e ndërpreu seancën dhe thirri partitë parlamentare për konsultime për zgjedhjen e nënkryetarit nga pakica serbe, Rashiq u tha mediave se propozimi i tij për nënkryetar të Kuvendit nuk do të jetë antikushtetues.

Ai tha se nga aspekti ligjor, atij i mundësohet të propozohet pavarësisht mbështetjes së deputetëve nga komuniteti serb.

“Votimi për mua nuk është kundërkushtetues. Kam pasur konsulta me njerëz që janë më kompetentë në aspektin ligjor dhe ata më kanë treguar se veprimi i tillë nuk është antikushtetus. Prita edhe unë që sot do t’i kem votat”, tha Rashiq.