Ferizaj

Drejtorisë së Arsimit i dështon plani për privatizimin e 6 çerdheve të Ferizajt

Published

2 years ago

31 July, 2024

Kuvendi Komunal i Ferizajt nuk ka pasur kuorum pas diskutimeve për ta kaluar propozimin e Drejtorisë së Arsimit që të privatizohen gjashtë çerdhe publike në qytet dhe fshatra, në afat prej pesëmbëdhjetë vjetësh pasi disa kuvendarë të koalicionit të udhëhequr nga PDK-ja e kanë lëshuar sallën bashkë me kolegët e opozitës në seancën e sotme.

Drejtori i Arsimit, Afrim Llabjani, ka thënë se ligjet dhe udhëzimet administrative lejojnë funksionimin e çerdheve me partneritet publiko-privat. Por, Komuna ende nuk ka bërë zgjidhje të qëndrueshme për pagat e dy çerdheve publike në qytet, që për dy vite kishin funksionuar bazuar në një kontratë të lidhur me organizatën “Caritas Kosova” për t’i rekrutuar dhe paguar edukatoret dhe stafin e tyre. Komuna nuk kishte buxhet të planifikuar për ta dhe edukatoret janë përballur qe disa muaj me vonesa pagash.

Me propozimin e ri, parashihej që nga ky ndryshim statusorë të përfshijë çerdhen funksionale në “Lagjen e re” dhe atë afër tregut të gjelbër, bashkë me objektet e çerdheve jofunksionale në Talinoc të Jerlive, Greme, Lloshkobare dhe objekti i papërfunduar në rrugën “Rexhep Bislimi” në qytet.

Në Lloshkobare synohet të kthehet në çerdhe shkolla e re, e cila asnjëherë nuk u lëshua për nxënës derisa komuniteti e hap për të pame kur vdes dikush në afërsi.

Opozita e ka akuzuar Qeverinë e kryetarit Agim Aliu se dëshiron t’ua japë çerdhet “njerëzve të pushtetit”, por nuk ka ofruar emra konkretë. Pushteti i ka hedhur poshtë akuzat. Propozimi është lënë që të diskutohet edhe në seancën e ardhshme kur pozita shpreson se do ta ketë kuorumin dhe numrat për ta kaluar.

Debat mes pozitës e opozitës ka nxitur edhe raporti i Zyrës Kombëtare të Auditorit, që dëshmon se Komuna e Ferizajt nënshkroi kontrata me kompani private në vlerë prej miliona eurosh pa pasur planifikime të domosdoshme ligjore për financimin e tyre me projektimet buxhetore. Ndryshe nga debati për çerdhet, askush nga kuvendarët e pushteti nuk i ka dalë në krah Qeverisë së Aliut, i cili në raport është pajtuar me të gjithë gjetjet e keq menaxhimit financiar.

Ferizaj

Bëhet i ditur identiteti i viktimave të aksidentit tragjik në Gjermani

Published

18 hours ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

24 hours ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

3 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.