Kosovë

Familja tetë anëtarëshe bëhet me shtëpi të re

Published

8 years ago

10 May, 2018

Shoqata humanitare “Feniks”, sot ka përuruar shtëpinë e parë për këtë vit. Përfituese e kësaj shtëpie është familja tetë anëtarëshe e Abaz Krasniqit nga fshati Qallapek i komunës së Lipjanit. Iniciatorja për ndërtimin e kësaj shtëpie për familjen Abazi, Flora Gashi, tha se duke e parë gjendjen e rëndë në të cilën jetonte kjo familje, ka vendosur të kërkoj ndihmë për të.

“Iniciativa ka filluar kur Zana Krasniqi, e zonja e shtëpisë, ka filluar të kërkoj ndihmë nëpër grupe të ndryshme në rrjete sociale, një vit rresht ka kërkuar ndihmë, por nuk e ka përkrah askush, as komuna, as ndonjë njeri dhe vendosa me ardhë me vizitu dhe e pashë gjendjen se ku jetonin dhe bashkë me shoqet e mija kemi lobu nëpër grupe të ndryshme dhe donatorë që kemi hasur është një grup nga Suedia”, tha Gashi.

Ndërsa, donatori Avdullah Krasniqi, tha se humanizmin do ta vazhdoj edhe më tej.

“Ndjenjat janë shumë të mira kur një familje gëzohet dhe së bashku me dy shokë të tjerë mundohemi të ndihmojmë familje dhe kur ke vetë fëmijë e kupton edhe gjendjen e të tjerëve”,theksoi Krasniqi.

Kryetari i shoqatës “Feniks”, Milaim Jashari, tha se tashmë kanë vënë gurthemelin edhe për disa shtëpi dhe kjo po bëhet falë njerëzve të vullnetit të mirë.

“Kemi shtëpinë e dytë që do ta lëshojmë në Shqipëri ku motrat tona nga Suedia dhe diaspora kanë grumbulluar 14 mijë e 500 euro dhe shumë shpejtë do të gëzohet edhe ajo familje si kjo sot, po ashtu “Eli-Abi” ka filluar edhe dy shtëpi të tjera, po ashtu edhe katër të tjera është duke i marrë për me i ndërtu, unë i falënderoj të gjithë donatorët që na përkrahin dhe këtë besim e kemi fituar me punë dhe vepër e jo me fjalë”, u shpreh Jashari.

Falënderues ndaj kontribuuesve që e bën me shtëpi të re u shpreh kryefamiljari Abaz Krasniqi, i cili tha se me forca të veta asnjëherë nuk do të mund ta ndërtonte këtë shtëpi.

“Falë donatorëve, bamirësve u bëra me shtëpi të re dhe jam i kënaqur, falënderoj Zotin së pari, mandej Flora Gashin e cila ka qenë dy herë na ka vizitu e ka pa gjendjen, unë me një social nuk kisha mundur kurrë me pa kësi shtëpie, falënderoj të gjithë, Avdullah Krasniqin, po ashtu edhe “Feniks”-in, që ka dhënë kontribut në ndërtim dhe nuk ka kursy asgjë”,tha Krasniqi.

Shoqata humanitare “Feniks”, vetëm gjatë vitit të kaluar ka ndërtuar 24 shtëpi, ndërsa që nga themelimi kjo shoqatë ka bërë me kulm mbi kokë 223 familje.

Kosovë

Mblidhen deputetët për seancën konstituive të Kuvendit të Kosovës

Published

24 hours ago

06 August, 2026

Redaksia

Deputetët që fituan mandatin përfaqësues në zgjedhjet e qershorit, mblidhen sot nga ora 10:00, për të nisur seancën konstituive të Kuvendit të Kosovës.

Në rend dite janë formimi komisionit për verifikimin e mandateve, betimi i deputetëve si dhe zgjedhja e kryetarit dhe e nënkryetarëve të Kuvendit.

Me konstituimin e Kuvendit nis edhe afati prej 60 ditësh për zgjedhjen e presidentit kurse afati prej 15 ditëve për votimin e qeverisë fillon vetëm pasi ushtruesja e detyrës së presidentit ta mandatojë kandidatin e propozuar nga shumica parlamentare.

Kjo është hera e dytë që të zgjedhurit e popullit provojnë të formojnë institucione të qëndrueshme, pas zgjedhjeve të njëpasnjëshme parlamentare të shkaktuara nga mungesa e konsensusit politik për zgjedhjen e presidentit të vendit.

Ferizaj

Qytetarëve u vijnë mesazhe mashtruese – Policia apelon për kujdes

Published

2 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.

Kosovë

LDK kërkon postin e presidentit

Published

2 days ago

05 August, 2026

Redaksia

Deputetë të zgjedhur të Lidhjes Demokratike të Kosovës kanë shprehur qëndrimin se kërkesa e partisë së tyre është që të kenë postin e presidentit.

Hykmete Bajrami dhe Jehona Lushaku Sadriu artikuluan këtë kërkesë, një ditë pasi kreu i LDK-së, Lumir Abdixhiku, dhe ai i Lëvizjes Vetëvendosje, Albin Kurti, nuk arritën ndonjë marrëveshje për krijimin e institucioneve të reja.

Lushaku Sadriu tha se LDK gjithmonë ka kërkuar që institucionet e vendit të sigurojnë një balancë mes fuqive politike.

“Pra edhe në këtë kuptim, domethënë kërkesa jonë është që presidenti t’i takojë LDK-së, në kuptimin që të diskutojmë së bashku për gjithë pushtetin edhe pastaj të bëhet ndarja në mënyrë proporcionale. Ky ka qenë qëndrimi”, tha Lushaku-Sadriu për mediat para mbledhjes së Grupit Parlamentar të LDK-së.

Ndërkaq Bajrami tha për mediat se nuk i di detajet e takimit të djeshëm, por iu duk se Abdixhiku po insiston “me të drejtë” po insiston që partia e tij të ketë postin e presidentit.

“Mendoj se pozita e presidentit do të siguronte një balancim të pushteteve në Kosovë dhe do të ishte një siguresë si për Kosovën, ashtu edhe për Lidhjen Demokratike të Kosovës”, tha Bajrami.

Sipas saj, ofrimi i posteve ministrore nga LVV-ja nuk ofron garanci.

Pas takimit të tyre, që zgjati mbi tri orë, Kurti dhe Abdixhiku shprehën qëndrime të ndryshme sa i përket presidentit – moskonsensusi për të cilin muaj më parë mes partive nxiti zgjedhjet e 7 qershorit.

Kurti insistoi se Kosovës i duhet një president konsensual, jopartiak, ndërkaq Abdixhiku tha se president konsensual është kushdo që i merr 80 vota të deputetëve.

Në zgjedhjet e qershorit, LDK-ja garoi me Vjosa Osmanin edhe për një mandat në krye të shtetit.

“President konsensual është secili president që i merr 80 vota. LDK duhet të ndihet e përfaqësuar për t’i pasur votat e veta”, tha Abdixhiku mbrëmjen e 4 gushtit.

Osmani, së bashku me nënkryetarin e LDK-së, Lutfi Haziri, ishin të pranishëm po ashtu në takimin me Kurtin.

Teksa LVV-ja dhe LDK-ja kanë paralajmëruar vazhdimin e bisedimeve, më 6 gusht pritet të mbahet seanca konstituive e legjislaturës së njëmbëdhjetë. Me konstituimin e organit ligjvënës, nis rrjedhja e afateve për formimin e Qeverisë, por edhe të presidentit. Deputetët më pas do të ketë kohë 60 ditë për të zgjedhur një president, në të kundërtën vendi do të shkojë në zgjedhje – të katërtat që nga shkurti i vitit 2025.

LVV-ja ka fituar 58 mandate dhe së bashku me partitë e komuniteteve joshumicë ka votat e mjaftueshme për të konstituuar Kuvendin dhe krijuar Qeverinë e re, pasi për to kërkohen 61 vota në Kuvendin prej 120 deputetësh.

Megjithatë, për zgjedhjen e presidentit nevojitet prania e 80 deputetëve në Kuvendin me 120 vende që votimi për presidentin e Kosovës të jetë i vlefshëm.

Me një marrëveshje të mundshme me LDK-në, e cila i fitoi 18 vende, atëherë do të arriheshin të paktën 81 vota, mjaftueshëm për votimin e presidentit të ri, nëse të paktën 80 prej tyre do të qëndronin në sallë.

| Radio Evropa e Lirë