Organizata ‘’Iniciativa për Progres’’ ka publikuar raportin hulumtues, i cili ka të bëj me indeksin e kënaqshmërisë së qytetarëve ferizajas me shërbimet komunale. U tha se ky raport që përfshinë periudhën prill 2017 deri në prill të këtij viti, ka bërë matjen e kënaqshmërisë së qytetarëve për 15 fusha të shërbimeve bazuar në indikator matës për secilën fushë dhe shërbim. Mesatarja aritmetike e kënaqshmërisë për gjitha shërbimet komunale në Ferizaj është 35.11%, ndërsa e pakënaqshmërisë 35.48%.

Drejtoresha  e INPO-s Albulena Nrecaj, tha se ky hulumtim që po realizohet për herë të dytë në Ferizaj, synon që në baza vjetore të skanoj kënaqshmërinë e qytetarëve me performancën e komunës, rezultatet e së cilës do të ndikonin në prioritizimin e politikave investive dhe ngritjen e cilësisë së shërbimeve komunale.

“Ky raport në mënyrë specifike do të ofroj të dhëna të përgjithshme të kënaqshmërisë me shërbimet administrative, shëndetësinë, arsimin, kulturën, sportin, rininë, infrastrukturën rrugore dhe mirëmbajtjen, parqet, sheshet dhe hapësirat publike, planifikimin urban, ujin e pijshëm, e të tjera. Sa i përket metodologjisë, mostrën e përfaqësimit të kësaj ankete në bazë të të dhënave  të entit të statistikave të Kosovës dhe në bazë të formulës, janë intervistuar 444 qytetarë, ku një anketë përfaqëson 250 qytetarë, gjithashtu anketa është shtrirë në zonën urbane dhe në atë rurale duke i përcaktuar përqindjet në mënyrë të saktë se sa qytetarë do të duhej të jenë të përfaqësuar në të. Ajo çka është e rëndësishme të potencohet është që ky hulumtim marzhën e gabimit e ka plus minus 1.06 për qind, kështu që në bazë të besueshmërisë del se 95 për qind është i besueshëm ky hulumtim”, tha Nrecaj.

Në këtë tryezë ishin të ftuar drejtues të pushtetit lokal dhe legjislativit, por përveç drejtorit të shëndetësisë, në këtë tryezë nuk qenë të pranishëm as kryetari e as kryesuesja e Kuvendit. Pjesëmarrësit e tjerë të cilët numrin më të madh e përbënin asamblistët e LDK-së, vlerësuan se ky dokument do t’iu shërbej si referues i çështjeve të ndryshme që Kuvendi t’i trajtoj për projekte në interes të qytetarëve. Ndryshe, raporti  tregon se sektorët ku përqindjet e pakënaqshmërisë kanë dalë më të larta janë shëndetësia, arsimi, mungesa e parkingjeve publike, hapësirat gjelbëruese, si dhe planifikimi urban e rural. Ndërkaq, si një kënaqshmëri e shprehur prej 51 për qind kanë dalë të jenë shërbimet administrative.