Ferizaj

’’Gjon Serreçi’’ kërkon përmirësim të infrastrukturës shkollore

Published

8 years ago

24 May, 2018

Përvjetori i ditës së shkollës bëri bashkë nxënës e mësimdhënës të cilët ishin dhe janë pjesë e shkollës fillore “Gjon Serreçi” në Ferizaj. Ndër mësimdhënësit e shumtë që pati kjo shkollë, është edhe ish-mësuesja Hatixhe Sahiti, e cila për 44 vjet punoi në këtë shkollë, ku përcolli 11 gjenerata. Sahiti thotë se përgjatë gjithë këtyre viteve sa punoi në arsim, është munduar që tek fëmijët të kultivoj edukimin dhe atdhedashurinë.

“Që 5 vite jam pensionu, kujtimet janë të freskëta çdoherë për këtë shkollë dhe të pashlyeshme se 44 vite radhazi kam punu në këtë shkollë pa ndërpre fare dhe kënaqësi të madhe kam përjetu, sidomos fëmijët të japin atë vullnet, atë kënaqësi dhe të rinojnë çdoherë, edhe pse jam pension nuk jam ndi e lodhur asnjëherë, por gjithmonë kam pas një dashuri të madhe për ta, fëmijët janë një kënaqësi shpirtërore që ta mbajnë forcën e shpirtit, mjafton t’i duash e t’i respektosh, unë kam ndi obligim që në këndin tim të profesionit t’i qëndroj besnike edhe atdheut edhe fëmijëve edhe gjeneratave edhe prindërve që m’i kanë besuar fëmijët që mos të dalin të zhgënjyer nga unë”,tha Sahiti.

E, ish-arsimtari i lëndës së kimisë Latif Osmani, i cili tani është 76 vjeçar, nuk shprehet i kënaqur me respektin që tani iu bëhet mësimdhënësve.

“Këtu kam punu prej vitit 1972-2009, ka qenë shkollë e madhe me emër, gjeneratat të cilat kanë dalë nga “Gjon Serreçi” kanë qenë të njohura jo vetëm për Ferizajn, por për tërë Kosovën, kur kanë shku dhe janë pyetur se ku kanë kryer në bazë të njohurive që kanë pas, ata pak a shumë e kanë ditur se janë nxënës të shkollës ‘’Gjon Serreçi”, tani nuk jam i lidhur me procesin mësimor, por në saje që vërehet dhe dëgjoj nga kolegët nuk është në rregull, përpara mësuesi është çmuar nga nxënësi e institucioni, sot mësuesi është lënë pas dore dhe nuk respektohet nga nxënësit hiç se hiç, por as nga prindërit, e as edhe nga shteti”, tha Osmani.

Ndërsa, mësimdhënësi Driton Halimi, konsideron se çdo vit e më shumë nxënësit po janë të painteresuar për mësim. Ai fajëson edhe organet komunale për mosinvestim infrastrukturor në këtë shkollë.

“Punoj nga viti 2002, në vitet e para kur kam fillu ka qenë një organizim shumë më i mirë, ndoshta gjeneratat e mëhershme kanë pasur një kriter më të ashpër, tani ndoshta metodat, pasi në përgjithësi ka rënie jo vetëm në shkollën tonë, por në të gjitha shkollat tjera, vazhdimisht çdo gjeneratë ka një mungesë apo vullnet për me lexu dhe nëse i krahasojmë rezultatet që kemi pas është mëkat që në këtë shkollë nuk është bërë investim për shumë kohë, madje është bërë edhe një sabotim nga pushtetet dhe mendoj se është bërë një e padrejtë e madhe ndaj këtyre nxënësve e personelit që kanë qenë të shkëlqyeshëm”, theksoi Halimi.

Dy mësimdhënësit e pensionuar, Sahiti e Osmani, patën porosi për mësuesit e rinj.

“Për mësimdhënësit e rinj kisha me thënë që çdoherë ta kenë parasysh edukimin në radhë të parë, por edhe të zhvillojnë ndjenjën e patriotizmit, të atdhedashurisë dhe socializmit të fëmijëve mes tyre, sepse pa këto tri aspekte suksesi është shumë i mangët”, u shpreh Sahiti.

“Aty ku nuk ka disiplinë nxënësit janë pa kujdes, nuk i përfillnin mësuesit, atëherë aty nuk besoj se ka mësim, me i krahasua nxënësit që përfundojnë tani shkollimin me kohën atëherë është dallim i madh dhe kjo sepse disa masa që janë ndërmarrë ndaj tyre pak a shumë ato nuk ekzistojnë më, prandaj ka ardhur deri tek kjo gjendje’’, tha Osmani.

Shkolla fillore ‘’Gjon Serreçi” në Ferizaj, ka 2 mijë e 500 nxënës dhe 150 mësimdhënës.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

2 days ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”