Ferizaj

Nis fushata e korrje-shirjeve, fermerët të pakënaqur me rendimentin

Published

8 years ago

06 July, 2018

Në komunën e Ferizajt ka filluar fushata e korrje-shirjeve, megjithatë rendimentet jo të larta janë ato të cilat po i shqetësojnë fermerët e këtushëm. Xhevat Uka nga fshati Prelez i Jerlive, i cili ka të mbjella rreth 300 hektarë grurë, thotë se breshëri është ai i cili ka ndikuar që rendimentet të jenë të ulëta.

“Dje kemi fillu me korrje-shirje, me rendimente nuk jemi të kënaqur për shkak se ka pasur reshje të breshrit dy herë dhe rendimenti është shumë më i vogël se vitin e kaluar dhe është një dëm i madh, por nuk kemi çka bëjmë”, tha Uka.

Ndërsa, drejtori i Bujqësisë në Ferizaj Burim Bajrami, bëri të ditur se në komunën e Ferizajt janë të mbjella 4 mijë hektarë grurë, duke shfaqur shpresën që rendimenti mesatar të jetë rreth 4 mijë kilogramë për hektarë.

“Dje ka filluar fushata e korrje-shirjeve, në komunën e Ferizajt janë afërisht 4 mijë hektarë të mbjella me kulturën e grurit, fushata po shkon mirë, moti është i mirë, autokombajnerët janë të angazhuar dhe janë rreth 100 autokombajnerë të organizuar, çmimi për një hektarë të korrjes është 100 euro, por varion në bazë të marrëveshjes së kombajnerëve dhe pronarëve të tokës. Kushtet klimatike kanë qenë shumë të disfavorshme për të gjitha kulturat bujqësore, duke përfshi edhe kulturën e grurit, të reshurat e fundit, sidomos breshëri ka ndikuar negativisht dhe presim më pak rendiment, por po shpresojmë që mesatarja të sillet diku 3500-4000 kg për hektarë dhe nëse arrimë këtë mesatare do të ishim të kënaqur edhe ne si drejtori, por edhe bujqit në veçanti”, tha Bajrami.

Përveç rendimenteve të ulëta, fermerët shprehen të pakënaqur edhe me çmimin e grurit në treg që sivjet është 16 cent.

“Nuk jena të kënaqur me çmimin e grurit, kanë vendosur mullinjtë 16 cent është, çmimi shumë i dobët, por kështu është”, u shpreh Uka.

“Jemi shumë të pafuqishëm në këtë drejtim, pasi nuk mund ta përcaktojmë ne çmimin e tregut krejt çka ne kemi pas mundësi me bë kemi bërë uljen e çmimit të naftës për fermerët ferizajas nga 5 cent për litër dhe krejt çka është në mundësinë tonë është kjo çka kemi bërë deri më tani”, tha drejtori Bajrami.

Sipas parashikimeve, nëse kushtet atmosferike janë të përshtatshme fushata e korrje-shirjeve do të përfundojë brenda tri jave.

Ferizaj

Gjatë qershorit në Ferizaj janë konfiskuar 74 motoçikleta

Published

19 hours ago

02 July, 2026

Redaksia

Policia Rajonale e Ferizajt ka bërë të ditur se gjatë muajit qershor ka intensifikuar kontrollet në trafik ndaj drejtuesve të motoçikletave dhe skuterëve.

Si rezultat i këtyre kontrolleve, gjatë kësaj periudhe janë konfiskuar 74 motoçikleta, kryesisht për mungesë të dokumentacionit të rregullt derisa janë shqiptuar edhe 106 gjoba ndaj drejtuesve të motoçikletave, të cilët janë kapur duke qarkulluar në kundërshtim me rregullat dhe ligjet e komunikacionit rrugor.

Numri më i madh i gjobave janë shqiptuar për drejtim të motoçikletës pa patentë shofer, gjithsej 52 gjoba, 46 gjoba për drejtim të motoçikletës pa regjistrim dhe 8 gjoba për kundërvajtje të tjera.

Ferizaj

Prokuroria kërkon paraburgim ndaj të dyshuarës për vrasjen në Ferizaj

Published

4 days ago

29 June, 2026

Redaksia

Prokuroria Themelore në Ferizaj ka kërkuar nga Gjykata Themelore në Ferizaj, caktimin e masës së paraburgimit ndaj të pandehurës A.R., për shkak të dyshimit të veprës penale “Vrasja” sipas Kodit Penal të Republikës së Kosovës.

Sipas kërkesës së Prokurorisë, ekziston dyshimi i bazuar se me datë 28 Qershor 2026, rreth orës 22:40 në Ferizaj, rruga, “Sejdi Sejdiu”, e pandehura ka privuar nga jeta tani të ndjerin F.H., pas një mosmarrëveshje dhe përleshje fizike në mes tyre, me të cilën ka kryer veprën penale “Vrasja”, nga neni 172 të KPRK-së.

Ndërkaq, i dyshuari me iniciale M.B., që ishte ndaluar deri në sqarimin e plotë të rrethanave dhe përfshirjes së tij në rast, me aktvendim të Prokurorit të Shtetit është liruar.

Po ashtu, në këtë rast, lëndime trupore ka pësuar edhe e dyshuara A.R., të cilat dyshohet se i janë shkaktuar nga viktima- tani i ndjeri (F.H.,) për të cilat ka marr trajtim mjekësor në Qendrën Klinike Universitare të Kosovës (QKUK).

Ferizaj

Ndalohen dy persona për vrasjen e 32 vjeçarit në Ferizaj

Published

4 days ago

29 June, 2026

Redaksia

Policia e Kosovës ka dhënë detaje lidhur me vrasjen që ka ndodhur mbrëmë rreth orës 22:50, në një banesë në rrugën “Sejdi Sejdiu”në Ferizaj, ku një person ka humbur jetën dhe dy të tjerë janë ndaluar për 48 orë.

Viktima është identifikuar me inicialet F.H., 32 vjeç, ndërsa vdekja e tij është konstatuar në vendin e ngjarjes nga ekipi mjekësor.

“Gjatë ekzaminimit të vendit të ngjarjes është konstatuar një plagë që dyshohet se është shkaktuar nga arma e zjarrit. Në vendngjarje janë gjetur dhe sekuestruar një pistoletë dhe një gëzhojë.

Nga hetimet fillestare rezulton se ngjarja ka ndodhur në banesën e M.B. (48 vjeç), ku në momentin e incidentit ndodheshin aty bashkëshortja, si dhe vajza e tij A.R. (24 vjeçe). Kjo e fundit ka pësuar lëndime trupore dhe është dërguar për trajtim mjekësor në Qendrën Klinike Universitare të Kosovës (QKUK).

Pas ekzaminimit të vendit të ngjarjes, ekziston dyshimi i bazuar se rasti ndërlidhet me veprën penale “Vrasje e rëndë”.

Me vendim të prokurorit të rastit, i dyshuari M.B. është ndaluar për 48 orë. Po ashtu, edhe ndaj A.R. është lëshuar vendim për ndalim prej 48 orësh, mirëpo ajo vazhdon të mbetet nën trajtim mjekësor në QKUK.

Trupi i pajetë i viktimës është dërguar në Institutin e Mjekësisë Ligjore në Prishtinë për obduksion.

Sektori i Hetimeve Rajonale, në koordinim dhe autorizim të prokurorit të shtetit, është duke ndërmarrë veprime intensive hetimore për zbardhjen e plotë të rrethanave të këtij rasti”, thuhet mes tjerash në njoftimin e Policisë.