Pas 30 ditësh pushim nxënësit e shkollave fillore dhe të mesme sot u janë rikthyer bankave shkollore. Drejtori i Arsimit në Ferizaj Afrim Llabjani, tha se mësimi ka nisur në të gjitha shkollat e kësaj komune, duke respektuar masat kundër koronavirusit. Sipas Llabjanit edhe këtë gjysmëvjetor shkollat fillore do të punojnë sipas skenarit A, ndërsa ato të mesmet me skenarin B.

“Nga informacionet që kemi marrë nga të gjitha shkollat, që të gjitha kanë filluar procesin mirë dhe nuk kanë pas telashe. Ne paraprakisht i kemi furnizuar shkollat me mjete higjienike dhe materiale të nevojshme. Në dy-tri shkolla kemi pasur probleme me ngrohje, por që është rregulluar ai problem. Në Ferizaj shkollat kanë filluar me skenarin A, ndërsa shkollat e mesme me skenarin B, ndërkaq kemi ardhë në përfundim  se nga java e ardhshme mund ta rritim minutazhën e orës, kështu që i kemi njoftuar shkollat që ku janë mundësitë për të rritur minutazhën e orës  ta bëjnë këtë“, tha Llabjani.

Edhe në këtë fillim gjysmëvjetori, mësimdhënës e nxënës janë konfirmuar pozitiv me Covid-19.

“Kemi marrë një shkresë nga instituti të premtën ku jemi njoftuar se janë 7 mësimdhënës me Covid dhe nuk mund të paraqiten në shkollë, po ashtu kemi 1 nxënës që ka rezultuar pozitiv dhe dy personel tjetër që janë konfirmuar”, tha Llabjani.

Mësimi sot ka nisur edhe në shkollën “Bilall Shala” në fshatin Kosinë. Edhe në këtë gjysmëvjetor ky institucion arsimor do të përballet me probleme të ujit të pijes, meqë sipas banorëve është i papijshëm.

“Ka problem me ujë, nuk është i pijshëm, nxënësit e kanë shumë problem, në përgjithësi në fshat nuk është uji i pijshëm dhe është shumë problem i madh“, tha Halit Reshani, banor i Kosinës.

 Në anën tjetër, drejtori i kësaj shkolle, Ejup Jetishi, thotë se uji është i pijshëm.

“Unë nuk  e di që nuk është i pijshëm, ne e konsumojmë të gjithë atë ujë, verës ka probleme, por tani jo, uji është i pijshëm, siç e di unë  ai kontrollohet nga instituti, unë personalisht e pi”, tha drejtori Ejup Jetishi.

“Sa i përket shkollës në fjalë ne nuk kemi pasur kërkesë konkrete në lidhje me ujin e pijes, por e dimë që fshati Kosinë është fshat i ulët dhe kanë probleme të gjithë banorët, por ne po besojmë se në bashkëpunim me shkollën do të bëjmë një zgjidhje për ta që mos e kenë këtë problem”, tha drejtori i Arsimit në Ferizaj Afrim Llabjani.

Gjysmëvjetori i parë i procesit mësimor përfundoi më herët sesa ishte planifikuar për shkak të gjendjes me koronavirus në vend, ndërsa pjesa e dytë e procesit mësimor pritet të përfundoj në muajin qershor.

 Ndryshe, Sindikata e Bashkuar e Arsimit, e Shkencës dhe e Kulturës ende e sheh si opsion grevën e paralajmëruar për javën e ardhshme, nëse nuk paguhen shtesat prej 100 eurove për mësimdhënës.