Ferizaj

Kërkohet përkrahje për personat me Sindromën Down

Published

5 years ago

19 March, 2021

21 marsi nuk është vetëm Dita e Pranverës, por edhe Dita Botërore e Sindromës Down.

E, meqë kjo datë sivjet i bie në ditë vikendi, shoqata Down Syndrome Kosova në Ferizaj, ka vendosur që mos ta lë pa e shënuar ditën botërore të këtyre personave. Në hapësirat e kësaj shoqate në Ferizaj, gjatë ditës së sotme u organizuan disa aktivitete.

Udhëheqësja e kësaj shoqate Yllka Mani, kërkoi nga institucionet që të mendojnë më shumë për këtë kategori të shoqërisë.

“Sfida fillon tek fondet pasi aty është pengesa për të rritur kapacitetet tona, unë i bëj thirrje komunës që të ofroj mbështetje më të madhe, pasi disa shërbime që ne i japim këtu ka qenë dashur të jepen nga shteti, prandaj i ftoj institucionet dhe bizneset që t’i ndihmojnë këto shoqata”, tha Mani.

E, prindërit e fëmijëve me Sindromën Down theksuan nevojën e sigurimit të transportit për fëmijët që marrin shërbime në qendrën në Ferizaj.

“Transporti është nevojë shumë e madhe për prindërit, unë nga Vitia e kam sjell këtu vajzën time, tani jam zhvendosur në Ferizaj por i di vështirësitë, prandaj tani nuk është kërkesë e imja, por është kërkesë e prindërve të tjerë, nëse sigurohet transporti për prindërit është më e lehtë”, tha Behare Shaqiri.

Për nder të kësaj dite, nxënësit e klasës së katërt të shkollës fillore “Gjon Serreçi” në Ferizaj, kishin përgatitur disa mesazhe që u dedikohen fëmijëve me Sindromën Down.

“Mongolizmi quhet një mutacion gjenetik i veçantë tek njeriu tek i cili posedon kromozomin e 21. Është një çrregullim kromozomesh që vjen si rezultat i vonesës së zhvillimit fizik, intelektual dhe gjuhësor“, tha një nxënëse.

“Ne duhet që të gjithë njerëzit t’i afrojmë afër nesh, mos t’i përqeshim e t’i ndajmë, ata janë si ne”, tha një nxënëse tjetër.

Mesazhe që synojnë ndërgjegjësimin e shoqërisë për personat me Sindromën Down, kishin përgatitur edhe vet ata që marrin shërbime në qendrën në Ferizaj.

“Ne kemi të drejta”, “Unë shkoj në shkollë”, “Unë punoj në kafeteri”, “Unë shkoj vet në punë”.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

1 week ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim