Veshje sportive, topa e atlete të futbollit janë donacioni që pranoi shkolla fillore “Kemajl Hetemi” në Rahovicë nga bashkëfshatari Hyzer Zariqi, i cili jeton në Mynih të Gjermanisë.

Drejtori i shkollës së Rahovicës Kadri Ramadani, falënderoi Zariqin për këtë ndihmë, që ishte shumë e nevojshme për nxënësit.

“Pas një bisede me të më ka premtuar se do t’i dërgojë disa veshje sportive dhe topa dhe këtë e ka realizuar me një sukses shumë të madh. Si drejtor i shkollës, në emër të stafit dhe nxënësve e falënderoj shumë Hyzerin për këtë ndihmë. Na ka dhënë gjithsej 18 topa, mbi 40 komplete veshje dhe diku 30 palë kopaçka”, tha Kadri Ramadani, drejtor i shkollës “Kemajl Hetemi”.

Për shkak të numrit të madh të pajisjeve sportive, Ramadani në dakordim me Zariqin, vendosi që një pjesë të tyre t’ia dhurojë shkollës “Mejdi Xhaferi” të fshatit Mirosalë.

E, nxënësit janë ata që më së shumti iu gëzuan këtij donacioni.

“Po, unë jam shumë i gëzuar për këto veshje sportive, desha të them që unë do të vazhdoj të luaj futboll, unë kam luajtur futboll nga mosha gjashtë vjeçare dhe mendoj që nuk duhet të ndalojnë këto donacione për fëmijë”, tha Arlind Maliqi, nxënës i shkollës “Kemajl Hetemi”.

“Ne i kemi pritur shumë me gëzim dhe kemi me vazhdu me shumë donacione tjera.. Unë e luaj futbollin prej moshës shtatë vjeçare dhe kam dëshirë që të luaj me Leonel Messin edhe unë, për Barcelonën”, tha Ardi Zariqi, nxënës.
Ramadani tutje tregon se mbështeten tek donacionet edhe për renovimet në shkollë, pasi që Ministria e Ekonomisë nuk e ka mbajtur premtimin për ndërrimin e dyrëve e dritareve mbi 20 vjeçare.

“Çdo shkollë, por veçanërisht shkolla jonë ka nevojë për donacione tjera. Unë kam kërkuar edhe prej donatorëve tjerë që të na furnizojnë së paku me video-projektorë dhe kompjuterë, pasi që ne e dimë që shkolla është donacion i ADRA-së dhe bashkëvendasëve tanë. Nuk kemi pase ato që i kemi pritë, megjithatë shpresojmë që kanë me na ndihmu që të kemi sa më shumë mjete shkollore që të ngritet edhe cilësia tek nxënësit. Por, edhe donacione tjera që kanë me na e rregullu shkollën, sepse dyertë dhe dritaret qe 21 vite nuk janë ndërruar. Drejtori i Arsimit na i ka ndërru të gjitha dyertë e katit të poshtëm dhe tri të katit të epërm. Besojmë që sivjet kemi me u kompletu me dyer, por për dritare nuk e dijmë. Janë të dëmtuara edhe parketi e pllakat, po shpresojmë që kanë me u ndërru sepse me të vërtetë sado që mbanë pastërti, nuk ekziston pastërtia. Na është premtu një stazë nga dera e shkollës deri tek dera e oborrit, edhe ky është premtim që dy vjet, por pse nuk po realizohet nuk po mundemi me ditë”, tha drejtori Kadri Ramadani.

Donatori Hyzer Zariqi i ka premtuar kësaj shkolle që kur të kthehet nga Gjermania do t’ia rregullojë edhe një kopsht të lodrave.