Me përfundimin e ditëve të nxehta, u mbyll edhe kjo gropë para komunës që i ngjante një plazhi të vogël. Përveç mbylljes së gropës, pushteti e shkëputi edhe kontratën me firmën kontraktuese, e cila gjatë mandatit të kaluar qeverisës e kishte fituar tenderin për projektin e sheshit të qytetit. Në një interevistë për Tv Tema, kryetari i komunës Agim Aliu, tha se prej ardhjes së tij në pushtet ka shqyrtuar të gjitha mundësitë për këtë projekt që, sipas, tij ka qenë duke u realizuar pa korniza ligjore. Ai tha se arriti ta bëj zgjidhjen  më të duhur.

“Në fakt kjo punë ka një zanafillë jo të mirë, nëse kthehemi në aspektin retrospektiv, për faktin së ky projekt nuk është dashur fare të niset, sepse ka qenë një projekt në kundërshtim me Planin Zhvillimor,  ku aty ka paraparë krejt një tjetër projekt, por sido që të jetë ka qenë një projekt gjysmak, një projekt që nuk i ka pasur të gjitha detajet dhe është zgjedhur një operator që i ka kryer punët në këtë formë të cilat janë parë nga të gjithë dhe ne kur kemi ardhur kemi kërkuar nga operatori që t’i përfundojë punët e parapara, por ai nuk ka qenë i gatshëm që të bëjë pjesën tjetër të punës siç e kemi kërkuar dhe kësisoj operatori nuk ka qenë i gatshëm ta kryej këtë obligim dhe sigurisht që s’ka pasur siguri të projektit. Kjo ka rezultuar me një marrëveshje në bazë të proceduarave ligjore që ka zhvilluar shefi i Zyrës së Prokurimit me përfaqësuesin e kompanisë “Beni Com” ku në fakt e gjithë puna e kryer ka një kosto rreth 240 mijë euro, me një obligim të mbetur nga ana jonë 20 mijë euro, por që në fakt e shpëton komunën nga ky projekt në shumën prej rreth 660 mijë euro. Pra, ne jemi duke kursyer 660 mijë euro nga një punë jocilësore dhe nga një projekt jo i bërë mirë nga qeverisja e kaluar”, tha Aliu.

Në anën tjetër, ish-kryetari i komunës nga LDK-ja Muharrem Svarqa, këtë hap të kryetarit aktual e konsideron mendësi të PDK-së për t’i ndalur të gjitha projektet kapitale që kanë të bëjnë me qeverisjen e kaluar.

“Realisht, për fat të keq është reduktuar i tërë projekti për modernizimin e sheshit të qytetit në një gropë, ku tash kryetari aktual po e konsideron si një sukeses që ka arritë ta mbyllë atë, por në fakt aty kemi pasur të bëjmë me pjesën më të rëndësishme të projektit, ndërtimin e një fontane për relaksimin e qytetarëve dhe ndryshimin e pamjes së qytetit. Arsyet pse është ndërprerë kontrata janë krejtësisht banale, sepse  kryesi i punimeve ka qenë duke i realizuar punimet, por me kërkesë të pushtetit i ka ndërprerë, është bërë edhe testi i kubëzave që ka dalë të jetë pozitiv, por nëse ai nuk i ka kryer punimet është dashur që pushteti ta ndëshkoj, ta fus në listë të zezë dhe mos të kompensohet për punët e tjera. Pushteti në vend se të merret me realizimin e projekteve po merret me ndërprerjen e tyre, ku po pengohet koncepti i zhvillimit të qytetit, po ashtu po humbet imazhi i përgjithshëm qytetarë, sepse e drejta e realizimit të investimeve nuk është e drejtë e kryetarit dhe e askujt tjetër, por është produkt i debateve me qytetarë“, tha Svarqa.

Teksa pushteti ndërpreu kontratën për projektin e sheshit të qytetit, kryetari Aliu tha se ende nuk e kanë të finalizur idenë se çfarë në fakt do të investohet në zemër të qendrës.

“Sigurisht që do ta analizojmë, sepse nuk ka mjete të parashikuara, ju e dini që ne kemi edhe telashe të tjera financiare dhe pa financa nuk mund të realizojmë projekte që do t’i përgjigjen situatës së krijuar, por ajo që do të bëhet është se do të realizohen projekte që do të përshtaten edhe me konceptin tonë, me vizionin që kemi për Ferizajn dhe qendrën e qytetit. Do t’i shohim format se si do t’i gjejmë për t’i financuar projektet e përshtatshme“, tha Aliu.

Derisa qeveria lokale ka publikuar edhe marrëveshjen dy palëshe të ndërprerjes së kësaj kontrate, kryetari Aliu është optimist se ndaj komunës nuk do të ketë padi nga firma ”Beni Com”. Përveç tjerash, Agim Aliu tregoi se tashmë vërejtje me shkrim u janë shqiptuar edhe disa firmave të tjera të cilat janë kontraktuese me komunën, pikërisht për shkak të cilësisë së dobët të  punimeve në  projekte publike.