Ferizaj

Banorët kërkojnë zhbllokimin e rrugës

Published

8 years ago

12 September, 2018

Dhjetëra banorë të fshatit Slivovë dhe Koshare të komunës së Ferizajt, ka disa vite që për të shkuar në arat e tyre duhet të kalojnë nëpër prona private, edhe pse aty ekziston rruga publike, mirëpo një gjë e tillë u është pamundësuar për shkak të bllokimit të rrugës nga punimet që ishin bërë për instalimin e rrjetit të kanalizimit në fshatin Dramjak. Banorët e Slivovës dhe Koshares thonë se nuk po kërkojnë asfaltimin e kësaj rruge, por vetëm duan hapjen e saj në mënyrë që të mos kalojnë nëpër prona private. Sipas tyre, nëse nuk ndërmerren masa për hapjen e kësaj rruge, konfliktet mes banorëve do të jenë të pashmangshme për shkak të dëmit që po u shkaktohet këtyre pronave nga kalimi nëpër to.

“Prej që e kanë instalu kanalizimin për Dramjak kjo rrugë më nuk ka funksionu, nuk është shumë e gjatë, 700 metra, tash po jemi të detyruar që me kalu nëpër prona private, rruga është blloku, ne nuk jemi duke lyp asfalt, por vetëm me u zgjeru apo me u bë e kaluar siç ka qenë”, tha Bajram Hazha.

“Kjo rrugë prej vitit 2011 si e kanë instalu kanalizimin më nuk ka funksionu asnjëherë, banorët po detyrohen të shkojnë nëpër ara private, kjo rrugë ka qenë e kalueshme më herët, por kur e kanë instalu kanalizmin për Dramjak na e kanë prishur, prandaj ne po kërkojmë siç e kanë prishur le ta ndreqin”, tha Vehbi Murtezi.

“65 vjet i kam qetu, edhe prej Prishtinës, Tërrnit, Rashincës kanë ardhë me blu në Nerodime përmes kësaj rruge, por prej se e kanë instalu kanalizimin në Dramjak kjo rrugë është bllokuar, na kanë premtuar disa herë, por secili që po vjen vetëm setrat po i ndërrojnë e i njëjti sistem po mbetet”, tha Sabit Salihu.

“Që 10 vite kjo rrugë është e pakalueshme, prej që është instalu kanalizimi ne po duhet me i punu arat me shku nëpër rrugë tjera, nëpër oborre të shtëpive, kjo rrugë ka qenë e kalueshme kanë ardhur nga gjithkah me blu në Nerodime, por tash është mbyllur, po prishet gruri, misri se nëpër rrugën kryesore nuk po mundemi me kalu, ne nuk po lypim asfalt, por vetëm me e hap e me u bë e kalueshme”, tha Halil Murtezi.

Në anën tjetër, drejtori i Infrastrukturës Arbër Bytyqi, tha se nuk është në dijeni për problemin e këtyre banorëve, mirëpo do të shikojnë se çka mund të bëjnë në këtë aspekt.

“Unë nuk jam i njoftuar për problematikën që e kanë banorët e kësaj pjese, por gjithsesi ne si Drejtori e Infrastrukturës së bashku me Drejtorinë e Shërbimeve Publike do të shikojmë mundësinë e zgjedhjes së problemit të këtyre banorëve ose do të shikojmë mundësinë që përmes projektit asfaltimi i rrugëve në Slivovë që do të vazhdojë vitin e ardhshëm do të shikojmë të gjitha alternativat që t’u bëjmë zgjidhje, personalisht do të dalë në vend të ngjarjes dhe të shoh çka është problemi dhe pastaj të ndërmarrim masa për zgjidhjen e problemit”, tha Bytyqi.

Banorët thanë se kjo rrugë e cila njihet si “Rruga e Mullirit”, lidh disa fshatra të kësaj ane.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

2 weeks ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim