Ferizaj

Anulimi i kontratës shqetëson banorët e 4 fshatrave

Published

8 years ago

22 September, 2018

Bllokuan magjistralen dy herë duke protestuar me kërkesën për asfaltimin e rrugës, madje në protestën e dytë me banorët e fshatrave Bablak-Tërrn-Luboc-Koshare, u takua edhe kryeministri i Kosovës Ramush Haradinaj, i cili premtoi se deri në fund të vitit kjo rrugë do të asfaltohet, mirëpo siç duket ky zotim i kryeministrit do të mbetet vetëm fjalë, pasi Organi Shqyrtues i Prokurimit sërish ka anuluar kontratën për asfaltimin e kësaj rruge. Ky lajm i ka zhgënjyer tej mase banorët e këtyre fshatrave.

“Anulimi i këtij tenderi është pritur me shqetësim të madh, ne e dimë që është një projekt kapital dhe ka të bëj me shuma milionëshe prandaj ne jemi të bindur se ka probleme rreth grupeve në Ministrinë e Infrastrukturës dhe vështirë se do të kaloj edhe për një kohë. Ne jemi të zhgënjyer me tri qeveritë e fundit, e veçanërisht me tre ministrat që kanë qenë që nga vitit 2008. Jemi të zhgënjyer me ish-ministrin Fehmi Mujota i cili afër nesh është me shtëpi, ai ka qenë dy mandate ministër dhe nuk ka lejuar asnjëherë të hyjë në projekt, ndërsa ai nëpër vise malore ka krijuar një rrjet të asfaltimit në drejtim të Suharekës që ne s’jemi kundër, por atje arriti të tejkalojë procedurat, po ashtu jemi të zhgënjer edhe me Lutfi Zharkun i cili njëjtë ka vepruar, diku mes Karadakut dhe Kaçanikut ka arritur për një muaj me i tejkalu procedurat e tenderimit për asfaltim të rrugës në një pjesë ku kalojnë 30 hektarë zabele të familjarëve të tij, po ashtu jemi të zhgënjyer edhe me ministrin aktual i cili një javë para zgjedhjeve ka qenë pikërisht këtu dhe ka premtuar, do të thotë kur kanë interesa familjare e grupore procedurat i tejkalojnë shumë shpejtë, e këtu tek ne s’kanë pasur interes”, tha Sabit Avdiu, përfaqësues i fshatit Tërrn.

“Ky dimër do të na pret në gjendje shumë të rëndë sipas të gjitha gjasave, shumë herë punët na u kanë afruar për t’u bërë asfaltimi, por siç duket vetëm në letër, për neve jeta është e njëjtë, ata njerëz që po munden me bë zgjidhje po ikin nga fshati se pa rrugë s’po kemi as transport për nxënës, as për punë, dhe lajmi që morëm dje është shokues për neve, premtimet e kryeministrit ishin bombastike, madje ne e uronim njëri-tjetrin se u kry puna dhe po realizohet ëndërra 15 vjeçare”, tha Imri Shabani, banor i Lubocit.

“Tash sa e ndërrova gomën e veturës se e prisha në gropë, çka me i thanë kryeministrit që veç erdh na premtoi”, tha një tjetër banor.

“Kemi pritur me shpresë të madhe, e sidomos pas protestës, edhe fjalët e kryeministrit kanë qenë që të besojmë në to, pasi na ka thënë që do të kujdeset për ato procedura, por tani na vjen keq që janë anuluar procedurat, pasi me të vërtetë kemi probleme me rrugë, është e pakalueshme”, tha Evli Ibishi, banor i fshatit Tërrn.

Banorët e katër fshatrave thanë se protestën e radhës do ta mbajnë para Ministrisë së Infrastrukturës në Prishtinë.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

14 hours ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”