Ferizaj

Miratohet rregullorja për tatimin në pronën e paluajtshme

Published

8 years ago

25 September, 2018

Kuvendi i Komunës së Ferizajt me 32 vota për , ka miratuar rregulloren për tatimin në pronën e paluajtshme për vitin tatimor 2019.

Drejtoresha e Financave Sebahate Ajeti, tha se kjo rregullore parasheh uljen e tatimit në pronë prej 10%.

“Në bazë të ligjit mbi tatimin e pronës së paluajtshme i cili do të hy në fuqi nga data 1 tetor 2018, janë ndryshuar tarifat e caktimit të lartësisë së tatimit në pronën e paluajtshme, pra kanë pësuar ulje prej 10% të tatimit në pronë krahasuar me rregulloren e vitit të kaluar, andaj me këtë rregullore të propozuar bëhet harmonizimi i caktimit të lartësisë së tatimit në pronën e paluajtshme për vitin tatimor 2019”, tha Ajeti.

Ndërkaq, opozita vlerësoi se nuk po ulet tatimi, por vlera e pronës së paluajtshme, duke e quajtur këtë propozim kamuflim të premtimit elektoral të kryetarit Agim Aliu për ulje të tatimit në pronë prej 10%.

“Është tentu që të kamuflohet ulja e tatimit për 10%, i cili edhe ka qenë edhe propozim i kryetarit Aliu se do të ulë tatimin në pronë për 10% dhe ligji nuk e ka lejuar këtë prandaj është mundu që duke e ulë bazën e pronës së pasurisë së qytetarëve ku ne jemi dëshmitarë që çdo ditë vlera e pronës ngritet në qytetin tonë, do të thotë vetëm për t’u kamufluar kjo ulje është ulur baza e pronës së qytetarëve dhe komuna nuk e ka të drejtë të ulë vlerën e pronës sime, pra sivjet e paskan shfrytëzu këtë mundësi për shkak se vitin e ardhshëm Ministria po e marrka në kompetencë të saj vlerësimin e pronës dhe shkallën e tatimimit, kështu që le të dihet që kjo është një kamuflim se nuk do të ulet tatimi në pronë për 10%, mirëpo është ulja e vlerës së pasurisë së qytetarëve”, tha Enver Haliti LVV.

“Kam një pyetje për drejtoreshën e financave që të specifikoj ku është zbritur 10% tatimi në pronë, sipas ligjit është 0.15%, po ashtu ka qenë edhe vitin e kaluar për pronat private, prandaj të sqarohet kjo”, tha Shkëlzen Selmani, LDK.

“Ulja e tatimit në pronë është zbritur tek çmimi, pasi normat janë minimumi, atëherë ne e kemi zbritur në bazë të anketave që kemi marrë nga anketuesit e tatimit në pronë, uljen e kemi bërë tek çmimi bazë i pronave”, tha drejtoresha e Financave .

“Atëherë mos të proklamohet që është zbritur tatimi në pronë për 10%, tatimi në pronë nuk është zbritur se ka qenë i njëjtë prej fillimit, 0.15, ndërsa vlera e çmimit të zbritjes është krejt tjetër gjë, prandaj nuk është zbritur taimi në pronë, por është zbritur vlera e patundshmërisë”, tha Shkëlzen Selmani.

“Si PDK e përshëndesim uljen e tatimit në pronë për qytetarët e komunës sonë, por personalisht kam vërejtje për ndarjen e zonave, kjo ndarje është bërë në të kaluarën dhe po bëhet edhe tash, konsideroj se jemi dëshmitarë të ndryshimeve që po ndodhin në qytet, prandaj këto ndryshime ndikojnë drejtpërdrejtë edhe në ndryshimin e vlerave të pronës që merren parasysh si bazë në caktimin e vlerës së pronës, besoj që pajtohemi që vlera e objekteve nuk është e njËjtë sikurse te sheshi, në rrugën “12 qershori” apo në “Ahmet Kaçiku”, prandaj kisha kërku që gjatë këtij viti të punohet që të bëhet një ndarje e zonave në formë të merituar për secilën pronë”, tha Arian Imeri nga PDK.

“Sa i përket caktimit të zonave është viti i fundit që është në kompetencë të komunës caktimi i vlerave të zonave pasi me ligjin e ri nga viti i ardhshëm pritet që Ministria ta marrë edhe këtë kompetencë përsipër”, tha Ajeti.

Në mbledhjen e sotme të Kuvendit të Komunës së Ferizajt, u diskutuan dhe u miratuan një varg çështjesh si shpallje në interes të përgjithshëm i disa ngastrave kadastrale, ndërsa rregullorja për taksa, tarifa, ngarkesa dhe gjoba komunale është shtyrë për seancën e ardhshme. Po ashtu me vota unanime u miratua edhe rregullorja komunale për mënyrën dhe kushtet e menaxhimit dhe shfrytëzimit të objekteve sportive publike, ndërsa u mor vendim që të del në diskutim publik edhe Draft-statuti i teatrit “Adriana” si dhe u miratua edhe Rregullorja për realizimin e të drejtave të fëmijëve përmes sistemit qeverisës komunal miqësor për fëmijët.

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

17 hours ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 week ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”