Ferizaj

LVV fton qytetarët t’i bashkohen protestës së nesërme

Published

8 years ago

28 September, 2018

Lëvizja Vetëvendosje në Ferizaj, u ka bërë thirrje qytetarëve që nesër t’i bashkohen protestës kundër presidentit të Kosovës Hashim Thaçi, i cili sipas tyre, pa legjitimitet po zhvillon negociata kokë më vete me Vuçiqin për territorin e vendit. Kryetari i Vetëvendosjes në Ferizaj Valon Ramadani, pasi shpërndau ftesa për protestë bashkë me aktivistë të tjerë të kësaj partie, tha se për të gjithë qytetarët që dëshirojnë t’i bashkohen kësaj proteste, nisja nga Ferizaj do të bëhet në mënyrë të organizuar.

“Siç e dinë qytetarët e Kosovës, nesër është protesta gjithë popullore në Prishtinë dhe ne si qendër kemi pasur takime mobilizuese për këtë protesë dhe qytetarët kanë konfirmuar se do të jenë pjesë e kësaj proteste, po ashtu përmes kësaj konference dëshirojmë t’i informojmë qytetarët e Ferizajt se nesër do të ketë transport të organizuar, nga ora 12:30 do të filloj nisja nga oborri i shkollës “Gjon Serreçi”, prandaj ne u bëjmë apel edhe një herë qytetarëve të Ferizajt që t’iu përgjigjen kësaj proteste me moton ”Një popull s’i nënshtrohet një njeriu” dhe pa dallime partiake dhe pa inate të askujt ne do të organizojmë këtë protestë e cila do të jetë paqësore”, tha Ramadani.

Sipas Ramadanit, protesta e nesërme shpreh bindjen dhe vullnetin e qytetarëve për mbrojtjen e vendit.

“Gati se të gjithë qytetarët e Kosovës e dinë arsyen pse po protestojmë, kjo protestë është kundër copëtimit të Kosovës dhe Luginës, nuk mundet një njeri të vendos për fatin e Kosovës, pasi kjo tokë është mbrojtur me gjak prej shekujsh dhe nuk mundet një njeri të vendos për të”, tha Ramadani.

Ndryshe, protesta e thirrur nga Lëvizja Vetëvendosje nuk është përkrahur nga subjektet tjera opozitare në Kosovë.

Ferizaj

Arrestohen dy persona në Ferizaj për sulm dhe therje me thikë

Published

1 day ago

24 June, 2026

Redaksia

Dy persona janë arrestuar nga policia në Ferizaj nën dyshimin se kanë sulmuar me thikë një burrë.

Sipas raportit 24 orësh të policisë, viktima ka pësuar lëndime dhe është dërguar për tretman mjekësor në QKUK në Prishtinë. Raportohet se ngjarja ka ndodhur në mesditën e së martës.

Të arrestuarit janë dërguar në mbajrje derisa rasti po hetohet si lëndim i lehtë trupor.

Ferizaj 23.06.2026 – 12:15.

“Janë arrestuar dy të dyshuar meshkuj kosovarë nën dyshimin se kanë sulmuar me thikë viktimën mashkull kosovar. Viktima ka pësuar lëndime dhe është dërguar për tretman mjekësor në QKUK. Me vendim të Prokurorit, të dyshuarit pas intervistimit janë dërguar në mbajtje”, thuhet në raport.

Ferizaj

Ferizajasi dorëzon në polici portofolin e gjetur me dokumente dhe 160 €

Published

6 days ago

19 June, 2026

Redaksia

Një qytetar nga Ferizaj ka gjetur një portofol me dokumente personale dhe 160 € të cilat i ka dorëzuar në polici. Portofoli ishte gjetur të enjten (18.06.2026), rreth orës 18:00.

Më pas në stacion është paraqitur edhe pronari i portofolit, të cilit i janë kthyer dokumentet dhe paratë.

“Më 18.06.2026, rreth orës 18:00, qytetari F.Abazi (34 vjeç), nga Ferizaji, ka treguar një shembull të lartë të ndershmërisë dhe përgjegjësisë qytetare, duke gjetur një portofol me dokumente personale dhe 160 euro në rrugën “Gjergj Fishta” në Ferizaj.

Menjëherë pas gjetjes, ai e ka dorëzuar portofolin në stacionin policor në Ferizaj.

Më pas, në stacionin policor është paraqitur qytetari E.A. (24 vjeç) nga Shtimja, i cili kishte humbur portofolin. Pas verifikimeve të kryera nga zyrtarët policorë, pronarit të ligjshëm i janë kthyer portofoli, dokumentet personale dhe shuma prej 160 eurosh”, ka njoftuar Policia e Kosovës në Facebook.

Ferizaj

Sekuestrohen 60 kg marihuanë dhe arrestohen katër të dyshuar

Published

1 week ago

18 June, 2026

Redaksia

Policia e Kosovës ka arrestuar 4 persona pasi zbuloi dhe sekuestroi rreth 60 kilogramë substancë narkotike të dyshuar të llojit marihuanë.

Kjo sasi e narkotikëve u sekuestrua pas një aksioni në dy lokacione në Prishtinë dhe në fshatin Babush të Ferizajt.

Aksioni i policisë u realizua në bashkëpunim me Prokurorinë Themelore Prishtinë dhe Agjencinë e Kosovës për Inteligjencë (AKI), pas zhvillimit të hetimeve disa mujore dhe zbatimit të masave të veçanta hetimore.

Të arrestuarve, një (1) shtetas i Republikës së Kosovës, dy (2) shtetas të Republikës së Serbisë dhe një (1) shtetas i Republikës së Shqipërisë, u është caktuar masa e ndalimit për 48 orë, për shkak se të njëjtit dyshohen për kryerjen e veprës penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge.”

Gjatë këtij aksioni janë sekuestruar edhe dy (2) vetura, dhe një (1) kamion.