Ferizaj

USHAF-i bëhet me laborator të arkitekturës, dizajnit dhe teknologjisë së drurit

Published

7 years ago

01 October, 2018

Universiteti i Shkencave të Aplikuara në Ferizaj, ka hapur sot dyert për të pritur me një ceremoni solemne studentët e regjistruar në vitin akademik 2018/19, e në veçanti ata të cilët për herë të parë nisin studimet në këtë universitet. Në këtë fillimvit akademik, USHAF-i bëri hapjen e laboratorit të arkitekturës, dizajnit dhe teknologjisë së drurit.

Rektori i Universitetit të Ferizajt Agron Bajraktari, tha se ky vit akademik po fillon me shumë risi, ku përveç hapjes së laboratorit, ai tha se kanë rritur edhe numrin e stafit akademik, gjë e cila do të ndikoj që vitin e ardhshëm të shtojnë katër programe të reja studimi.

“Tri arsye për të festuar më shumë se herave të tjera, ne sot kemi një laborator shumë modern dhe i teknologjisë së fundit, i cili na vjen si donacion nga Qeveria e Republikës së Kosovës, ku studentët tanë do të kenë mundësi që njohuritë e tyre t’i rrisin edhe më tej. Arsyeja e dytë që ne mburremi shumë, është se në këtë vit stafi akademik me punë të rregullt është rritur edhe për 18, prej të cilëve 11 nga ta kanë gradën e doktorë shkencave, ndërsa të tjerët kanë gradën e magjistrit dhe arsyeja e tretë dhe më e rëndësishmja është ju studentë të ri të cilët jeni në numër kaq të madh dhe që fatin e keni pasur të jeni studentë tanë”, tha Bajraktari.

Hapjen e laboratorit të arkitekturës, dizajnit dhe teknologjisë së drurit, e mirëpritën studentët e Universitetit të Ferizajt.

“Sot është bërë edhe hapja e laboratorit të arkitekturës ku besoj se do të ketë edhe laboratore të tjera që studentët të kenë mundësi sa më të mëdha”, tha kryetarja e Parlamentit Studentor të Univeristetit të Ferizajt, Xhyljeta Xhymshiti.

“Jam në vitin e dytë të studimeve dhe tani me këtë laborator do të mundemi me bë pjesën praktike, po ashtu me zhvillu anën tonë kreative përmes këtyre makinave”, tha Resul Qorrolli, student i Arkitekturës, Dizajnit dhe Teknologjisë së Drurit.

Këtë vit në Universitetin e Ferzajt janë regjistruar mbi 400 studentë në katër programe studimi, si Fakulteti i Arkitekturës, Dizajnit dhe Teknologjisë së Drurit, Fakulteti i Inxhinierisë dhe Informatikës, Fakulteti i Menaxhimit dhe Fakulteti i Turizmit dhe Mjedisit.

Ferizaj

Ngritët aktakuza e parë për zgjedhjet e 28 dhjetorit

Published

1 week ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

3 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.