Ferizaj

Vazhdojnë protestat kundër projektit ”Bashkimi i Qytetit”

Published

7 years ago

11 October, 2018

“Shiten objektet për shkak të presionit nga komuna, për përfitime të veta”. Kështu shkruante sot në letrat e vendosura nëpër dhjetëra dyqane të rrugës “Madeleine Albright” në Ferizaj. Këto biznese protestën e nisur dje për projektin “Bashkimi i Qytetit”, sot e vazhduan në këtë mënyrë. Ata po ankohen se drejtues të pushtetit po i mashtrojnë, ndërsa me pikat e vendosura në orët e mbrëmjes së djeshme, shumicës së këtyre bizneseve do t’u pamundësohet afarizmi.

“Kjo do të thotë se po na e mshelin derën, kanë ardhë mbrëmë dhe i kanë vendosur pikat e projektit që po i bjen mexha as me centimetra larg shtëpisë time. Unë punoj që 50 vjet në Zvicër me fëmijë e me krejt, kam marrë kredi e kam ardhë kam investu këtu i kam ble këto dyqane, e sot me ta mbyll derën kjo është diçka e pakuptimtë. Po ja falim krejt komunës se përndryshe s’po di çka me bë”, tha plaku me emrin Ibrahim.

“Kjo reklamë që e kemi vendosur në dyqan tregon se sa të shqetësuar jemi me projektin që komuna po donë ta bëj këtu nënkalim e neve si biznese do me na e blloku punën. Nuk jemi kundër investimeve, por ato të bëhen edhe me pëlqim të komunitetit tonë, e jo fare pa na pyetur po vijnë edhe po punojnë çfarë po ua merr mendja. Kjo protestë simbolizon një dëshmi se në çfarë shteti jemi duke jetuar ne, sepse ata janë duke punuar vetëm për përfitime të veta dhe jo për interesa të qytetarëve”, tha Vesel Thaçi.

Këto shqetësime të bizneseve nga komunarët konsiderohen të paarsyeshme.

“Absolutisht këtu nuk ka kurrfarë interesi. Interesi i vetëm është interesi qytetarë dhe i komunës në përgjithësi, unë mund t’iu them atyre se aty do të ketë ngritje të vlerës së pronave të tyre dhe nuk e di pse ata ankohen për këtë projekt, thjesht shqetësimet e tyre janë të paarsyeshme, ne i kemi bërë disa ndryshime bazuar në ankesat e atyre bizneseve dhe ky projekt do të realizohet deri në fund”, tha drejtori i Infrastrukturës Arbër Bytyqi.

Banorët dhe afaristët e rrugës “Madeleine Albright”, në të cilën do të ketë tunel të hapur në bazë të projektit “Bashkimi i Qytetit”, kanë paralajmëruar se protestat do t’i vazhdojnë edhe ditëve të ardhshme në mënyra të ndryshme.

Art & Showbiz

Nis edicioni i 55-të jubilar i Festivalit të Teatrove Ferizaj

Published

2 weeks ago

01 September, 2025

Redaksia

Nga sot deri më 7 shtator 2025, në Ferizaj do të mbahet Festivali i Teatrove, i cili sivjet shënon edicionin e 55-të jubilar.

Hapja zyrtare e festivalit bëhet nga ora 19:00 me shfaqjen “13” me regji të Sulejman Rushitit, në teatrin “Adriana”, derisa ditëve në vijim, para publikut ferizajas,do të prezantohen disa shfaqje të prodhuara dhe ngjarje të veçanta nga konceptet “Retroteatri” dhe “FTF Skena”.

Festivali i Tetarove Ferizaj, është prej festivaleve më të vjetra në Kosovë, i cili që nga viti 1970, përmes shfaqjeve nga vende të ndryshme jo vetëm vendore por edhe ndërkombëtare, bashkon profesionistë të teatrit dhe artdashës.

Hapjes zyrtare të festivalit do t’i paraprijë shfaqja për të rinj “Black Box” të cilën artdashësit mund ta shohin në Galerinë e qytetit të Ferizajt.

Këtë vit, në programin zyrtar të festivalit, do të jenë shfaqjet: “13” (më 1 shtator), “Bëje ose vdis” (2 shtator), “Djali” (3 shtator), “Hijet e Kohës” dhe “Komedia e zezë” (4 shtator), “God blesh America” (5 shtator), “Kjo është rinia jonë” dhe “PRISHTINA. Vrasja e paralajmëruar e një ëndrre” (6 shtator) si dhe shfaqja “Të vërtetat tona” (7 shtator).

Ky edicion jubilar i festivalit do të përmbyllet më 7 shtator, me shfaqjen jashtë konkurrence “Të bardhët”.

Tradicionalisht, çdo ditë të festivalit organizohen edhe debate për teatrin, punëtori krijuese me artistë ndërkombëtar dhe ndeja pas çdo shfaqjeje në oborrin e Teatrit.

Ferizaj

Arrestohet për vjedhje të trotineteve dhe biçikletave në Ferizaj

Published

3 weeks ago

23 August, 2025

Redaksia

Hetuesit e stacionit policor në Ferizaj, kanë arrestuar të dyshuarin B. T, 28 vjeç, i cili gjatë periudhës 01.07.2025 – 19.08.2025 ka kryer disa raste të vjedhjeve në banesa dhe objekte banesore në qytetin e Ferizajt.

Sipas policisë, nga hetimet është vërtetuar se i dyshuari ka vjedhur dy trotinete elektrike dhe dy biçikleta, me vlerë totale prej rreth 4.220 €, të cilat më pas i kishte shitur personave tjerë, duke iu treguar se ishin të vjedhura.

Me urdhër të prokurorit të shtetit, i dyshuari B. T. është ndaluar për 48 orë për procedura tjera hetimore.

Sendet e vjedhura janë sekuestruar dhe do t’u kthehen pronarëve ligjorë.

Ndërsa ndaj dy personave të tjerë, G .B, 33 vjeç dhe B. H.,25 vjeç, është iniciuar rasti penal “Blerja, pranimi ose fshehja e sendeve të përfituara nga vepra penale”, pasi kanë pranuar se ishin në dijeni për origjinën e tyre.

Ferizaj

Digjen rreth 13 hektarë me të mbjella dhe mal në Lloshkobare të Ferizajt

Published

3 weeks ago

21 August, 2025

Redaksia

Në fshatin Lloshkobare të Ferizajt, nga zjarri janë djegur disa hektarë me të mbjella të ndryshme. Viktimat dyshojnë për zjarrëvënie të qëllimshme nga persona të panjohur.

Në raportin 24-orësh të Policisë së Kosovës, thuhet se të mërkurën pasdite, viktimat kanë raportuar se nga zjarri atyre u janë djegur 5 hektarë mjedër, 3 hektarë të mbjella me dredhëza, 1 hektar me arra dhe 3 hektarë mal.

“Ferizaj 20.08.2025-16:30. Raportohet se persona të panjohur i kanë vënë zjarrin pronës se dy viktimave meshkuj kosovarë, ku janë djegur rreth 3 hektarë me mal, 5 hektarë mjedër, 4 hektarë me dredhëza dhe 1 hektar me arra, që janë djegur në tërësi”, njoftoi Policia e Kosovës.